Nehemiah 12

Dagbani Bible (Naawuni Kundi Kasi)

← Chapter 11 Jump to: Chapter 13 →

1Bɛmbɔŋɔ n-nyɛ maligumaaniba mini Lɛvinim’ bɛn daa doli Shialtiɛl bia Zɛrubabɛl mini Jɛshua kulina la: Sɛraya mini Jɛrimia ni Ɛzra

2ni Amaria ni Maluk ni Hatush

3ni Shɛkania ni Rɛhum ni Mɛrɛmɔt

4ni Iddo ni Ginnɛtɔi ni Abija

5ni Mijamin ni Maadia ni Biliga

6ni Shɛmaya ni Joyarib ni Jɛdaya

7ni Sallu ni Amok ni Hilikia ni Jɛdaya so mi. Bɛmbɔŋɔ n-daa nyɛ maligumaaniba zuɣulaannim’ mini bɛ taba Jɛshua saha la.

8Lɛvinima: Jɛshua mini Binnui ni Kadimiɛl ni Shɛrɛbia ni Juda ni Matania ŋun min’ o tab’ daa su wumpaɣibo yila yilibu fukumsi la.

9Bakibukia mini Unno n-daa nyɛ bɛ tab’ bɛn ʒe n-tuhi ba laɣiŋgu maa ni.

10Jɛshua daa nyɛla Joyakim ba; ka Joyakim nyɛ Ɛliashib ba, ka Ɛliashib nyɛ Joyada ba;

11ka Joyada nyɛ Jɔnatan ba; ka Jɔnatan mi nyɛ Jadua ba.

12Joyakim saha la, maligumaaniba dunoya dɔɣirikpamba n-daa bɔŋɔ: Mɛraya n-daa nyɛ Sɛraya daŋ ni dɔɣirikpɛma; ka Hanania daa nyɛ Jɛrimia daŋ ni dɔɣirikpɛma;

13ka Mɛshulam daa nyɛ Ɛzra daŋ ni dɔɣirikpɛma; ka Jɛhɔhanan daa nyɛ Amaria daŋ ni dɔɣirikpɛma;

14ka Jɔnatan daa nyɛ Maluki daŋ ni dɔɣirikpɛma, ka Yisifu daa nyɛ Shɛbania daŋ ni dɔɣirikpɛma;

15ka Adina daa nyɛ Harim daŋ ni dɔɣirikpɛma, ka Hɛlikai daa nyɛ Mɛrayɔt daŋ ni dɔɣirikpɛma;

16ka Zakaria daa nyɛ Iddo daŋ ni dɔɣirikpɛma; ka Mɛshulam so mi daa nyɛ Ginnɛtɔn daŋ ni dɔɣirikpɛma;

17ka Zikiri daa nyɛ Abija daŋ ni dɔɣirikpɛma; ka Pilitai daa nyɛ Miniamin mini Mɔadia daŋ ni dɔɣirikpɛma;

18ka Shammua daa nyɛ Biliga daŋ ni dɔɣirikpɛma, ka Jɛhɔnatan so mi daa nyɛ Shɛmaya daŋ ni dɔɣirikpɛma;

19ka Matɛnai daa nyɛ Joyarib daŋ ni dɔɣirikpɛma, ka Uzi daa nyɛ Jɛdaya daŋ ni dɔɣirikpɛma;

20ka Kallai daa nyɛ Sallai daŋ ni dɔɣirikpɛma; ka Ɛba daa nyɛ Amok daŋ ni dɔɣirikpɛma;

21ka Hashabia daa nyɛ Hilikia daŋ ni dɔɣirikpɛma; ka Nɛtanɛl mi daa nyɛ Jɛdaya so mi daŋ ni dɔɣirikpɛma.

22Ɛliashib mini Joyada ni Jɔhanan ni Jadua saha la, bɛ daa sab’ Lɛvinim’ dɔɣirikpamba mini maligumaaniba yɛla hal ti paai Pɛriʒia Naa Darius ʒiɛman’ ni.

23Bɛ daa lan sab’ Lɛvinim’ dɔɣirikpamba yɛla n-niŋ nanim’ yɛlikura litaafinim’ ni hal ti paai Ɛliashib bia Jɔhanan saha la.

24Lɛvinim’ zuɣulaannima n-daa nyɛ: Hashabia mini Shɛrɛbia ni Kadimiɛl bia Jɛshua mini bɛ taba bɛn daa ʒe n-tuhi ba n-yiini wumpaɣibo yila ka puhiri Naawuni kaman Dauda ŋun daa nyɛ Naawuni nir’ la ni daa wuhi ba shɛm.

25Ka Matania mini Bakibukia ni Obadia ni Mɛshulam ni Talimɔn ni Akub bɛn nyɛ dunɔguliba la daa ʒe n-guli nɛma du’ shɛŋa din daa be dunɔdaya shee la.

26Bɛmbɔŋɔ n-daa beni Jɔshua bia Joyakim ŋun daa nyɛ Jɔzadak yaaŋa la saha mini Nɛhimia ŋun daa nyɛ gomna la mini Ɛzra ŋun daa nyɛ maligumaana ni zaligubaŋda la gba saha.

27Bɛ ni daa yɛn zaŋ Jɛrusalɛm gooni la ti Naawuni saha shɛli, bɛ daa chaŋla luɣ’ shɛlikam Lɛvinim’ ni be nti zaŋ ba ka Jɛrusalɛm na ni bɛ ti puhi gooni maa zaŋ ti Naawuni chuɣu ka yili wumpaɣibo yila, ka chaɣisi chaɣisa, ka ŋme mɔɣilɔnim’ mini goonjɛnima ni suhupiɛlli.

28Ka yiliyiiniba laɣiŋgunim’ daa laɣim yi luɣ’ shɛŋa din gili Jɛrusalɛm mini Nɛtɔfa tiŋkpansi

29ni Bɛtigiligal ni Gɛba ni Azimavɛt polo na, dama yiliyiiniba maa daa mɛla bɛ tiŋkpansi gili Jɛrusalɛm.

30Ka maligumaaniba mini Lɛvinim’ maa daa mali bɛmaŋ’ kasi, ka mali niriba maa ka bɛ niŋ kasi; ka lan mali dunɔdaya mini gooni maa ka di gba niŋ kasi.

31Ka n daa laɣim Juda zuɣulaannima n-zaŋ ba du n-tam gooni maa zuɣu m-pirigi ba gbilligbilli ʒii buyi n-chɛ ka bɛ chani gindi gooni maa zuɣu m-paɣiri Naawuni. Bɛn daŋ tooni daa zaŋ kpala gooni maa zuɣu nudirigu polo n-zaŋ doli Saɣiri Dunɔdal’ la polo.

32Ka Hɔshaya mini Juda zuɣulaannim’ pirigili daa pa bɛ zuɣu.

33Ka Azaria mini Ɛzra ni Mɛshulam

34ni Juda ni Bɛnjamin ni Shɛmaya ni Jɛrimia

35bɛn nyɛ maligumaaniba shɛb’ bɛn daa gbibi kikahi la daa pa bɛ zuɣu. Ka Jɔnatan bia Zakaria ŋun daa nyɛ Shɛmaya yaaŋa la pa bɛ zuɣu. (O yaannim’ shɛba n-nyɛ Matania mini Mikaya ni Zakur bɛn daa nyɛ Asaf daŋ ni niriba la.)

36Ka o mabihi bɛn nyɛ Shɛmaya mini Azarɛl ni Milalai ni Gilalai ni Maai ni Nɛtanɛl ni Juda ni Hanani daa pa bɛ zuɣu. Bɛ zaa daa gbibila Naa Dauda ŋun daa nyɛ Naawuni nir’ la ni daa ŋmɛri biŋkumdi shɛŋa la. Ka Ɛzra ŋun daa nyɛ zaligubaŋda la daa be bɛ tooni.

37Kɔbilinini Dunɔdali din daa be bɛ tooni la gbini ka bɛ daa yi n-chaŋ ti du Naa Dauda Tiŋ’ la dunɔdura din be gooni din be Dauda yiŋ’ zuɣusaa polo la gbini m-mali ti paai Kom Dunɔdali din daa be wulimpuhili polo la gbini.

38Ka niriba bɛn daa paɣiri Naawuni la pirigibu bɛn pahi buyi daa zaŋ kpa gooni maa zuɣu nuzaa polo, ka m mi zaŋ bɛ pirigili n-doli bɛ nyaaŋa gooni maa zuɣu Kpimkpimbihi Pia zuɣusaa polo m-mali hal ti paai Goon’ Yɛlinli la shee

39ni Ifriim Dunɔdal’ la zuɣusaa ni Dunɔdal’ Kurili la gbini ni Zahim Dunɔdali ni Hananɛl Pia ni Kɔbiga Pia la gbini m-mali hal ti paai Piɛri Dunɔdal’ la gbini, ka bɛ daa kana ti zani Guliba Dunɔdal’ la gbini.

40Ka bɛ niriba pirigibu balibu buyi bɛn daa paɣiri Naawuni maa zaa daa mali hal ti kpe Naawuni jɛmbu duu maa ni. Ka zuɣulaannim’ pirigili daa be n sani

41m-pahi maligumaaniba, Ɛliakim mini Maasɛya ni Miniamin ni Mikaya ni Ɛliɔnai ni Zakaria ni Hanania bɛn daa piɛbiri kikahi la

42ni Maasɛya so mi mini Shɛmaya ni Ɛliɛza ni Uzi ni Jɛhɔhanan ni Malikija ni Ɛlam ni Ɛzɛr. Ka Jɛzirahia daa gari tooni zaŋ yiliyiiniba ka bɛ yili yila.

43Bɛ daa mali sara maligu pam dindali maa, ka niriba maa suhuri paligi pam, dama Naawuni n-daa chɛ ka bɛ mali suhupiɛlli maa. Ka paɣiba mini bihi gba daa mali suhupiɛlli. Katiŋnim’ daa wum Jɛrusalɛmnim’ suhupiɛlli maa damli.

44Ka bɛ daa pii ninvuɣ’ shɛba dindali maa zali ni bɛ su du’ shɛŋa din daa nyɛ nɛma niŋbu shee fukumsi, ka bɛ daa laɣindi tɔto nɛma mini tiwala din daŋ moobu ni bini pia kam puuni zaɣ’ yiniyini din nyɛ tarili din yiri fɔntinsi puri ni na kaman zaligu ni wuhi shɛm ti niŋdi di ni, dama Judanim’ suhuri daa paligi maligumaaniba mini Lɛvinim’ maa tuma zuɣu.

45Bɛ daa tum bɛ Naawuni tuma mini binyɛra mali ka di be kasi tuma viɛnyɛliŋga. Ka yiliyiiniba mini dunɔguliba gba daa tum bɛ tuma kaman Dauda min’ o bia Sulemaana ni daa zali shɛm la.

46Dama Dauda mini Asaf saha la kurimbuni maa ni ha, yiliyiiniba toondana daa beni, ka wumpaɣibo mini Naawuni puhigu yila daa beni.

47Zɛrubabɛl mini Nɛhimia saha la, Izraɛlnim’ zaa daa tirila pina dabisili kam ka bɛ mal’ li tiri yiliyiiniba mini dunɔguliba. Bɛ daa yihiri Lɛvinim’ tarili tiri ba, ka Lɛvinim’ maa mi daa yihiri Aduna daŋ tarili tiri ba.

← Chapter 11 Jump to: Chapter 13 →