Titus 2

Chin TBR17 (Tedim Bible Revision 2017)

← Chapter 1 Jump to: Chapter 3 →

1Ahi zongin nangmah in upna man tawh a kituak thu na hilh in.

2Pasal khanghamte a kilawm a kituakin a om theih nading, thu ngaihsun thei mi ahih nading, a kikem zo mite ahih theih nading, upna man a neih theih nading, itna man a neih theih nading uh le a manin lungkipin a thuak zawh nadingun na gen in.

3Tua mah bangin mite in Pasianʼ thu a gensiat khak loh nadingun numei khanghamte zong a gamtat a khuahek uh a zahtakhuai ahih nading, mi gensiate ahih loh nading, zunek kiphamawhte ahih loh nading, thuhoih thupha hilhin,

4amaute sangin a nau zaw nupite in a pasalte uh le a tate uh a it nadingun a hilh ding,

5thu ngaihsun thei, a gamtat siangtho, inn nasep a kizen, a migi le a pasalte uh thu a mang thei mi ahih nadingun na gen in.

6Tua mah bangin khangnote zong amau pumpi a ki-uk zawh nadingun na hanthawn pha in.

7Nangma pumpi mahmah gamtat hoihna a kipan thu khempeuh ah etteh hoih dingin na om in. Lungsim takpi tawh miteʼ zahtak theih dingin thu na hilh inla,

8miteʼ mawh mat theih loh ding kam hoihte na zang in. Tua hileh i langte in hong gensiat theih nading mu loin a mai uh zum lel ding hi.

9Silate in zong a tote uh thu mangin, thu khempeuh ah a tote uh a lungkimsak nading, a tote uh thu seel loin,

10a guktaak loh nading, a tawntungin hoih gamtatin a cihtakna uh a kilatsak nadingun na hanthawn in. Tua hileh eite hong Hon Pasianʼ thu a hoihna a kilangsakte ahi ding uh ahi hi.

11Bang hang hiam cih leh mi khempeuh in hotkhiatna a ngah theih nadingun Pasian in ama hehpihna hong lak khinzo hi.

12Eite in i lamet, a lian Pasian le eite hong Hon Jesu Khris a vangliatna hong kilatkik ding hun ngakin i om laitakin i biakna tawh a kituak lo thute le leitung nate deihna phiatin, lungsim hi hithiatin omin, thutangin, hih leitungah Pasianʼ deihna bangin i nuntak nadingin tua hehpihna thu in eite hong hilh hi.

14I mawhna khempeuh panin hong hon khia ding le ama neihtuam i suah theih nadingin Jesu a mahmah hong kipumpiak a, eite pen gamtat hoih gamtat ding a lawp mahmah ihi hi.

15Hih ka hong thugente hilh inla, mite taii-in na hanthot ciangin na aana neih teng khempeuh zang kawm in. Miteʼ simmawhin om kei in.

← Chapter 1 Jump to: Chapter 3 →