Numbers 31

Chin 2011 (Tedim Bible)

← Chapter 30 Jump to: Chapter 32 →

1Topa in Moses kiangah,

2“Israel mite’ phu Midian-te tungah la in. Tua khit ciangin na mipihte kiang na zuan ding hi,” a ci hi.

3Tua ahih ciangin Moses in mite kiangah, “Midian-te’ tungah Topa’ phulakna a sem ding, Midian-te a do dingin note’ lak panin mi pawlkhat galhiam guan un.

4Israel minamte nam khat panin mi tulkhat ciat gal sungah na kuansak ding uh hi,” a ci hi.

5Tua ahih ciangin Israel mi tul tampi sung panin minam khatah tulkhat, tul sawm le tulnih galdo dingin galhiam kiguan’ hi.

6Moses in amaute, minam khat panin tulkhat ciat, biakinn nate le pataukoh nadingin peengkulte siampi Eleazar’ tapa Finehas kengsakin ama makaihna tawh gal sungah a kuansak hi.

7Topa in Moses a thupiak bangin Midian-te do uh a, pasal khempeuh that uh hi.

8Amaute in midangte le Midian kumpi ngate Evi, Rekem, Zur, Hur, le Reba a thahna uhah, Beor’ tapa Balaam zong namsau tawh that khawm uh hi.

9Israel-te in Midian nupite le a tate uh manin, a bawngte, a tuuhonte khempeuh le a na khempeuh uh laksak uh hi.

10Amau’ tenna a khuapi khempeuh uh le a giahphual khempeuh uh mei tawh halsak uh a,

11a matsa khempeuh uh, mihing ganhing ciahpih khin uh hi.

12Tua ciangin amaute in Jerikho nai, Jordan kiang, Moab zanglei-a a giahphual uh a Moses le siampi Eleazar le Israel mihonte kiangah a galmatte uh le a na lakte uh tunpih uh hi.

13Moses, siampi Eleazar, le mihon makaite khempeuh zong giahphual pua-ah vai dawn dingin pai uh hi.

14Galdona panin a hong ciah mi tul tampi a ukte le mi za tampi a uk galkap uliante’ tungah Moses heh hi.

15Moses in amaute tungah, “Numei khempeuh hingkhawi na hi uh hiam?

16En un, hih mite in Balaam’ lamlahna tawh Peor-ah Topa’ tungah Israel mite zuautatsak hi. Tua ahih manin Topa’ mihonte lakah gimna hong tung hi.

17Tua ahih ciangin tu-in, a khangnote lakah pasal peuhmah that unla, pasal tawh a lumkhawmsa numei peuhmah zong that un.

18Ahih hangin pasal tawh a lumkhawm nai lo nungaknote khempeuh note a dingin kem un.

19Tu-in note lakah mi khat peuhpeuh a thatte le a kithatsa a lawng mi peuhmahte, giahphual pua-ah ni sagih sung om un. A ni thum ni le a ni sagih ni-in note le na galmatte uh na kisiansuah ding uh hi.

20Puan khempeuh, savun tawh a kibawl na khempeuh, keel mul tawh a kibawl na khempeuh, le sing tawh a kibawl na khempeuh na siansuah ding uh hi,” a ci hi.

21Siampi Eleazar in galdona-ah a va kuan galkapte tungah, “ Topa in Moses a thupiak thukham ngeina hih bang ahi hi:

22Kham, ngun, sumngo, sik, dal, le haknaw,

23mei a do zo peuhmahte bek mei-ah na hal ding uh a, a siang hi ding hi. Ahi zongin mei a do zo lo peuhmahte, nitna siansuahna tui tawh kisiansuah ding a, tui-ah na sawp ding uh hi.

24A ni sagih ni-in na puante uh na sawp ding uh a, note a siangtho na hi ding uh hi. Tua khit ciangin giahphual ah nong ciahkik thei pan ding uh hi,” a ci hi.

25Topa in Moses kiangah,

26“Nang le siampi Eleazar le mihon beh lutangte in gal sunga a kiman mihing le ganhingte sim un.

27Gal sunga a kingahte khen nih suah inla, galdo dingin a kuan galhangte le inn-a om mihonte tungah a kikimin hawmsak in.

28Galdo dingin a kuankhia galkapte’ tung panin mite, bawngtalte, late, le tuuhonte zanga ciangin Topa’ siah dingin khat ciat la in.

29Alang a ngah uh sung panin la inla, Topa’ tungah biakna-in siampi Eleazar tungah pia in.

30Israel mihonte in alang a ngah uh sung panin mite, bawngtalte, late, tuuhonte, ganhing khempeuh, sawmnga ciangin khat ciat la inla, Topa’ biakbuk a kem Levi mite tungah pia in,” a ci hi.

31Topa in Moses a thupiak bangin Moses le siampi Eleazar in a sem uh hi.

32Tu-in galkapte in a lak gal sunga a mat uh a omlai a kihawm dingte: Tuu tul zaguk le tul sawmsagih le tulnga,

33bawng tul sawmsagih le tulnih,

34la tul sawmguk le tulkhat,

35le pasal tawh a lumkhawm nai lo nungak a vekpi-in tul sawmthum le tulnih ahi hi.

36Alang ahi, gal sungah a kuankhia mite’ ngah pen tuu tul zathum le tul sawmthum le tulsagih le zanga hi a,

37Topa’ tuusiah pen tuu zaguk le sawmsagih le nga ahi hi.

38Bawngte tul sawmthum le tulguk hi a, Topa’ siah sawmsagih le nih ahi hi.

39Late tul sawmthum le zanga hi a, tua sung panin Topa’ siah sawmguk le khat ahi hi.

40Nungak tul sawm le tulguk hi a, tua sung panin Topa’ siah nungak sawmthum le nih ahi hi.

41Topa in Moses a thupiak bangin Moses in siampi Eleazar’ tungah Topa biak nading siah a pia hi.

42Galdo dingin a kuankhia mite a dingin Moses in a khenkhiat zah mah Israel mihonte in ngah uh a,

43mihonte in a ngah alang teng pen tuu tul zathum le tul sawmthum le tulsagih le zanga,

44bawng tul sawmthum le tulguk,

45la tul sawmthum le zanga,

46nungak tul sawm le tulguk ahi hi.

47Israel-te in a ngah alang sung panin Moses in mihing le ganhing sawmnga ciangin khat ciat la-in, Topa in ama tungah a thupiak bangin Topa’ biakbuk a kem Levi mite tungah a pia hi.

48Tua ciangin galkap tul tampite tunga uliante ahi, tul tampi a ukte le za tampi a ukte, Moses kiangah hong pai uh a,

49“Kote’ ukna nuai-a a om galkapte, na nasem kote in ka sim khin uh a, kote’ kiang panin mi khat zong a pelhem om lo hi.

50Kote in Topa’ mai-ah ko a dingin kilemna bawl nading, Topa biak nadingin kham tawh a kibawl nate, banbuhte le taaute, min gelhna zungbuhte, bilbahte, le khite ka muh ciat uh kong puak uh hi,” hong ci uh hi.

51Moses le siampi Eleazar in amaute’ tung panin na-a a kibawl khamte a sang uh hi.

52Tul tampi a ukte le za tampi a ukte’ tung panin a kingah, Topa’ tungah biakna-in a piak uh khamte khempeuh shekel tul sawm le tulguk le zasagih le sawmnga a gik hi.

53(Gal sunga a kuan mite in amau a’ ding ciat a la uh hi.)

54Moses le siampi Eleazar in tul tampi le za tampi a uk mite’ tung panin khamte sang uh a, Israel mite a dingin Topa’ mai-ah phawk tawntungna-in kikhopna buk sungah a koih uh hi.

← Chapter 30 Jump to: Chapter 32 →