Revelation 4

Chin TBR17 (Tedim Bible Revision 2017)

← Chapter 3 Jump to: Chapter 5 →

1Hih thu teng khit ciangin ka khuadak leh vantungah kong a kihong sa-in a om ka mu hi. Peengkul awging tawh a kibang, kei kiangah thu a hong gen sa awging mah in, “Hih lai ah hong pai to in. Tunung ciangin thupiang dingte kong lak ding hi,” hong ci hi.

2Thakhat thu-in Kha Siangtho tawh ka kidim a, tua vantung a tokhom tungah mi khat a tu ka mu hi.

3Tua tokhom tungah a tupa pen Jasper le Karnelian suangmanpha bangin taang ziazua a, a tokhom kimkot pen Emerald suangmanpha bangin suum pempam hi.

4Tua tokhom kimkot ah tokhom sawm nih le li om a, tuate tungah puan pak silhin kham lukhu a khu upa sawm nih le lite tu uh hi.

5Tua tokhom panin khuaphialep hong taang khia-in, awging le vanging hong kipan khia a, a tokhom mai ah Pasianʼ kha ahi meivak sagih a kivak hi.

6A tokhom mailam tengah Kristal suangmanpha bangin a siang kilkel, limlang peekpi kiphah tuipi bangin a dum dide hi. Tua tokhom kiim a pang ciatah a nung le a mai ah mit a dimin a nei ganhing li a om hi.

7A ganhing a khatna pen humpinelkai tawh kibang a, a nihna bawngtal tawh kibang a, a thumna in mihing maitang nei a, a lina pen muvanlai a leeng lai tawh kibang hi.

8Tua ganhing lite in kha guk ciat nei-in, tua a khateʼ sung lam le a pua lamah mittang a dimtakin om a, a sun a zan tawlnga loin la sa uh a, “A beisa, tu hun, le a tawntungin a om Vanglian Topa Pasian, siangtho hi, siangtho hi, siangtho hi,” a ci uh hi.

9Tua ganhingte in a nungta tawntung, tokhom tungah a tupa tungah a lungdamna uh ko-in pahtawi-in a phat simun

10nungta tawntungin tokhom tungah a tupa mai ah tua upa sawm nih le lite zong bokin amah bia uh a, tua tokhom mai ah a lukhute uh lawnin, la sa uh a,

11“Koteʼ Topa Pasian aw, nangmah in na khempeuh piangsakin, nangma deihna bangin na khempeuh omin, na khempeuh kipiangsak ahih manin, minthanna, pahtawina, le vangliatna na ngah tawntung dingin a kilawm hi,” a ci uh hi.

← Chapter 3 Jump to: Chapter 5 →