2 Samuel 7

Dagbani Bible (Naawuni Kundi Kasi)

← Chapter 6 Jump to: Chapter 8 →

1Naa Dauda ni daa ʒin’ o yiŋa ka Yawɛ ti o vuhim o dimnim’ bɛn daa gil’ o zaa sani,

2di saha ka naa daa yɛli anab’ Neetan, “Nyama, m bela sida dari yil’ ni, amaa ka Naawuni Daalikauli Adaka ŋɔ dim be suɣili ni.”

3Ka Neetan daa yɛli naa, “Cham’ ti niŋ a ni lo a suhu ni ni a niŋ shɛm, Yawɛ ʒe a nyaaŋa.”

4Amaa dindali maa yuŋ ka Yawɛ daa yɛli Neetan,

5“Cham’ ti yɛli n dabili Dauda ni man’ Yawɛ bɔhir’ o, ‘A yɛn mɛla duu ti ma ka m be di ni?’

6Saha shɛli n ni daa yihi Izraɛlnim’ Ijipti tiŋgbɔŋ ni na la hal ni zuŋɔ n na ʒi m be duu, amaa suɣili ni ka n kul be ka yi mali ma ginda.

7Luɣ’ shɛlikam zaa m mini n niriba Izraɛlnim’ maa ni daa chaŋ, n daa na mi m-bɔhi sariakaritib’ shɛb’ n ni daa pii zali ni bɛ su n niriba Izraɛlnim’ la, ‘Bɔ n-niŋ ka yi bi zaŋ sida dari me duu ti ma?’ ”

8Dinzuɣu pumpɔŋɔ yɛlimi n dabili Dauda ni man’ Yawɛ ŋun nyɛ tɔbbihi zaa naa ŋɔ yɛliya, “Mani n-daa yih’ a mɔɣu ni piɛgulibo ni na ni a ti leegi n niriba Izraɛlnim’ toondana n-su ba.

9Ka a daa yi kul chani luɣ’ shɛlikam, m bela a sani, ka nyaŋ a dimnim’ zaa ti a, ka duh’ a yuli kaman dunia ŋɔ ninvuɣ’ kara yuya ni du shɛm.

10N ni bo biɛhigu shee ti n niriba Izraɛlnima, ka zaŋ ba ʒili nimaani ka bɛ be bɛ dahalali tiŋgbɔŋ ni ka so ku lan dam ba yaha; ka ninvuɣ’ galima ku lan nahim ba kaman bɛ ni daa yi niŋdi ba shɛm

11saha shɛli n ni daa pii zuɣulaannim’ zali ka bɛ su n niriba Izraɛlnim’ maa la. N ni chɛ ka a nya nyee vuhi a dimnim’ zaa sani. M-pahi, man’ Yawɛ lan yɛl’ a ni n ni me yili ti a,

12ka a dabisa yi ti pali ka a dɔni a yaannim’ tooni, n ni piig’ a bihi ni yino ŋun nyɛ a dahalali bia n-chɛ ka o nam nya zaashee zani.

13Ŋuna n-ni ti me yili ti n yuli jilima, ka n ti chɛ ka o nam zani hal ni saha din ka bahigu.

14Mani n-ni ti nyɛ o ba ka o mi nyɛ m bia, ka o yi ti tum taali, n ni zaŋ fiɛbiga fiɛb’ o n-saɣis’ o kaman ninsalinim’ ni saɣisiri bɛ bihi shɛm.

15Amaa n ti ku yihi n suhu o ni kaman n ni daa yihi n suhu Sool ŋun daŋ a tooni la ni shɛm la,

16Biɛhiŋ kani, a daŋ min’ a nam n-kul ni ʒiɛya, n sani ka a nam kul ni ʒiɛya sahakam.’ ”

17Ka Neetan daa yɛli Dauda yɛtɔɣa ŋɔ zaa mini ʒii ŋɔ yɛla zaa kaman di ni nyɛ shɛm.

18Di saha ka Naa Dauda daa kpe nti ʒini Yawɛ tooni ka yɛli, “Yaa n Duuma NAAWUNI, m mi lee nyɛ ŋuni, ka n daŋ lee nyɛ dini, ka a ti zaŋ ma zali zaashee ŋɔ tatabo ni?

19Amaa Yaa n Duuma NAAWUNI, di zaa yoli, a nini na kul bi tiɣi li, Yaa n Duuma NAAWUNI, a lan yɛli man’ a dabili ŋɔ n yili ni ti yɛn be shɛm dahin’ shɛli ha yɛla, ka wuhi ma n zuliya ni ti yɛn be shɛm dahin’ shɛli ha.

20Yaa n Duuma NAAWUNI, bɔ yɛla ka man’ Dauda lee lan yɛn yɛl’ a yaha? Dama a mi man’ a dabili Dauda.

21A daalikauli min’ a suhu yubu zuɣu, ka a tum tuun’ kara ŋɔ zaa ni a chɛ ka man’ ŋun nyɛ a dabili ŋɔ baŋ li.

22Dinzuɣu, Yawɛ ŋun nyɛ Naawuni ŋɔ, nyini n-nyɛ ŋun galisi, dama so kani m-be ka nyini, ka Naawuni so mi lan kani m-pah’ a zuɣu kaman ti ni wum shɛm ti tiba ni.

23Zuliya shɛli lan be dunia ŋɔ ni ŋ-ŋman’ a niriba Izraɛlnima? Bee nyin’ Naawuni na mi n-tiligi zuliya shɛba n-zaŋ ba leeg’ a dahalali niriba, ka tum tuun’ kara din mali dabiɛm bɛ sani? Bee n-kari zuliya shɛb’ mini bɛ buɣa zaa kpɛhi yɔɣu ka chɛ a niriba maa ni di chɛ ka a yuli du?

24Yawɛ, nyini n-daa zaŋ a niriba Izraɛlnim’ leeg’ a dahalali niriba ʒiɛmani kam ni, ka leei bɛ Naawuni.

25“Ka pumpɔŋɔ, Yawɛ ŋun nyɛ Naawuni ŋɔ, chɛ ka a ni daa yɛli yɛtɔɣ’ shɛŋa zaŋ chaŋ a dabili min’ o daŋ polo la niŋ pali ʒiɛmani kam ni, ka niŋ kaman a ni yɛli shɛm maa

26din ni chɛ ka bɛ tibig’ a yuli ʒiɛmani kam ni ka yɛra, ‘Yawɛ ŋun nyɛ Tɔbbihi Naa ŋɔ n-nyɛ Izraɛlnim’ Naawuni,’ ka a chɛ ka mani a dabili Dauda zuliya nya zaashee zani a tooni.

27Dama nyini Yawɛ ŋun nyɛ Tɔbbihi Naa, ka nyɛ Izraɛlnim’ Naawuni ŋɔ n-kahigi dimbɔŋɔ wuhi mani a dabili ŋɔ ka yɛli, ‘N ni me a yili ti a,’ dinzuɣu ka mani ŋun nyɛ a dabili ŋɔ mali suhukpeeni n-suhir’ a suhigu ŋɔ.

28“Ka pumpɔŋɔ, yaa n Duuma NAAWUNI, nyini n-nyɛ Naawuni, ka a yɛligu nyɛ yɛlimaŋli, ka a lo a dabili bin’ suŋ ŋɔ.

29Dinzuɣu pumpɔŋɔ n suhir’ a ni a niŋ alibarika niŋ man’ a dabili ŋɔ daŋ ni din ni chɛ ka n daŋ kul ʒiɛya ʒiɛmani kam ni nyin’ Naawuni sani; dama nyini Yawɛ n-daa yɛli lala, ka a daalibarika kul ni be man’ a dabili ŋɔ daŋ ni ʒiɛmani kam ni.”

← Chapter 6 Jump to: Chapter 8 →