Amos 9

Dagbani Bible (Naawuni Kundi Kasi)

← Chapter 8 Jump to:

1Ka n daa nya ka Yawɛ ʒe sara maligu bimbini gbini ka yɛli, “Ŋmɛm’ duu maa zuɣusaa tanzaa pam hal ka dunoya ti dam. Ŋmɛm’ ŋma li n-chɛ ka di lu niriba zuɣuri ni. N ni chɛ ka bɛ zaŋ takɔbi n-ku ninvuɣ’ shɛb’ bɛn kpalim, ka bɛ so ku tooi guui bee n-zo n-tiligi.

2Hal bɛ yi gbi gbala n-kpe di ni, n ni zaŋ n nuu tim di ni yihi ba na. Ka bɛ yi dula zuɣusaa, n ni siɣisi ba na.

3Hal bɛ yi du Kamɛl Zoli zuɣu nti sɔɣi, n ni bo n-nya ba gbahi ba. Ka bɛ yi zomi kpe teeku ni nti sɔɣi di bulli ni, n ni chɛ ka teeku ni wahu dim ba.

4Ka hal bɛ dimnim’ yi gbahi ba kuli bɛ ya ka bɛ ti nyɛ daba, n ni chɛ ka be zaŋ takɔbi ku ba nimaani. N ni pa n nini lihiri ba n-niŋ ba zaɣ’ biɛɣu, ka pa ni zaɣ’ suŋ.”

5Ti Duuma NAAWUNI ŋun nam binshɛɣukam ŋɔ yi shihi tiŋgbani, di tahirimi bɔɣira, ka bɛnkam be di ni fabinda, ka di kpuɣi zuɣusaa kaman Nail Mɔɣili la, ka lab’ lu kaman Ijipti mɔɣili la.

6Ŋuna ŋun me o dufahira zali zuɣusaa, ka zali di tanzahi dunia ni ŋɔ; ŋuna n-zaŋdi teeku kom n-kpaari li bahiri tiŋgban’ ni na. O yuli m-booni Yawɛ.

7Yawɛ bɔhiya, “Izraɛlnima, yi ŋmanila Itiɔpianima n sani? Pa mani n-daa yihi ya Ijipti tiŋgbɔŋ ni na? Pa mani n-daa yihi Filistianim’ Kafitɔr na, ka daa yihi Aramnim’ Kiri na?

8Mani yi Duuma NAAWUNI kul pala n nini lihiri Izraɛlnim’ bɛn nyɛ alahichinim’ ŋɔ, n ni di bɛ nyɛviya dunia ŋɔ ni. Amaa n ku di Yaakubu daŋ niriba zaa nyɛviya. Man’ Yawɛ n-yɛli lala maa.

9“Dama nyama, n ni zali zaligu, ka dam Izraɛlnim’ bɛn be zuliya kam tinsi ni. M mi yɛn niŋ ba mi kaman bɛ ni yeeni chi shɛm la, hal ka kabiɛl’ yini gba ku lu tiŋa.

10N niriba bɛn zaa nyɛ alahichinima ka yɛra, ‘Zaɣ’ biɛɣu ku niŋ ti shɛli bee m-paai ti la,’ bɛ ni zaŋ takɔbi ku ba.”

11Dindali maa n ni ti lab’ ti Dauda suɣili din daa lu la zali. N ni ti mali di luɣ’ shɛŋa din daa saɣim la zaa, ka ti li zali ka di be kaman di ni daa pun be shɛm la;

12ka di chɛ ka Izraɛlnim’ nyaŋ Ɛdomnim’ tinsi din kpalim la mini tin’ shɛŋa din zaa daa pun nyɛ n tinsi la. Yawɛ ŋun yɛn niŋ dimbɔŋɔ maa n-yɛli lala maa.

13Yawɛ yɛliya, “Dahin shɛli kanna, ka ŋun kɔri ni ti niŋdi yomyom gari ŋun kpuɣiri puu atam, ka ŋun kahindi wain wala kom ni ti niŋdi yomyom gari ŋun biriti li. Wain nyaɣisili ni ti yi zoya zuɣu n-tɔɣiri lurina, ka di ni ti zo n-tiɛli daboya zaa.

14Ka n ni ti zaŋ n niriba Izraɛlnim’ labisi bɛ tiŋgbɔŋ ni na, ka bɛ ti lab’ me tin’ shɛŋa din daa lu n-dahim la m-be di ni. Bɛ ni ti ko tiwala puri ka nyu di wala kom. Bɛ ni ti ko tihi puri ka di di wala.

15N ni zaŋ ba na ti ʒili, ka be tiŋgbɔŋ maa ni, ka so ku lan tooi yihi ba n ni daa zaŋ tiŋgbɔn shɛli ti ba maa ni yaha. Man’ Yawɛ ŋun nyɛ yi Naawuni la n-yɛli lala maa.”

← Chapter 8 Jump to: