Jude 1

Dagbani Bible (Naawuni Kundi Kasi)

Jump to:

1Man’ Jud ŋun nyɛ Yisa Masia dabili ni Jeemsi mabia la n-sabiri gbaŋ ŋɔ tiri ninvuɣ’ shɛb’ Naawuni ni boli ka bɛ nyɛ ŋun’ ti Ba Naawuni ni yuri shɛba, ka lan nyɛ Yisa Masia ni gbib’ shɛb’ la:

2Naawuni zomi ya nambɔɣu, ka tin ya suhudoo mini yurilim din kul zoori pahira!

3M mabiyurisi, n daa pun lo nia ni n sabi gbaŋ tin ya zaŋ chaŋ m mini ya zaa ni nya tiliginsim shɛl’ la yɛla polo, ka lan kpahim nya ka di niŋ kamaata ni n chɛ dimbala maa yɛla, ka sab’ dimbɔŋɔ n-kpam ya jaande ni yi momiya viɛnyɛliŋga ba n-zani ti daadiini so’ shɛli Naawuni ni daa zali ti Yisa nyaandoliba la ni.

4Dama karimba ʒirinim’ bɛn bi luri Naawuni sizuura sɔɣi kpe ti ni. Bɛ nyɛla bɛn taɣi ti Naawuni daanfaani yɛla ni bɛ doli bɛmaŋmaŋ’ niŋgbuŋ kɔr’ biɛri soya, ka chihi Yisa Masia ŋun kɔŋko nyɛ Yikolana ni ti Duuma la. Anabitali yɛtɔɣa pun wuhi bɛ ni yɛn bahi yoli shɛm yɛla ka di wɔɣa.

5Yi ni pun mi dimbɔŋɔ yɛla zaa la yoli, m bɔri ni n teei ya ni Naawuni ŋun daa tiligi Izraɛlnima n-yihi ba Ijipti tiŋgbɔŋ ni la, di nyaaŋa o daa ti bahi bɛ ni bɛn daa bi niŋ yɛda la yoli.

6Ka malaikanim’ bɛn daa bi kpalim ʒe bɛ zaashee, ka daa chɛ bɛ biɛhigu shee la, Naawuni zaŋ saha din ka bahigu zoligɔnim’ lo ba zali luɣ’ shɛli din nyɛ bumbɔni shee gu saria karibu dali din nyɛ dabisi’ titali dal’ la.

7Di bemi kaman Sɔdom mini Gomɔra ni tin’ shɛŋa din kɔɣili li niriba ni daa tumdi niŋgbuŋ kɔr’ biɛri tuma, ka kul tumdi din chihiri la: Naawuni daa chɛ ka saha din ka bahigu buɣim bahi ba yoli, ka di leei din kpahiri sokam zaa zuɣu ni.

8Lala ka niriba ŋɔ zahindi zahima, ka di chɛ ka bɛ tumdi niŋgbuŋ kɔr’ biɛri tuma ka ʒiɛm Naawuni fukumsi subu, ka turi bɛn mali jilima be alizanda ni la.

9Hal malaikanim’ zuɣulana Maikil mini Sintani ni daa mali taba Anabi Musa niŋgbuŋ zuɣu la, o daa bi saɣi tu Sintani; o daa naɣ’ yɛlimi, “Ti Duuma ni bɔh’ a!”

10Amaa niriba ŋɔ bɛn’ turila binshɛŋa bɛ ni bi mi; ka binshɛŋa bɛ ni baŋ kaman biŋkɔbiri ni baŋdi shɛm mi nyɛla din bahiri ba yoli.

11Mbusim be bɛ zuɣu! Bɛ dolila Keen biɛhigu soli. Liɣiri zuɣu ka bɛ doli Balaam biriginsim sol’ la. Bɛ nyɛla bɛn taai duŋ kaman Kɔra ni daa taai duŋ shɛm la; bɛ ni bahi yoli kaman o ni daa bahi yoli shɛm.

12Bɛ nyɛla daɣirinima, ka bɛ yi laɣim yi ni yi bindirigu dibu laɣiŋgu ni, bɛ tumdila vi tuma bɛ dibu mini bɛ nyubu puuni; bɛ nyɛla ninvuɣ shɛb’ bɛn kul tɛhirila bɛmaŋmaŋ’ kɔŋko yɛla. Bɛ ŋmanila sagban’ kuun’ shɛŋa sanʒiɛɣu ni ʒiɛri chana; ka ŋmani ti’ shɛŋa din ka wala di walibu saha; bɛ lan ŋmanila ti’ shɛŋa bɛ ni vuɣi bahi ka di kpi zaa.

13Bɛ ŋmanila teeku kɔgbana din laŋsiri ginda, ka bɛ vi tuma ŋmanila kɔfuɣifuɣi. Bɛ lan ŋmanila saŋmar’ shɛb’ bɛn chani ginda. Naawuni pun mali biɛhigu shee zali ba bumbɔn’ ni.

14Inok ŋun daa nyɛ ʒiɛmani din pah’ ayopɔin din daa doli Adam saha nyaaŋa la nir’ la daa pun tɔɣisi anabitali yɛtɔɣa zaŋ chaŋ niriba ŋɔ polo. O ni daa yɛli shɛm m-bɔŋɔ: “Nyamiya! Ti Duuma min’ o malaikanim’ tusatusa shɛm bɛn be kasi kanna

15ni o ti kari sokam zaa saria, ka nya bɛnkam zaa bi luri Naawuni sizuura la taali, ka di nyɛla bɛ ni tumdi tuun’ biɛ’ shɛŋa mini bɛna bɛn nyɛ alahichinim’ maa ni tɔɣisi yɛtɔɣ’ biɛ’ shɛŋa dalim ŋun’ Naawuni la zuɣu!”

16Niriba ŋɔ nyɛla bɛn kul ŋumdi bɛ kparima ni ka galindi niriba. Bɛ dolila bɛmaŋmaŋ’ kɔr’ biɛri soli, ka nyuri bara zaŋ chaŋ bɛmaŋmaŋ’ biɛhigu polo, ka zaŋ naŋgban’ malisim yɛtɔɣa ni be di niriba zuɣu nyɔri.

17Amaa m mabiyurisi, di niŋ kamaata ni yi teei ti Duuma Yisa Masia tuumba ni daa tɔɣisi ya yɛtɔɣ’ shɛŋa zal’ la yɛla.

18Bɛ daa yɛli ya, “Ʒiɛmani din bahindi nyaaŋa puuni ansarisimaaniba bɛn maani yi ni niŋ shɛli yɛda ansarisi, ka doli bɛmaŋmaŋ’ niŋgbuŋ kɔr’ biɛri soli ni ti beni.”

19Bɛ nyɛla ninvuɣ’ shɛb’ bɛn tahiri woligibu na, ka nyɛ bɛn maŋmaŋ’ nama biɛhigu yubu su ba, ka Naawuni Shia ka bɛ ni.

20M mabiyurisi, zaŋmiya yi daadiini wuhibu din be kasi la kpaŋsiri yimaŋa, ka kul suhimiya Naawuni Shia Kasi yiko ni.

21Kul kpalimmiya be Naawuni yurilim la puuni, ka guhimiya saha shɛli ti Duuma Yisa Masia ni ti yɛn chɛ ka yi nya nyɛvili din ka bahigu o nambɔzɔbo zuɣu la.

22Kpaŋsimiya ninvuɣ’ shɛb’ bɛn mali biɛhiŋ la suhuri;

23ka tiligi shɛba kaman buɣim ni ka yi tim yihi ba la. Ka chɛliya ka shɛb’ mi yɛla niŋ ya nambɔɣu ni dabiɛm; ka leeya bɛn je bɛ binyɛr’ taɣilima din be tiŋli ka bɛ niŋgbuŋ kɔre gabisi li la.

24Naawuni ŋun ni tooi gbibi ya ka yi ku lu, ka ni zaŋ ya tah’ omaŋmaŋ’ tooni din mali jilima shee ni suhupiɛlli, ka yi ku mali taali la

25n-nyɛ ŋun kɔŋko nyɛ ti Naawuni ni ti Tiligira ti Duuma Yisa Masia zuɣu. Ŋuna n-simdi tibigibu mini nam jilima ni yiko ni fukumsi subu, dunia ŋɔ ni daa na bi nam saha shɛl’ la mini pumpɔŋɔ zaŋ hal ni saha din ka bahigu! Ami!

Jump to: