Zechariah 3

Chin TBR17 (Tedim Bible Revision 2017)

← Chapter 2 Jump to: Chapter 4 →

1Topa in maang hong musak a, Topaʼ vantungmi mai ah siampi lianpen pa Joshuaʼ mawhna a zong dingin a kiangah Satan zong a om ka mu hi.

2Topaʼ vantungmi in Satan kiangah, “Satan aw, Topa in nang hong mawhsak hi. Jerusalem a it Topa in nang hong mawhsak hi. Hih Joshua pen meikhuk sung panin a kiteen khia singkhuah tawh kibang hi,” a ci hi.

3Joshua ahihleh vantungmi mai ah dinga, puan a nin mahmah a silh hi.

4Vantungmi in ama sawltak van midangte kiangah, “Hih mipaʼ silh a puan ninte suahkhiatsak un,” ci-in thu a pia hi. Tua ciangin vantungmi in Joshua kiangah, “Na mawhna teng kong paih khiatsak khin a, tu-in na silh dingin puan thak kong pia ding hi,” a ci hi.

5Tua ciangin a sawltak van mite thu pia a, Joshuaʼ lu tungah dial siangtho a khipsak ding uh a sawl hi. Topaʼ vantungmi tua munah a din sung mahin, amaute in zong Joshua, dial siangtho khimsakin, tua khit ciangin puan siangtho zong a silhsak uh hi.

6Tua ciangin Topaʼ vantungmi in Joshua kiangah limtakin thu gen a,

7Vanglian Topa in hih bangin ci hi: “Ka thukhamte zui-in kong sawl thute na sep leh, ka biakinn sung le biakinn huang sungteng na uk dinga, hih ka kiang a om vantung miteʼ thu ka ngaih bangin nangma thu zong ka hong ngai ding hi.

8Tua ahih ciangin siampi lianpen pa Joshua aw ngai in: Ama siampi pih ahi no a dangte in zong ngai un. Note pen mailam thuhoihna ding lim na hi uh hi. Sing bangin A Sel a kici min nei khat kong paisak ding hi.

9Joshuaʼ omna mai ah, mai sagih a nei suang khat ka koih hi; tua suang tungah lai ka gelh dinga, ni khat sungin hih gam miteʼ mawhna ka paih khiatsak ding hi.

10Tua ni ciangin note khempeuh in leenggui le theikungte hau-in nuam na sa ding uh a, na veengte ciat un hong nek pihin hong lungdam pih nadingun na sam ding uh hi, Vanglian Topa in ci hi,” a ci hi.

← Chapter 2 Jump to: Chapter 4 →