James 5

Dagbani Bible (Naawuni Kundi Kasi)

← Chapter 4 Jump to:

1Wummiya, yinim’ bɛn nyɛ azichilaannim’ la, kummiya ka fabilimiya nandahima din yɛn paai ya la zuɣu.

2Yi daazichi pooya, ka lɛla ŋubi saɣim yi situra.

3Yi salima mini yi daanzinfa zahimya ka di zahimbu maa din ya shɛhira biɛɣu, ka ni di yi niŋgbuna kaman buɣim ni diri binyara shɛm la. Yi kahi azichi guli dabisa din bahindi nyaaŋa ŋɔ puuni.

4Nyamiya, ninvuɣ’ shɛb’ bɛn kpuɣi yi puri atam tin ya la, yi di ba zalinsi n-zaɣisi ba yɔbu. Wummiya bɛ fabila! Tumtumdiba maa kuhigu chaŋ ti lu ti Duuma Zallakudura Naa tibili ni.

5Yi dunia ŋɔ ni bebu puuni, yi mali yi suhu ni bɔri binshɛɣukam ka diri nyaɣisim pam. Yi dihi yimaŋa ŋ-ŋmɛlim kaman biŋkɔbiri bɛn ʒe n-guli bɛ kɔrigibu dali.

6Yi daa zaŋ wuntizɔra taali n-ku o, amaa o bi zaɣisi ya.

7Dinzuɣu m mabihi, maliya suɣilo hal ti paai ti Duuma labbuna saha. Kpahimmiya pukpara ni diri suɣilo n-guhir’ o puu atam din mali buchi hal ka saa ŋun daŋ tooni mini ŋun bahindi nyaaŋa gba ti mi la.

8Yinim’ gba maliya suɣilo lala; ka kul maliya suhukpeeni, dama ti Duuma labbuna miriya.

9M mabihi, di maliya yɛtɔɣ’ bihibihi ni yi taba, ka di zuɣu chɛ ka Naawuni ti kari ya saria. Nyamiya, sariakarita maa ʒiɛla dunoli ni.

10M mabihi, doliya anabinim’ bɛn daa zaŋ ti Duuma yuli tɔɣis’ anabitali yɛtɔɣa la naba yi suɣilɔdibo din yuuri yi wahala dibu puuni la.

11Nyamiya, bɛ ni daa niŋ ania la zuɣu, ti booni ba la bɛn mal’ alibarika. Yi pun wum Ayuba ania niŋbu yɛla, ka nya ti Duuma daliri ni daa nyɛ shɛm di puuni, ka lan nya ti Duuma nambɔzɔbo zaŋ chaŋ o polo min’ o baɣa ni daa be o ni shɛm.

12Amaa m mabihi, din gari shɛlikam zaa nyɛla: Miriya ka yi po alizanda bee dunia ŋɔ bee m-po pɔ’ shɛli pahi. Chɛliya ka yi “Iin” kul nyɛla “Iin”, ka yi “Aai” mi kul nyɛla “Aai”, ka di chɛ ka yi ku kpe taali ni.

13So be yi ni n-nyari wahala? O suhimi Naawuni. So be yi ni m-mali suhupiɛlli? O yilimi yila paɣi Naawuni.

14So be yi ni m-biɛra? O bolimi cheechi toondaannima, ka bɛ ti zaŋ kpam ʒe o ti Duuma yuli zuɣu ka suhi Naawuni ti o.

15Ka yɛda niŋbu wunsuhigu ni tiligi bara maa, ka ti Duuma ni yiɣis’ o; ka o yi tumla alahichi gba, o ni nya di chɛ m-paŋ.

16Dinzuɣu kahigimiya yi daalahichi wuhimi taba, ka suhimiya Naawuni tiri taba, ka di chɛ ka yi nya alaafee. Wuntizɔra nimmoo wunsuhigu mali yiko pam di tuma puuni.

17Anabi Ilaija daa nyɛla ninsala kaman ti ni be shɛm ŋɔ, ka o daa ti suhi Naawuni ni o suhu zaa ni saa di mi, ka saa maa daa shiri bi tɔɣisi lu tiŋgbani zuɣu yuun’ muna ata ni pirigili.

18Ka o daa ti lan suhi Naawuni, ka sagbana kpaai kom bahina, ka tiŋgbani zuɣu bimbila lan niŋdi bindira yaha.

19M mabihi, yi ni so yi ti birigi ka chɛ yɛlimaŋli la, ka so ŋmalig’ o labisi di ni,

20dilan’ ŋun’ baŋmi ni ŋunkam ŋmaligi alahichilana o biriginsim sol’ ni n-labisi zali yɛlimaŋli sol’ ni ni tiligi alahichilan’ maa kum ni, ka chɛ ka alahichi pam nya chɛ m-paŋ.

← Chapter 4 Jump to: