Mark 15

Chin 2011 (Tedim Bible)

← Chapter 14 Jump to: Chapter 16 →

1A zingsang ciangin siampi liante in upate, Thukham hilh siate, le ulian dang khempeuh tawh thu kikupna khat nei uh a, Jesuh a henkhit uh ciangin paikhiatpihin Pilat tungah a ap uh hi.

2Pilat in, “Nang, Jew mite’ Kumpipa na hi hiam?” ci-in a dot ciangin Jesuh in, “Nang zong tua mah nong ci hi,” ci-in a dawng hi.

3Siampi liante in Jesuh a mawhsakna tampi gen uh ahih manin

4Pilat in Jesuh kiangah, “Na dawn nading om lo ahi hiam? Nang hong mawhsakna thute na zazo hi,” a ci hi.

5Ahi zongin Jesuh in amah a kimawhsaknate kamkhat beek dawng het lo ahih manin Pilat in lamdang a sa mahmah hi.

6Paisan Pawi hun simin mite in Pilat tungah a nget peuhpeuh mi khat, thong panin a khah a ngeina ahi hi.

7Kumpi a lehdo laitakun mi a that, thong sunga kikhumte lakah Barabbas a kici mi khat zong kihel hi.

8Pilat kiangah mihonte hong paito uh a, hih bang hun pawlin a hih ngei bangin mi khat a khah nading a hong ngen uh hi.

9Pilat in amaute kiangah, “Jew mite’ Kumpipa ka khah ding hong deih na hi uh hiam?” ci-in a dong hi.

10Bang hang hiam cih leh siampite in Jesuh a hazatna hangin hih bangin ama kiangah a paipihna thu teltakin a thei hi.

11Ahi zongin Barabbas hong khahsak zaw in, ci-in mihonte in a nget nadingun siampite in mihonte a hanthawn uh hi.

12Tua ciangin Pilat in mihonte tungah, “Jew mite’ Kumpipa na cih pa uh bangcih ding ka hi hiam?” ci-in a dot ciangin

13amaute in, “Singlamteh tungah that in,” ci-in a awng uh hi.

14Tua ciangin Pilat in, “Bang hangin tua ci na hi uh hiam? Bang siatna bawl ahi hiam?” a cih ciangin, “Singlamteh tungah that in,” ci-in a kinakko zaw semsem uh hi.

15Pilat in mihonte lungkimsak nuam ahih manin Barabbas khah a, Jesuh a satsak khit ciangin singlamteh tungah thah dingin galkapte’ khut sungah a ap hi.

16Tua ciangin galkapte in gam ukpa’ inntualah Jesuh paipih uh a, galkap dang khempeuh zong kikhawmsak uh hi.

17Jesuh, puansan silhsak uh a, ling lukhu bawlin a lu tungah a khusak uh hi.

18A zahtakbawl bang keekin hopih uh a, “Jew mite’ Kumpipa aw, na khansau ta hen!” a ci uh hi.

19Tua ciangin pumpeeng tawh a lu satin cilphih uh a, a zahtakbawl kineihin a mai-ah a kun uh hi.

20Tua bangin a simmawhbawl khit uh ciangin a puansan suahkhiatsak uh a, ama puan ngeite a silhsakkik uh hi. Tua ciangin singlamteh tungah thah dingin a paikhiatpih uh hi.

21Tua bangin a pai laitakun, Alexander le Rufas’ pa, Sairin khuami Simon a kici mi khat, gam sung panin khuapi sunga hong pai tawh kituak uh a, Jesuh’ singlamteh a pua dingin lammat uh hi.

22Lutang guh a cihnopna Golgotha munah paipih uh a,

23tua lai-ah myrrh a kici zatui a sawhsa uh leenggahzu pia uh a, ahi zongin Jesuh in ne nuam lo hi.

24Tua ciangin singlamteh tungah amah khai uh a, a puante kua in a koi ngah ding cih a theih nadingun suang lawnin ai san uh a, amauteng in a puante a hawm uh hi.

25Jesuh, singlamteh tungah a khai hun pen zingsang nai kua laitak ahi hi.

26“Jew mite’ Kumpipa,” ci-in amah a mawhsakna uh lai kigelh hi.

27A taklamah khat, a veilamah khat, mi thatte nih tawh a kikhai khawm hi.

28(Hih bangin a hihna uh tawh, “Khialhna a nei mite tawh kisim khawm hi,” ci-in Lai Siangtho sungah a kigelh thu a tung ahi hi.)

29Amah a va mukha mi peuhpeuh in a lu uh singin zahpihbawl uh a, “A! Biakinn susia-in ni thum sungin a lamkik ding pa!

30Singlamteh tung panin hong kumsuk inla, nangmah kihonkhia tawm in!” a ci uh hi.

31Tua bangmahin siampi liante le Thukham hilh siate in zong zahpih bawlin, “Midangte honkhiazo napi, amah le amah kihonkhia zo lo!

32Israel mite’ kumpipa Khrih tu-in singlamteh tung panin hong kumsuk leh amah um ni!” a kici uh hi. Jesuh tawh a kikhai khawm mi nihte in zong a simmawhbawl uh hi.

33Tua ciangin sunkim nai sawm le nih laitak a kipanin nai thum sung leitung khempeuhah khim a zing hi.

34Nitak nai thum laitakin Jesuh nakpitakin kiko a, “Ka Pasian, ka Pasian aw, bang hangin kei hong nusia na hi hiam?” a cihna ahi, “Eloi, Eloi, lama sabakthani?” a ci hi.

35Tua a kikona a zak uh ciangin tua lai-a om mi pawlkhatte in, “Elijah a sam hi,” a ci uh hi.

36Tua laitakin mi khat va tai a, leenggahzu-hau sungah tuihupna diahin pumpeeng dawnah a henkhit ciangin Jesuh’ hup dingin tahto a, “Khawl dih un, singlamteh tung panin a sutkhia dingin Elijah hong pai hiam, en dih ni,” a ci hi.

37Tua ciangin nakpitakin Jesuh kiko-in a laitat hi.

38Biakinn sunga kidalna puan a tung lam pan a taw dongin kikekin phelnih a kisuah hi.

39Jesuh’ mai-ah a ding galkap mangpa in tua bangin kiko-in a laitah a muh ciangin, “Hih pa, Pasian’ ta taktak ahi hi,” a ci hi.

40Jesuh a gal et numei pawlkhat zong a om hi. Tuate lakah Magdala khuami Mary, a nauzaw James le Josef’ nu Mary, le Salome ahi uh hi.

41Galilee gam sungah Jesuh a om lai-in hih numeite in Jesuh zui-in a huh uh hi. Jerusalem ciang dong Jesuh a hong zui numei dang tampi zong a om hi.

42Tua ni pen Sabbath ni ma, Kigin’ ni ahih manin nitak lam ciangin,

43mite in a zahtak, ulian vaihawmte lakah a kihel, Pasian’ Uk ding hun zong a lamen, Arimathea khuami Josef, hangtakin Pilat kiangah hong pai-in Jesuh’ luang a hong ngen hi.

44Pilat in a lungsimah, Jesuh a si khin takpi mah hi ding ahi hiam, ci-in ngaihsun ahih manin galkap mangpa samsak a, si khinta ahi hiam, ci-in a dong hi.

45Galkap mangpa’ genna panin a sihkhitna thu a theih ciangin a luang a laktheih nadingin Josef tungah thu a pia hi.

46Josef in zong puanpak lei a, singlamteh tung panin Jesuh’ luang lakhia-in, a puan lei tawh hoihtakin vialin tuam a, tawhsa-in a om suang han sungah a sial hi. Tua ciangin suangtum khat hualin a kongvang a hu hi.

47Magdala khuami Mary le Josef’ nu Mary in, Jesuh a kivuina mun a thei uh hi.

← Chapter 14 Jump to: Chapter 16 →