1 Thessalonians 3

Chin 1977 (Tedim Bible)

← Chapter 2 Jump to: Chapter 4 →

1Tua ahih ciangin kote in lunghimawhin ka thuak zawh nawn loh uh ciangin Athen khuapi-ah komau bek ka om lai nading uh ka ut uh hi.

2Khazih’ Lungdamna Thu hilhin, i sanggampa Timoti note kiangah ka hong sawl uh hi. Hih gimnate hangin kuamah a lungkiat loh nadingin, note hong kipsak a, na upna uh ah note hong hansuah nadingin amah ka hong sawl uh hi.

3Hih gimnate thuak dingin kote hong kikoih hi ci-in nomau mah in na thei uh hi.

4Bang hang hiam na cih uh leh, eite in gimna i thuak ding hi ci-in note tawh ka omkhawm lai takun ka hong gen zo uh hi. Kong gen uh mah bangin zong a piang hi ci-in na thei uh hi.

5Tua ahih ciangin a ze-et thei, a zol theipa in no hong ze-et a, ka sepna un a mawkna a suak kha ding hi ci-in lunghimawhin ka thuak zawh nawn loh ciangin, note upna ka theih nadingin ka hong sawl hi.

6Tu-in ahih leh, Timoti in note kiang pan hong ciahkik a, note upna leh ki-itna uh a kip hi ci-in ahi zongin, kote in note kong ngaih uh mah bangin note in kote hang ngai-in, ni simin hong ngaihsun a, hong phawk uh hi ci-in ahi zongin, lungdam thu hong zasak ahih ciangin,

7ute naute aw, kote in lunghihmawhna khempeuh leh ko thuak gimna-ah note thu-upna uh hangin hehnepna ka ngah uh hi.

8Bang hang hiam na cih uh leh, note in Topa sungah na kip uh leh, kote ka nungta uh hi.

9I Pasian mai-ah note thu hangah kote lungdamna khempeuh ngaihsunin, note hangin Pasian’ hehpihna bang ci thukkik zawh ding ka hi uh hiam?

10Note maitang uh mu-in, nomau’ kisap lai khempeuh a kicin’sak nadingun kote in sun tawh zan tawh nakpi-in thu ka ngenngen uh hi.

11Note omna-ah ka hong pai nading lampi i Pa Pasian mahmah leh i Topa Zeisu in hong bawlsak ta hen.

12Tua Topa in a misiangthote tawh a hong kumsuk khawm ciangin, eite Pa Pasian mai-ah Topa in amau lungsim sian’thona-ah mawhsak nading om loin, a kipsak nadingin, kote in note kong it uh mah bangin note khat leh khat ahi zongin, mi khempeuh ahi zongin na itin, ki-itna ah khangin na kicin’ nadingun Pasian in hong bawl ta hen.

← Chapter 2 Jump to: Chapter 4 →