Colossians 4

Chin 1977 (Tedim Bible)

← Chapter 3 Jump to:

1Tote aw, note in zong vantungah om Topa khat na neih uh na thei un la, thuman thutak leh a kilawm a kituakin na silate uh na bawl un.

2Thungen tawntung un la, hong hehpihna phatin ngak un.

3Keimah in Khazih’ thu thuk hangin thongkiatna ka thuak a, tua thu thukna gen dinginah Pasian in thuhilhna kongkhak, kote ading a hong hon’ nading ahi zongin, tua thu thukna hilh ding a kilawm mah bangin ka hilh theih nading uh ahi zongin, kote ading thu hong ngetsak un.

5Pua lamah a om mite mai-ah pilna tawh gamta un la, a hun na teel un.

6Mi khempeuh tungah bang ci dawn’ kik ding cih na theih nadingun, note kam in ci al bangin a al limna tawh dimin kilawm tawntung ta hen.

7Topa sungah dikna nei-in nasem khawm sila ka hihpih, a it huai mi ahi sanggampa Tikhikas in keima thu a om khempeuh note kiangah a hong gen ding hi.

8Note in kote thu na theih nading uh leh amah in note lungsim hong hehnep theih nadingin, amah in ahi zongin, note sung pan a piang dikna a nei, a it huai mi Onesimas note kiangah ka hong sawl ding hi. Amaute in hih khua-ah a om thu khempeuh note kiangah a hong hilh ding uh hi.

10Kei tawh thong a kia khawm mi Aristarkhas akipan Barnabas’ nau Marka leh Justas a kici Zeisu te in note a hong hopih uh hi. Marka thu tawh kipawl note kiangah ka hong khak zo hi. Amah note kiangah a hong tun’ ciangin dawnin na tungsak un.

11Vunatna a thuak mite lakah hih mite bek Pasian’ Gam ading ka naseppihte ahi uh a, kei hong hehnem uh hi.

12Note lakah a piang Khazih Zeisu’ sila Epafras in note hong hopih hi. Note kicingin Pasian’ deihna khempeuh ah lunghihmawhna om loin na lungkim nadingun, note ading hahkatin thu a ngen tawntung hi.

13Note-a kipan Laodikia khua leh Hierapolis khua ah a om mite adingin nakpi-in a hahkatna thu keimah in amah ading teci ka pang hi.

14Itna a ngah zato mangpa Luka leh Demas in note hong hopih uh hi.

15Laodikia khua-ah a om ute naute a hi zongin, Nimfa akipan ama innah a om pawlpi ahi zongin na hopihsak un.

16Hih lai na sim khit uh ciangin Laodikia khua-ah a om pawlpite zong na simsak un. Laodikia khua pan a kingah ding lai zong na sim un.

17Arkhippas kiangah zong, “Nangmah in Topa’ khut sungah na ngah nasepna na zawh khit nadingin ciamteh in,” ci-in na gen un.

18Kei Paul in ka khut tawh note hopihna hih lai kong gelh hi. Kei’ thuak kikhihna na ngaihsun un. Note tungah hehpihna thupha om ta hen.

← Chapter 3 Jump to: