Haggai 2

Chin 1977 (Tedim Bible)

← Chapter 1 Jump to:

1Tua kum mah, a kha sagihna a ni sawm nih leh ni khat ni-in kamsang Haggai tungah Topa in thu gen a,

2Judah gam ukpa Zerubbabel, siampi lianpa Jehozadak’ tapa Joshua leh sal suahna panin hong ciakkik mi khempeuh tungah thu a gen dingin sawl a,

3“Ni danga biakinn a hoihna dan a ciamteh thei lai na om uh hiam? Tu-in bangci na sa uh hiam? Note’ muhna-ah a gen taak het lo tawh kibang ding hi.

4Tu-in Zerubbabel aw, thahat in Siampi lianpa, Jehozadak’ tapa Joshua aw, thahat in gam sunga om mi note khempeuh aw, thahat un Topa in ci hi. Note tawh hong omkhawm ka hih manin nasep kipan un.

5Izipt gam panin na paikhiat lai un, note kong ompih tawntung nading thu kong ciam hi. Tu-in zong ka lungsim in note hong ompih lai ahih manin lau kei un.

6A sawt loin vanpi leh leipi, tuipi leh leitung ka lokgawp ding hi.

7Minam khempeuh lokgawp ding ka hih manin, a neihsa uh sum leh paiite, hih munah hong kipuak ding a, biakinn sungah a dimin van hong om ding hi.

8Leitunga om ngun leh kham khempeuh in keima aa ahi hi.

9Biakinn thak in a lui sangin hoih zawin thupizaw ding hi. Hih biakinn-ah cihtheihna leh nopsakna kong pia ding hi,” ci sak hi.

10Gam uk kumpipa Darias in a uk kum nihna mah, a kha kuana a ni sawmnih leh nili ni-in kamsangpa Haggai tungah Topa in thu gen leuleu a,

11“Hih thu tawh kisai-in siampite’ ngaihsutna dong in:

12Mi khatpeuh in biakna-a kipia sa siangtho them khat, a puantualpi thep kawm-ah pua kha hen la, tua a puantualpi tawh anlum khatpeuh peuh ahi a, a kihuan an khat peuhpeuh ahi a, leenggahzu, ahih kei leh oliv thau, ahih kei leh an nam khatpeuh peuh ahi zongin su kha leh, tua a sukkhak an pen biakna an siangtho a suak ding hiam?” ci-in dong sak hi. Tua bangin a kidot ciangin siampite in, “Tua puantualpi in a sukkhak ante, biakna an siangtho suak tuan lo hi,” ci-in dawng uh hi.

13Tua ciangin Haggai in, “Mi khat in misi tawh a kisukkhak manin mi nin a suah khit ciangin hih ante khatpeuh peuh lawng kha leh tua a lawn’ khak ante a nin a suak ding hiam?” ci-in dong hi. Siampite in, “A nin suak ding hi,” ci-in dawng uh hi.

14Tua ciangin Haggai in thu gen a, “ Topa in hih bangin ci hi: Tu-a nong dawn’na uh mah bangin hih mite’ sepna khempeuh ah tua bangin piang ahih manin, biakna tau tungah a piak uh na khempeuh a nin suak hi.

15Note tungah a piangsa thute lim takin ngaihsun un. Topa ’ biakinn lam ding na kipat ma-un bangci na hi uh hiam?

16An seu sawmnih pha ding ci-in ansal-ah na pai uh ciangin seu sawm bek na pha a, leenggahzu thawlpi sawmnga pha ding ci-in leenggahzu kholna beelpi ah na pai uh ciangin thawlpi sawmnih dim bek a na pha hi.

17Na an ciin’ khempeuh uh cingteek sakin ka kausansak a, tuate nangawn a susia dingin gialpi ka kiatsak hangin note na kisik nuam kei lai lai uh hi, Topa in ci hi.

18Tu-in, kha kuana a ni sawmnih leh nili ni, biakinn bulpi a kiphuh khit, tu ni-a kipanin lim takin ngaihsun un.

19Na ansal uh ah na upmawh zah sangun an na tawm zaw lai ding ahi hiam? Leenggui leh theikung, mangkawlsing leh oliv kungte, gah nai lo lai ding ahi hiam? Tua bang hi nawn lo ding a, tu ni-a kipanin note thupha kong pia ding hi, ci hi,” a ci hi.

20Tua kha a ni sawmnih leh nili ni mahin Topa in Haggai tungah a nih veina thu gen kik a,

21“Vanpi leh leipi a lokgawp ding ka hihna thu, Judah gam ukpa Zerubbabel kiangah gen in.

22Kumpi gam khempeuh lumletin a vangliatna uh a beisak ding ka hi hi. Leengte leh leeng hawlte ka lawnthal ding a, sakol leengte leh a tung tuangte puk ding uh a, amaute khat leh khat kithat lum ding uh hi.

23Ka nasem Zerubbabel aw, tua ni ciangin nang hong la-in ka min gelhna zungbuhin kong bawl ding hi. Bang hang hiam cih leh nang in ka hong teelpa na hi hi, Vanglianpen Topa in ci hi, ci-in gen in,” a ci hi.

← Chapter 1 Jump to: