Jonah 2

Chin TBD (Tedim Bible Revision 2017)

← Chapter 1 Jump to: Chapter 3 →

1Tua ciangin Jonah in tua ngapi’ gil sung panin Topa a Pasian kiangah thu ngen a,

2“Ka cihmawhna panin Topa ka sam a, amah in kei hong dawng hi. Sihna gam Sheol panin kong kiko a, nangmah in ka aw nong za hi.

3Tuipi thuk sungah kei nong khia a, tui in kei hong tuumcip hi. Na tuihualte khempeuh in kei hong tum hi.

4Tua ciangin keimah in, ‘Na omna panin kei hong kihawlkhia hi. Na biakinn siangtho hong koici et kik thei ding ka hi hiam?’ ka ci hi.

5Tui in kei hong tuamcip a, ka kimkotah hong umcih hi. Tuipi tunga lopate in ka lu hong vialcip hi.

6Mualte’ bul tuipi taw dong ka va paisuk a, kong hong kikhaknelh tawntungna mun ka tun hangin tua Leihawmpi sung panin a nungta-in nong lato veve hi, Topa ka Pasian aw.

7Kei ka lung a kiat ciangin Topa kong phawk a, ka thungetna, na biakinn siangtho sung, nangma kiang hong tung hi.

8Kimanna a nei lo milim a biate in nangmah hong taisan uh hi.

9Ahih hangin ke’n ahihleh lungdamna aw tawh biakna kong pia ding a, ka ciamsa thu ka tangtungsak ding hi. Topa’ kiang pan hotkhiatna hong pai hi,” a ci hi.

10Tua ciangin Topa in tua ngapi sawl a, amah in lei keu tungah Jonah a luakhia hi.

← Chapter 1 Jump to: Chapter 3 →