Haggai 2

Dagbani Bible (Naawuni Kundi Kasi)

← Chapter 1 Jump to:

1Yuuni maa puuni gol’ so ŋun pahir’ ayopɔin biɛɣ’ pisiniyini dali ka Yawɛ daa zaŋ o yɛligu ti Anabi Hagai na ni o ti yɛl’ ti.

2O daa yɛli Hagai ni o bɔhim’ Shialtiɛl bia Zɛrubabɛl ŋun daa nyɛ Juda gomna la mini Jɛhɔzadak bia Jɔshua ŋun daa nyɛ Maligumaaniba zuɣulana ni niriba bɛn kpalim la,

3“Yi ni ŋuni n-lee kpalim n-nyɛ ŋun nini daa nya n jɛmbu du’ kurili la jilima ni daa be shɛm? Yi ni nya jɛmbu du’ dini ŋɔ maa, wula ka di lee be yi sani? Di pa shɛli di bi ŋmani shɛli.

4Amaa Yawɛ ŋun nyɛ Tɔbbihi Naa ŋɔ yɛliya, ‘Zɛrubabɛl, chɛ ka a suhu kpɛma; Jɛhɔzadak bia Jɔshua ŋun nyɛ Maligumaaniba zuɣulan’ ŋɔ, chɛ ka a suhu kpɛma. Yinim’ bɛn zaa nyɛ tiŋgbɔŋ ŋɔ ni niriba, tummiya tuma maa, m be yi sani.

5Yi ni daa yi Ijipti na saha shɛl’ la ka n daa pun lɔnya alikauli ni n kul ni be yi sani. Di zɔriya dabiɛm.’ ”

6Hagai daa yɛliya ni Yawɛ ŋun nyɛ Tɔbbihi Naa ŋɔ yɛliya, “Di ku yuui ka n dam zuɣusaa mini dunia ni teeku ni tiŋgbani;

7ka dam zuliya kam, ka di zuɣu chɛ ka bɛ daazichi zaa kuli kpe na, ka n chɛ ka duu ŋɔ mali jilima.

8Mani n-su anzinfa mini salima zaa. Man’ Yawɛ ŋun nyɛ Tɔbbihi Naa ŋɔ n-yɛli lala maa.

9Ka jɛmbu du’ palli ŋɔ jilima ni gari jɛmbu du’ kurili la jilima, ka ni chɛ ka suhudoo niŋ kpe; man’ Yawɛ ŋun nyɛ Tɔbbihi Naa ŋɔ n-yɛli lala maa.”

10Naa Darius nam dibu yuma ayi puuni gol’ so ŋun pahir’ awɛi biɛɣ’ pisinaanahi dali ka Yawɛ daa zaŋ o yɛligu ti Anabi Hagai.

11Yawɛ ŋun nyɛ Tɔbbihi Naa ŋɔ daa yɛl’ o mi, “Bɔhim’ maligumaana m-baŋ zaligu ni yɛli shɛm zaŋ chaŋ bɔhigu ŋɔ polo.

12Nir’ yi zaŋ sara maligu nimdi din be kasi n-gur’ o kparibu naŋgbambili n-zaŋ shihi bɔrɔbɔro bee bɛ ni duɣi bindir’ shɛli bee wain bee olivi kpam bee bindirigu balibu kam, di ni chɛ ka lala bindira maa gba leei din be kasi?” Ka Maligumaana maa garigi yɛli, “Aai.”

13Ka Hagai lan bɔh’ o, “Ka nir’ yi shihi kpima, ka kana ti shihi bindira maa, di ni chɛ ka bindira maa leei din pa kasi?” Ka Maligumaana maa garigi yɛli, “Iin.”

14Di saha maa ka Hagai daa yɛli, “Yawɛ yɛliya ni lala n-nyɛ yi zuliya ŋɔ niriba mini bɛ ni zaŋ bɛ nuhi tum shɛlikam; dinzuɣu bɛ ni zaŋ binshɛlikam m-mali sara pa sara maligu bimbini zuɣu nyɛla din pa kasi n sani.”

15“Suhimiya Naawuni, ka tɛhiya din yɛn niŋ ya pumpɔŋɔ zaŋ chani yɛla nya. Yi ni daa na bi piligi Yawɛ jɛmbu duu ŋɔ mɛbu tuma,

16so daa yi chaŋ kawaan’ duli gbini ni o ti va li ka tɛhiri ni di ni paai kilɔgiram kɔbisiyi, o ti nyari ka di niŋdila kilɔgiram kɔbiga kɔŋko; ka so mi daa yi chaŋ wain duɣu ni ni o ti le wain, ka tɛhiri ni di ni paai wain lita kɔbiga, o ti nyari ka di niŋdila wain lita pihinahi kɔŋko.

17Ka n chɛ ka wuntaŋ’ mini maligu ni sakuɣa kanna ti kuri yi ni biri binshɛlikam, amaa ka yi na kul bi bɔri ni yi ŋmaligi lab’ n sanna. Man’ Yawɛ n-yɛli lala maa.

18Zuŋɔ nyɛla gol’ so ŋun pahir’ awɛi biɛɣ’ pisinaanahi, dabisi’ shɛli dali yi ni sɔŋ Yawɛ jɛmbu duu tampuɣili. Kpahimmiya nya din yɛn niŋ pumpɔŋɔ zaŋ chana.

19Hal kawana ni lan kani, ka wain tihi mini fiig tihi ni yɔɣa ni olivi tihi na bi wal’ la zaa yoli, pumpɔŋɔ zaŋ chana, n ni niŋ alibarika niŋ yi ni.”

20Ka Yawɛ daa lan zaŋ o yɛligu ti Hagai m-pahi buyi kulla gol’ yino maa biɛɣ’ pisinaanahi dali n-yɛl’ o,

21“Yɛlim’ Zɛrubabɛl ŋun nyɛ Juda gomna la ni di ku yuui ka n dam zuɣusaa mini dunia,

22ka wurim nam ʒiishɛhi ka chɛ ka di yiko zan’ tariga. N ni lɛb’ chɛchɛbunsi mini bɛn mal’ li chani pili; ka daai wɔribariba mini bɛ yuri luhi; ka bɛ ti zaŋ takɔbiri ku taba.”

23Yawɛ ŋun nyɛ Tɔbbihi Naa ŋɔ yɛliya, “Dindali maa n ni ti zaŋ nyin’ Shialtiɛl bia Zɛrubabɛl ŋun nyɛ n dabili ŋɔ n-zali zaashe’ tital’ ni ka a be kaman n nintu’ shɛli din dihiri gbana la, dama mani m-piig’ a. Man’ Yawɛ ŋun nyɛ Tɔbbihi Naa ŋɔ n-yɛli lala maa.”

← Chapter 1 Jump to: