Hebrews 1

Dagbani Bible (Naawuni Kundi Kasi)

Jump to: Chapter 2 →

1Naawuni daa tɔɣisiri ti yaannim’ yɛtɔɣa la anabinim’ noya ni siɣimsiɣim bu shɛm soya balibu pam ni;

2amaa dabisa din kpalim nyaaŋa ŋɔ puuni, o tɔɣisiri ti yɛtɔɣa la o Bia la nol’ ni. O Bia maa kɔbili ni ka o daa nam dunia ŋɔ, ka zal’ o ni o su binshɛɣukam zaa.

3Naawuni jilima chɛ ka o nyɛlisirimi ka mali Naawuni maŋmaŋ’ biɛhigu, ka nyɛ ŋun zaŋ o yɛligu din mali yiko pam gbib’ binshɛɣukam zaa. O ni daa yihi niriba alahichi ni ka mali ba ka bɛ be kasi la nyaaŋa, ka o daa chaŋ alizanda ni nti ʒini Naawuni ŋun nyɛ Yikozaalana ŋɔ nudirigu polo.

4Naawuni daa zaŋ o Bia maa zali zaashe’ tital’ ni gari malaikanima kaman o ni daa ti o yuli din gari bɛ yuya shɛm la.

5Dama Naawuni daa na ʒi n-yɛl’ o malaikanim’ ni so: “A nyɛla m Bia; zuŋɔ dabisili ŋɔ ka n leeg’ a Ba.” Naawuni mi daa bi yɛli malaika so: “Man’ Naawuni ni leeg’ a Ba, ka a mi leegi m Bia.”

6Naawuni ni daa ti yɛn tim o Bikpɛm’ la dunia ŋɔ ni na o daa yɛlimi: “Naawuni malaikanim’ zaa, jɛmmiy’ o!”

7Ŋ-ŋɔ ka Naawuni daa yɛli zaŋ chaŋ malaikanim’ mi polo: “Naawuni chɛ ka o malaikanim’ be kaman pɔhim; ka chɛ ka o tuumba be kaman buɣim zilima la.”

8Amaa Naawuni ni lan yɛli shɛm zaŋ chaŋ o Bia maa polo m-bɔŋɔ: “A nyɛla Naawuni, a nam ʒiishee kul ni be hal ni saha din ka bahigu! Wuntia jaaŋgbee n-nyɛ din wuhiri ni a nam fukumsi tam la wuntia zuɣu.

9A yuri din tuhi, ka je din bi tuhi; dinzuɣu ka Naawuni ŋun nyɛ a Naawuni ŋɔ daa piig’ a, ka ti a jilima pam din tiri suhupiɛlli gar’ o ni ti a tab’ shɛm la.”

10Naawuni lan yɛli yaha: “A nyɛla Duuma ŋun daa nam dunia ŋɔ piligu ni, ka zuɣusaa mi nyɛ a nuhi ni tum tuun’ shɛli.

11Dimbɔŋɔnim’ zaa ni ti vuui, amaa nyin’ kul ni kpalim be; di zaa ni kurigi kaman situra ni kurigiri shɛm la.

12A ni kpab’ li kaman biŋŋmaa la, ka di ni taɣi m-be kaman situra la; amaa nyin’ kul ku taɣi, ka a mi kul ku kurigi.”

13Naawuni daa na ʒi n-yɛl’ o malaikanim’ ni so: “Ʒinimi n nudirigu polo hal ka n ti chɛ ka a dimnim’ leeg’ a napɔntamdigu.”

14Dinzuɣu malaikanim’ lee nyɛla bɔ? Bɛ nyɛla shihi bɛn jɛmdi Naawuni, ka lan nyɛ o ni timdi shɛb’ ka bɛ ti sɔŋdi ninvuɣ’ shɛb’ bɛn yɛn nyari tiliginsim.

Jump to: Chapter 2 →