Matthew 22

Chin TBR17 (Tedim Bible Revision 2017)

← Chapter 21 Jump to: Chapter 23 →

1Jesu in amaute kiangah thu gentehna dang khat zangin thu hilh a,

2“Vantung ki-ukna zia pen a tapa adingin mopawi a bawl kumpipaʼ gamtatzia tawh kibang hi.

3Mopawi siim dingin a khoh sa mite a sam dingin a nasemte sawl a, ahi zongin kuamah pai lo hi.

4Tua ciangin nasem dangte sawl leuleu a, ‘Ka khohsak sa mite kiangah hih bangin va gen un: Ka bawngtalte le ka bawng no thaute kigo khin a, nitak an a min sa-in a om banah, na khempeuh a man sa-in om khinta hi. Mopawi an ne dingin hong pai ta un, ci hi, ci-in va gen un,’ a ci hi.

5Ahi zongin a khoh sa mite in na thusim lo uh a, pawl khat in lo na kuan sanin, pawl khat in a sumbuk ah na paisanin,

6a dangte in a nasemte manin a na sat gawp khit uh ciangin a na that uh hi.

7Kumpipa zong heh mahmah a, a galkapte kuansakin tua mi thatte a thahsak khit ciangin a khua a hal tum sak hi.

8Tua ciangin a nasemte kiangah, ‘Mopawi an a baih sa-in om a, ahi zongin ka sap mite a ne dingin a kilawm lo mi a suak uh hi.

9Tua ahih manin lam lianpi ah va pai unla, mi na muh zahzah uh hong sam un,’ a ci hi.

10Nasemte zong lam lianpi ah va pai uh a, mihoih mihoih lo ci loin a muh khempeuh uh va kaikhawm uh ahih manin mopawi bawlna inn sung dimin leengla hong om hi.

11“Kumpipa, a leenglate a en dingin a hong lut ciangin mopawi siimna puan a silh lo mi khat a mu hi.

12Ama kiangah, ‘Lawm aw, mopawi siimna puan silh lopi-in hih lai ah hong bangci lut theih na hi hiam?’ a cih ciangin tua mipa in a cih nading a thei kei hi.

13Tua ciangin kumpipa in a nasemte kiangah, ‘A khut a khe hen unla, pualam khua mialna lakah lawn khia un; tua lai ah kapin a hagawi ding hi,’ a ci hi.

14“Bang hang hiam cih leh mi tampi a kisap hangin tawm bek a kiteel hi,” a ci hi.

15Tua ciangin Farisi mite paikhia uh a, a kampauna tawh Jesu a mat theih nadingun thu a kikum uh hi.

16Amauʼ nungzuite le Herod mi pawl khat, Jesu kiangah a paisak uh hi. Amaute in, “Sia aw, thu ahi bang a gen tawntung na hihna thu ka thei uh hi. Mite kuamah zahtak tuam nei lo na hih manin midangteʼ pau ding bangmah phamawh sa loin Pasian in miteʼ gamtat ding a deihna bangin tangtakin thu na hilh tawntung hi.

17Tua ahih ciangin Rom kumpipa Sisar tungah siah i piak ding kilawm hiam, na ngaihsutna nong gen nadingin ka deih uh hi,” a ci uh hi.

18Ahi zongin Jesu in amauʼ gitloh geelna thei ahih manin, “Mihoih a kineihkhem mite aw, bang hangin kei hong thangsiah se na hi uh hiam?

19Siahin na piak ding uh sum hong lak dih un,” a cih ciangin sumtang peek khat hong paipih uh hi.

20Tua ciangin Jesu in amaute kiangah, “Hih sum tungah kua lim le kua min om ahi hiam?” ci-in a dot ciangin

21amaute in, “Sisarʼ lim le a min kigelh hi,” a ci uh hi. Tua ciangin Jesu in amaute kiangah, “Sisarʼ nate Sisarʼ tungah na pia unla, Pasianʼ nate Pasianʼ tungah na pia un,” a ci hi.

22Amaute in hih thu a zak uh ciangin lamdang sa mahmah uh a, ama kiang panin a paikhia uh hi.

23Tua ni mahin, misite thawhkikna om lo hi, ci-in a um Saddusi mite pawl khat Jesu kiangah hong pai uh a,

24“Sia aw, Moses in, ‘Mi khat ta nei loin a sih leh tua a si mipaʼ khang a kizop theih nadingin a naupa in a uʼ zi luah tahen,’ ci hi.

25Tu-in kote lakah unau pasal sagih omngei hi. A u pen in zi nei a, ta nei loin si ahih manin ama zi a naupa in a luah hi.

26Tua mah bangin a nihna, a thumna a kipan a sagihna dongin ta nei loin a si uh hi.

27Tua unau pasal sagihte a sih khit ciangin a numei zong a si hi.

28Tua ahih manin tua unau pasal sagihte in tua nu teenpih kim uh ahih manin, thawhkik hun ciangin a koi penʼ zi hi ding ahi hiam?” ci-in a dong uh hi.

29Ahi zongin Jesu in, “Note in Lai Siangtho thu ahi a, Pasianʼ vangliatna ahi zongin thei lo na hih manun na ngaihsun khial uh hi.

30Bang hang hiam cih leh misite a thawhkik uh ciangin vantungah a om vantung mite tawh kibang ding uh a, zi nei pasal nei cih om lo ding hi.

31Misite thawhkikna thu tawh kisai-in note tungah a gen thute sim ngei lo na hi uh hiam?

32Pasian in, ‘Kei pen Abrahamʼ Pasian, Isaacʼ Pasian, Jakobʼ Pasian ka hi hi,’ ci hi. Pasian pen a si miteʼ Pasian hi loin a nungta miteʼ Pasian ahi hi,” a ci hi.

33Mihonte in hih thu a zak uh ciangin ama thuhilhna hangin lamdang a sa uh hi.

34Ahi zongin Farisi mite in, Saddusi miteʼ thudotna Jesu in dongkhakin, Saddusi mite in a cih nading mel uh a theih nawn lohna thu a zak uh ciangin Jesu kiangah a hong pai uh hi.

35Amaute sung panin Thukham hilh siate khat in Jesu a thangsiahna-in thu hong dong a,

36“Sia aw, thukham khempeuh sung panin bang thukham lian pen ahi hiam?” ci-in a dong hi.

37Jesu in, “Na Topa Pasian na lungsim khempeuh, na nuntakna khempeuh le na pilna khempeuh tawh na it ding hi, cihna ahi hi.

38Hih pen a masa pen, a lian pen thukham ahi hi.

39A nihna pen a masa mah tawh kibang a, nangma pumpi na it bangin na veengte na it in, cihna ahi hi.

40Hih thukham nihte tung panin thukham dang khempeuh le kamsangteʼ thuhilhna khempeuh a hong meeng khia ahi hi,” ci-in a dawng hi.

41Tua bangin Farisi mite hong kikaihkhop laitakin Jesu in amaute kiangah,

42“Note in Khris kua hi ci a, kuaʼ suan hi, ci-in ngaihsun na hi uh hiam?” ci-in a dong hi. Amaute in, “Davidʼ suan hi,” ci-in a dawng uh hi.

43Tua ciangin Jesu in amaute kiangah, “Tua ahihleh bang hangin David mahmah in Pasianʼ Khaʼ sawlna tawh,

44‘Topa in keima Topa tungah thu gen a: Na galte, na khe nuai ah ka koih matengin ka tak lamah na tu in,’ ci hi, ci-in thu na gen a, Khris pen ka Topa ci ahi hiam?

45David in Khris pen Topa ci ahihleh bang hangin Khris pen Davidʼ suan hi thei ding ahi hiam?” ci-in thu a dong hi.

46Kuamah in ama thudotna kam khat beek dawng thei lo uh hi. Tua hun a kipanin kuamah in Jesu kiangah thu a dong ngam nawn kei uh hi.

← Chapter 21 Jump to: Chapter 23 →