Mark 10

Dagbani Bible (Naawuni Kundi Kasi)

← Chapter 9 Jump to: Chapter 11 →

1Ka Yisa daa yiɣisi ni chaŋ Judia tiŋgbɔŋ ni mini Jɔɔdɛn mɔɣili duli ha yaha; ka salo pam daa laɣim o sanna ka o ti gbaai ba wuhibu kaman o ni daa yi pun niŋdi shɛm.

2Ka Farisiinim’ daa ka o sanna nti bɔri ni bɛ zahim o ka bɔh’ o, “Di luhiya ni nir’ yih’ o paɣa?”

3Ka o bɔhi ba, “Zaligu dini ka Anabi Musa daa lee zali ya?”

4Ka bɛ yɛl’ o, “Anabi Musa daa chɛ ka doo sabirila amiliya lɔrigibu gbaŋ pɔi ka naanyi yih’ o paɣa.”

5Ka Yisa yɛli ba, “Yi halibiɛri zuɣu ka Anabi Musa daa zali ya lala.

6Amaa di sabiya ni ninsalinim’ nambu piligu ni, Naawuni daa nam ba la doo mini paɣa.”

7Ka di lan sabi yɛli, “Daliri ŋɔ zuɣu ka doo ŋmaligir’ o ba min’ o ma sani n-zaŋd’ omaŋ’ tabind’ o paɣa,

8ka bɛ niriba ayi maa be kaman ninvuɣ’ yino la. Lala zuɣu n yɛri ya mi, bɛ lan pala niriba ayi yaha.

9Dinzuɣu Naawuni ni laɣim shɛba, sal’ ŋun’ miri ka o woligi ba.”

10Yisa min’ o nyaandoliba ni daa ti lab’ bɛ yilikpɛrili na ka bɛ bɔh’ o yɛtɔɣ’ yini maa gbinni yaha.

11Ka o yɛli ba, “Ŋunkam yih’ o paɣa ka kpuɣi paɣ’ so tum zina o ni yihi paɣ’ so maa sani.

12Ka paɣ’ mi yi yi o yidan’ yiŋ’ kuli do’ so, o gba tum zina.”

13Ninvuɣ’ shɛb’ daa ti zaŋ bihi ka Yisa sanna ni o ti zaŋ o nuu pa bɛ zuɣu; ka o nyaandoliba daa tahiri bihinim’ maa zuɣu.

14Amaa Yisa ni daa nya lala maa ka di ku o suli, ka o yɛl’ o nyaandoliba maa, “Chɛliya ka bihi kam’ n sanna, ka di karitiya ba, dama Naawuni nam nyɛla bɛ tatabo dini.

15Yɛlimaŋli ka n yɛri ya, ŋunkam bi deei Naawuni nam kaman bia ni deeri li shɛm ti ku kpe di ni.”

16Ka o daa kpuɣiri bihi maa buɣira, ka zaŋd’ o nuhi pari bɛ zuɣu niŋdi alibarika niŋdi bɛ ni.

17Ka Yisa daa yiɣisi gbaai chandi yaha, ka do’ so daa zɔna ti damd’ o tooni m-bɔh’ o, “Karimba suŋ, wula ka n lee yɛn niŋ ti nya nyɛvili din ka bahigu?”

18Ka Yisa bɔh’ o, “Bɔ n-niŋ ka a boli ma ninvuɣ’ suŋ? Ninvuɣ’ suŋ kani n-naɣ’ pahila Naawuni.

19Amaŋmaŋ’ mi din be Naawuni fukumsi zaligunim’ puuni. Dina n-nyɛ: ‘Miri ka a ku ninsala; miri ka a niŋ zina; miri ka a zu; miri ka a di shɛhira kpɛma; miri ka a di zalinsi; ka tim’ a ba min’ a ma jilima.’ ”

20Ka o yɛl’ o, “Karimba, m pun dolila dimbɔŋɔnim’ zaa m bilim ni hal ni wayo.”

21Ka Yisa lih’ o yurilim lihigu ka yɛl’ o, “Yɛl’ yini n-naɣ’ poog’ a: Cham’ ti kɔhi a ni mali shɛlikam zaa zaŋ ti nandaamba, ka kana ti doli ma, ka di chɛ ka a ti nya buni alizanda ni.”

22Ka yɛtɔɣili ŋɔ daa saɣim o suhu pam ka o kuli ni suhugarigu, dama o daa nyɛla bundana.

23Di saha ka Yisa daa ŋmaligi yul’ o nyaandoliba maa ti tuui taba ka yɛli ba, “Di to ni bundaannim’ kpe Naawuni nam ni!”

24Ka o yɛtɔɣili maa daa gar’ o nyaandoliba maa pam. Ka o lan yɛli ba, “M bihi, nyamiya Naawuni nam ni kpɛbu ni to shɛm bɛn niŋ dunia ŋɔ daazichi naani sani!

25Hal laakum shɛriga nyee ni kpɛbu mal’ asama gari bundan’ Naawuni nam ni kpɛbu.”

26Ka di gari ba pam ka bɛ bɔhi taba, “Ka ŋuni n-lee ni tooi tiligi?”

27Ka Yisa yuli ba ka yɛli ba, “Ninsalinim’ sani ka dimbɔŋɔ ku tooi nani, amaa pa ni Naawuni sani; dama Naawuni ŋun’ sani binshɛɣukam nandimi.

28Di saha ka Pita yɛl’ o, “Nyama, ti chɛla binshɛɣukam ka dol’ a.”

29Ka Yisa yɛl’ o, “Yɛlimaŋli ka n yɛri ya, ŋunkam chɛ o yili bee o mabi’ dɔbba bee o tizɔpaɣiba bee o ba bee o ma bee o bihi bee o puri, n mini n lahibal’ suŋ ŋɔ zuɣu

30ni nya dimbɔŋɔnim’ zaa ha bukɔbigakɔbiga dunia ŋɔ ni. O ni nya yiya mini mabi’ dɔbba ni tizɔpaɣiba ni banima ni manima ni bihi ni puri m-pahi muɣisigu, ka ti lan nya nyɛvili din ka bahigu dunia shɛli din kanna ni.

31Amaa niriba pam bɛn daŋ tooni ni ti leei nyaannima, ka bɛn be nyaaŋa mi ti leei toonnima.”

32Yisa daa ti be o nyaandoliba tooni ka bɛ yi soli chani Jɛrusalɛm, ka di gar’ o nyaandoliba maa pam; ka dabiɛm daa kpe bɛn zaa dol’ o maa. Ka o lan zaŋ bɛ pinaayi maa yi kpaŋa nti piligi wuhiri ba yɛl’ shɛŋa din ti yɛn niŋ o

33yɛra, “Nyamiya, ti chanila Jɛrusalɛm, ka bɛ ni ti zaŋ Daadam Bia niŋ maligumaaniba mini Naawuni zaligubaŋdib’ nuu ni, ka bɛ ni ti di o saria yɛli ni bɛ kum’ o, ka zaŋ o ti bɛn pa Yɛhudianima.

34Ka bɛ ti mal’ o ansarisi ka fiɛb’ o, ka tuhi nintɔri vie o ka naanyi ku o; amaa di daba ata dali o ni ti neei kum ni.”

35Ka Jeemsi mini Jɔn, Zɛbidii bihi la, daa ka Yisa sanna ti yɛl’ o, “Karimba, ti di bɔri ni a niŋ ti la ti ni bɔri shɛm ŋɔ.”

36Ka o bɔhi ba, “Bɔ ka yi lee bɔri ni n niŋ tin ya?”

37Ka bɛ yɛl’ o, “Chɛ ka ti ni yino ti ʒin’ a nudirigu polo, ka yino mi ʒin’ a nuzaa polo a nam ʒiishee.”

38Ka Yisa yɛli ba, “Yi ʒi yi ni suhiri shɛli maa. Yi ni ti tooi nyu binnyur’ shɛli din be m pipia la ni ka n yɛn nyu la? Ka tooi deei baptaizibu shɛli bɛ ni ti yɛn baptaizi ma la?”

39Ka bɛ yɛl’ o, “Ti ni tooi.” Ka Yisa yɛli ba, “Yɛlimaŋli, yi ni ti nyu binnyur’ shɛli din be m pipia maa ni, ka ti deei baptaizibu shɛli bɛ ni ti yɛn baptaizi ma maa;

40amaa n nudirigu mini n nuzaa polo ʒinibu maa, din’ pala man’ tibu, amaa Naawuni ni mal’ li zali ninvuɣ’ shɛba n-ni ti ʒin’ nimaani.”

41Ka o nyaandoliba pia la daa wum lala ka je suli niŋ Jeemsi mini Jɔn.

42Ka Yisa daa boli ba na nti yɛli ba, “Yi mi ni zuliya kam zuɣulaannim’ kuuni bɛ nam, ka wɔɣira mi wuhiri tarimba bɛ kpiɔŋ ni nyɛ shɛm;

43amaa di ku niŋ lala yinim’ sani. Dinzuɣu ŋun bɔri ni o nyɛ wɔɣirili yi ni, ŋun’ zaŋm’ omaŋ’ lee yi zaa ha bia;

44ka ŋun mi bɔri ni o gari yi zaa, ŋun’ zaŋm’ omaŋ’ lee yi zaa ha dabili.

45Dama Daadam Bia gba bi kamina ni o ti ʒiya ka niriba tumdi tir’ o; amaa ni ŋun’ lee ti tumdi tiri ba, ka zaŋ o nyɛvili pa talima niriba pam nyɛviya zuɣu.”

46Yisa min’ o nyaandoliba daa ti paai Jɛriko, ka bɛ mini salo pam daa ti yiri Jɛriko maa, ka Timius bia Baatimius ŋun daa nyɛ zoma, ka nyɛ barimaana ʒi sokpaŋa.

47O ni daa ti wum ni Yisa Nazarɛt nira n-gariti maa ka o dii gbaai kuhiri yɛra, “Yisa, nyin’ ŋun nyɛ Naa Dauda yaaŋa ŋɔ, zom’ ma nambɔɣu!”

48Ka niriba pam tah’ o zuɣu ni o foma; amaa ka o maan kuhi pam yɛli, “Nyin’ ŋun nyɛ Naa Dauda yaaŋa ŋɔ, zom’ ma nambɔɣu!”

49Ka Yisa daa kpalim zani, ka yɛli ni bɛ bolim’ o na. Ka bɛ daa bol’ zom’ maa ka yɛl’ o, “Chɛ ka a suhu kpɛma! Yiɣisima, o boon’ a.”

50Ka o pirig’ o chinchini sɔŋ, ka vaai yiɣisi chaŋ Yisa sani.

51Ka Yisa ti bɔh’ o, “Bɔ ka a lee bɔri ni n niŋ ti a?” Ka zom’ maa yɛl’ o, “Karimba, m bɔri ni a neela n nina ŋɔ ti ma.

52Ka Yisa yɛl’ o, “To, cham’ a chandi! A yɛda niŋbu n-neeg’ a nina maa.” Ka o nina maa daa dii neei, ka o doli Yisa chana.

← Chapter 9 Jump to: Chapter 11 →