Philippians 2

Dagbani Bible (Naawuni Kundi Kasi)

← Chapter 1 Jump to: Chapter 3 →

1Yi nyari suhukpaŋsibo yi ni be Masia ni la zuɣu? Yi nyari suhumaabo o yurilim zuɣu? Yi mini Naawuni Shia Kasi mali simdi ni taba? Yi niŋdi tab’ nirilim ka zɔri tab’ nambɔɣu?

2N kpamdi ya jaande ni yi mali tɛhi’ yini mini yurilim yini, ka mali suhu yini tɛhi’ yini puuni, ka di chɛ ka n suhu paligi zaa.

3Di niŋya binshɛli nyuli zabbu tɛha puuni bee m-bɔri ni yi doli alaha soli nyu bara; amaa siɣisimiya yimaŋa yi tab’ sani ka miriya ka yi tɛhiri ni yi so yi taba.

4Chɛliya ka yi baɣa be yi taba yɛla ni kaman di ni be yimaŋmaŋ’ yɛla ni shɛm.

5Chɛliya ka yi tɛha be kaman tɛhi’ shɛli din be Masia ni la:

6O kul malila Naawuni biɛhigu sahakam, amaa o daa bi tɛhi ni di simdi ni o duh’ omaŋa n-wuhi ni o mini Naawuni saɣiya.

7Omaŋmaŋ’ yubu puuni ka o daa chɛ di zaa, ka zaŋ omaŋa leei dabili. Ka daa leei daadam m-mali daadam niŋgbuŋ biɛhigu.

8Ka daa siɣis’ omaŋ’ doli nɔdeebo soli ti paai kum, hal kum din nyɛ dapulli zuɣu kum gba.

9Dinzuɣu ka Naawuni daa duh’ o pam zaŋ o ʒili jilima ʒiishee, ka ti o yuli din tibisi gari yuli kam.

10Ka Naawuni ni ti Yisa jilima yu’ shɛli maa zuɣu la ni chɛ ka sokam bɛn be alizanda ni mini bɛn be dunia ŋɔ ni ni bɛn be tiŋgbani puuni ha ni ti gbani o tooni.

11Ka sokam zaa ti yaag’ o noli yɛli ni Yisa Masia nyɛla Duuma, ka di chɛ ka o Ba Naawuni nya jilima.

12Dinzuɣu m mabiyurisi, n ni daa be yi sani ka yi deeri n noli shɛm la, hal n ni ka yi sani pumpɔŋɔ ŋɔ, di niŋ kamaata ni yi na kul deeri n noli lala. Kul tummiya ni dabiɛm zɔbu mini ni sɔhibu nti nya yi tiliginsim tuma naabu,

13dama Naawuni n-nyɛ ŋun kul tumdi lala yi ni ni o chɛ ka yi saɣ’ o yubu, ka tin ya yiko ka yi tooi tum o ni yu shɛm.

14Niŋmiya binshɛɣukam ka kparima ni ŋumbu bee naŋgbankpeeni ŋmɛbu kani,

15ka di chɛ ka yi ku mali taali, ka naɣ’ ni bela kasi, ka nyɛ Naawuni bihi bɛn be tibi m-be ʒiɛmaan’ biɛɣunim’ mini ʒiɛman’ golimanim’ sunsuuni ŋɔ. Di simdi ni yi be bɛ sunsuuni dunia ŋɔ ni n-ne kaman saŋmarisi ni ne shɛm la,

16yi ni zaŋdi nyɛvili yɛligu tiri ba la puuni. Dina n-ni chɛ ka n-ti mali daliri din ni nyu bara Masia labbuna dabisili la dali, ka di wuhi ni n kpaŋmaŋtali mini n tuma bi kpalim yoli.

17Hal Naawuni yi chɛ ka n nyɛvili pahi yi yɛda niŋbu sara zuɣu n-leei sara maligu ŋun’ Naawuni sani, di ni niŋ ma suhupiɛlli, ka yi zaa gba pahi n zuɣu mali suhupiɛlli.

18Lala zuɣu ka di simdi ni yi gba mali suhupiɛlli, ka di chɛ ka n gba pahi yi zuɣu mali suhupiɛlli.

19M mali tahima ti Duuma Yisa sani ni di ku yuui ka n tim Timoti yi sanna, ka di chɛ ka m baŋ yi yɛla ni nyɛ shɛm, ka di kpaŋsi n suhu.

20O kɔŋko n-nyɛ ŋun pahi n zuɣu ka ti tɛhiri yi yɛla, ka o baɣa shiri be yi yɛla ni.

21Bɛn kpalim la bɛn’ zaa yinoyino baɣa kul bela bɛmaŋmaŋ’ yɛla ni, ka pa ni Yisa Masia yɛla ni.

22Ka yimaŋmaŋ’ gba mi Timoti ni pun kpaŋd’ omaŋ’ shɛm m min’ o ni laɣim kaman ba min’ o bia n-tumdi lahibal’ suŋ tuma la yɛla.

23Dinzuɣu n yi baŋ din yɛn niŋ ma kpe ŋɔ ni nyɛ shɛli, n ni lo nia tim o yi sanna.

24Ka m mali tahima ti Duuma sani ni di ku yuui ka mmaŋmaŋ’ gba tooi ka yi sanna.

25N tɛhiya ni di simdi ni n chɛ ka ti mabia Ɛpafurɔditus ŋun nyɛ n tumtumdikpee mini n tɔbbikpee, ka lan nyɛ yi tumo ŋun sɔŋ ma la lab’ kuli yi sanna.

26O suhu kul yɛla yi zaa nyabu zuɣu, ka o suhu bi doya, dama yi daa wum ni o biɛra.

27Yɛlimaŋli, o daa shiri biɛra, hal ti yɛn kpimi gba; amaa ka Naawuni daa zo o nambɔɣu, ka di pala o kɔŋko ka o daa zo nambɔɣu maa, amaa zaŋ tabili man’ gba ni di chɛ ka n ku mali nandahima n-lan pahi.

28Dinzuɣu n suhu kul yɛmi ni n chɛ ka o lab’ kuli yi sanna, ka yi ti nya o ka yi suhuri paligi yaha, ka man’ gba nandahima vuui.

29Dinzuɣu deemiy’ o ni suhupiɛlli ti Duuma zuɣu. Timiya niriba lala tatabo jilima,

30dama o zaŋ o nyɛvili pa talima Masia tuma zuɣu hal ti kpi. O daa niŋ lala ni o ti ma la sɔŋsim shɛli yi ni daa naan ku tooi ti ma.

← Chapter 1 Jump to: Chapter 3 →

Recommended Reading

Commentary Philippians Commentaries → Devotional Philippians Devotional Guide → Get This Bible Dagbani Bible (Naawuni Kundi Kasi) Study Bible →