Leviticus 1

Chin 1977 (Tedim Bible)

Jump to: Chapter 2 →

1Topa in Moses samin, kikhopna buk panin amah hopih-in hih bangin ci hi.

2“Israel mite tungah gen in la, amaute tungah hih bangin ci in: Note khatpeuh in Topa tungah biakna na paipih uh ciangin, ganhing tawh na biakna pen bawnghon panin hi taleh tuuhon panin hi taleh na paipih ding uh hi.

3“Ama biakna in bawnghon panin meihal biakna ahih leh, amah in a sitbang lo a pa khat pia ding hi; Topa ’ mai-ah a kisan’ theih nadingin kikhopna buk kong-ah pia ding hi;

4amah in meihal biakna ganhing lu tungah a khut nga ding a, a ma adingin kilemna bawl nadingin kisang ding hi.

5Tua ahih ciangin amah in Topa ’ mai-ah a bawngtal go ding hi; Aaron’ suan siampite in a si hong paipihin, kikhopna buk kong-a om biakna tau tung kimkotah a si theh ding hi.

6Tua ciangin amah in meihal biakna ganhing a vun hawk-in semnen ding hi;

7tua ciangin Aaron’ suan siampite in biakna tau tungah mei koihin, mei tungah a ngeina bangin sing koih ding hi;

8tua ciangin Aaron’ suan siampite in a sanente, a lutang leh a thaute, biakna tau tunga om mei tunga sing tungah a ngeina bangin koih ding hi;

9ahih hangin a sungkuate leh a khete tui tawh sil ding hi. Tua ciangin siampipa in mei tawh kihal biakna, Topa adingin a gim namtui, meihal biakna-in biakna tau tungah tuate a vekpi-in hal ding hi.

10“Meihal biak nadingin ama letsong in tuu hita leh keel hita leh a hon lak panin ahih leh, amah in a sitbang lo a pa khat pia ding hi;

11tua ciangin amah in Topa ’ mai biakna tau tung leilu lam pangah go ding a, Aaron’ suan siampite in biakna tau tung kimkotah a si theh ding hi.

12Tua ciangin amah in semnen ding a, biakna tau tunga om mei tunga sing tungah a ngeina bangin siampipa in a lutang leh a thau tawh koihkhawm ding hi;

13ahih hangin a sungkuate leh a khete amah in tui tawh sil ding hi. Siampipa in a vekpi-in pia-in, biakna tau tungah tuate hal ding hi; tua pen Topa adingin a gim namtui, mei tawh kihal biakna, meihal biakpiakna ahi hi.

14“ Topa tungah ama biakna in vasa tawh meihal biakna ahih leh, amah in vakhu tawh ahi zongin kawl vakhuno tawh a hi zongin a biakna hong paipih ding hi.

15Tua ciangin siampipa in biakna tau-ah paipihin a lu heektat ding a, biakna tau tungah hal ding hi; biakna tau pangah a si taakkhia sak ding hi;

16amah in a tangkhai leh a multe botkhia-in, vut koihna, biakna tau pang nisuahna lamah paaikhia ding hi;

17amah in a khate-in balkeek ding a, ahih hangin baltat lo ding hi. Tua ciangin siampipa in mei tunga om sing tung, biakna tau tungah hal ding hi; tua pen Topa adingin a gim namtui, mei tawh biakna, meihal biakna ahi hi.

Jump to: Chapter 2 →