Proverbs 6

Chin TBR17 (Tedim Bible Revision 2017)

← Chapter 5 Jump to: Chapter 7 →

1Ka ta aw, na lawmte khatpeuh in sum leitawi a lak ciangin a loh zawh kei leh ama tangin a lohsak dingin kam na ciam kha hiam?

2Na kampauna hangin nang hong kimanin, na thuciamna hangin na awk kha hiam?

3Ka ta aw, tua bang na hih khak leh, tua mipaʼ khut sungah a om na hi hi. Na suahtak theih nadingin manlangin a kiangah pai inla, hong khah nadingin ama kiangah thum in.

4Ih mumu kei inla, om mawkmawk kei in.

5Sabeng paʼ kiang panin a suahtak nadingin sakhi a tai bangin, thang ah a awk vasa a kitom bangin na suahtak nadingin hanciam in.

6Thadahpa aw, miksite kiangah pai inla, amauʼ nuntak zia va en in.

7Amaute in a uk ding le a makai ding kuamah nei lo napi-in,

8khuakhal sungin a nek ding uh, tuk hun sungin kaikhawm khol uh hi.

9Thadahpa aw, bang tanvei lumlum dinga, cik ciangin tho khia ding na hi hiam?

10Tawm khat sung mengme lai ning, na cih kikalin

11zawnna le cihmawhna in migilo gutate bangin nang hong su gawp pak ding hi.

12Miginalo pa, a gilopa, thuzuau genin vak kawikawi a,

13nang hong khemnop manin a mitheek hong pia-in, a khe tawh hong su-in a khut tawh hong khoih hi.

14A lungsimah thusia bekbek ngaihsun niloh a, a omna peuh ah buaina a piangsak hi.

15Tua ahih manin theih kholh lohin ama tungah lungkhamna tung dinga, bawlkik zawh nawn loh dongin siatna ngah ding hi.

16Topa in a muhdah, a khah khong ngei loh ding, thu guk, tua zah bek hi lo, thu sagih tak om a, tuate pen

17kihihsakna, zuau thu genna, mawhnei lo mi thahna,

18thusia bawl ding ngaihsutna, gamtat siat ding a manlangte,

19zuau thu gen teci man lote, le kitotna a piangsakte ahi hi.

20Ka ta aw, na paʼ hong gen bangin gamta inla, na nuʼ hong thuhilhnate mangngilh kei in.

21Amauʼ hong thugente phawk tawntung inla, na lungsimah ciamteh niloh in.

22Tua thute in na paina peuh ah lam hong lak dinga, zanin na ihmut kalin nang hong cing dinga, sunin na hah sungin na gamtat nading hong hilh ding hi.

23Bang hang hiam cih leh thukham le a hilhnate pen a taang mahmah khuavak bang hi a, khalna le hilhnate pen nuntak nading lampi hi a,

24miʼ zi tawh na mawh loh nadingin nang hong kemin, kam khum zangin a hong zol numei gina lote kiang panin nang hong hu ding hi.

25Amauʼ melhoihna iplah kha kei inla, amauʼ hong zawlmitna khenglah kha kei in.

26Bang hang hiam cih leh anlum khat tawh numei paktat khat kingah zo a, ahi zongin numei tawh mawhna in nuntakna bup siasak hi.

27Na ang sungah meikuang pom lecin na puan kaang loin om ding ahi hiam?

28Mei-am tungtawnin pai lecin na khe kaang loin om ding ahi hiam?

29Tua mah bangin miʼ zi tawh a mawhte in gimna thuak ding uh a, tua bang a gamta peuhmah in gimna thuak ding uh hi.

30A gilkial a cimawh mi khat in na a guk ciangin, midangte in mawhsak lua lo napi,

31amah kiman leh a zah sagihin kilohsak a, a neih khempeuh a piak kul hi.

32Ahi zongin numei tawh a mawhte pen thu ngaihsun thei lo mi hi a, amau le amau a kisusia tawm ahi uh hi.

33Mawhna a bawl mi in sat gawpna thuak dinga, a min sia-in mindai paisuak ding hi.

34A numeiʼ pasal a heh zawk theih nading thudang om nawn lo a, a heh thukna ah khawl hun cih nei thei lo hi.

35Amah in sumlepai sang nuam vet lo a, letsong tampi piakna in a hehna damsak zo lo hi.

← Chapter 5 Jump to: Chapter 7 →