Luke 1 — Dogri (डोगरी नवां नियम)

13लेकन सोर्गदूत ने उसी आखया, “ए जकर्याह, डरेंयां नेई, किके परमेसर ने तेरी प्रार्थना सुनी लेती ऐ, ते तेरी करेआली एलीशिबा थमां तेरे लेई एक पुत्तर दी जन्म देग, ते तू ओदा नां यूहन्ना गै रखयां।

14ते तुगी नन्द ते खुशी ओग, ते ओदे जन्म उपर मते लोक खुशी मनागन,

15किके ओ प्रभु दे सामनें बड़ा ओग; ते ओ अंगुरें दा रस ते शराव कदें बी नेई पीग, ते अपनी मां दे टिढें चा गै ओ पवित्र आत्मा कन्ने परोई जाग।

16ओ इस्राएलियें बिचा मतें गी उन्दे प्रभु परमेसर पासे फेरग।

17ओ एलिय्याह दी आत्मा ते शक्ति च ओईयै ओदे अगें-अगें रस्ता बनाग, के पिता दा मन बाल-बच्चें आले पासेगी फेरी दे; ते उक्म नेई मननें आलें गी, तर्मियों दी समझ उपर लेई आग, ते प्रभु दे लेई एक काबल लोकें गी त्यार करै।”

18जकर्याह ने सोर्गदूत गी पूछया, “ए मिगी कियां पता लगे के साडें कन्ने ए ओई सकदा ए? किके आऊँ तां बुजुर्ग ऐं; ते मेरी करेआली बी बुजुर्ग ओई गेदी ऐ।”

19सोर्गदूत ने उसी जबाब दिता, आऊँ जिब्राईल आं, जेड़ा परमेसर दे अगें खडोते दा रौना ऐं; ते आऊँ तेरे कन्ने गल्लां करने ते तुगी ए शोभ समाचार सनांने पेजया गेदा ऐं।

20ते देख्ख, जेस देन तकर ए गल्लां पूरीयां नेई ओई जाग, एसकरी के तो मेरी गल्लें उपर बश्वास नेई कित्ता, तू गूंगा रौगा, ते जदूं तकर पुत्तर नी जमग तू बोली नेई सकगा, जेड़ीयां अपने बेलै उपर पूरीयां ओगन।

21लोक जकर्याह गी मंदर दे बेड़े च बलगदे रे, ते रांन ओन लग्गे के उसी मंदर च इन्ना चेर कि लग्गा करदा ऐ?

22जदूं ओ बार आया, ते ओ उन्दे कन्ने बोली नेई सकया, आखर ओ समझी गै, के उसी मंदर च कोई दर्शन मिलया ऐ ते ओ उनेंगी शारे करदा रिया, ते गूंगा बने दा रिया।

23जेलै मंदर च ओदे सेवा दे देन पूरे ओए, ते ओ यरूशलेम च अपने कर चली गीया।

24इंदे केश दिनें बाद ओदी करेआली एलीशिबा गर्भवती ओई; ते पंज मिने तकर अपने आप गी ओनें लोके कोलां छपाईये रखया, किके उसी पता हा के लोकें ओदा मजाक करना

25“मनुक्खें च मेरी बेईजती दूर करने लेई, प्रभु ने इनें दिनें च रैम दी नजर देईयै मेरे लेई ऐसा कित्ता ऐ।”

26एलीशिबा दे गर्भवती होने दे छेमे मिने च परमेसर थमां जिब्राईल सोर्गदूत गलील जिले दे नासरत नां च,

27एक कुवारी दे कोल पेजया गीया जेदी कडमाई युसूफ नां दाऊद दे खानदान बिचा एक मरद कन्ने ओई दी ही: ते ओस कुवारी दा नां मरियम हा।

28ते कोल आईयै सोर्गदूत ने उसी आखया, “खुशी ते जय तेरी ओऐ, तेरे उपर परमेसर दी दया ओई ऐ! प्रभु तेरे कन्ने ऐ!”

29ओ एस वचन गी सुनीयै बड़ी कबराई गेई, ते सोचन लगी के एस चाली दे शीर्वाद दा के मतलब ओई सकदा ऐ।

30सोर्गदूत ने उसी आखया, “ए मरियम डरयां नेई, किके तेरे उपर परमेसर दी किरपा ओई ऐ,

31देख्ख, तू गर्भवती ओगी, ते एक पुत्तर गी जन्म देगी; तू ओसदा नां यीशु रखयां।

32ओ मान ओग, ते परमप्रधान दा पुत्तर आख्या जाग, प्रभु परमेसर उसी ओदे पूर्वज दाऊद दा सिंहासन उसी देग।

33ते ओ याकूब दे वंश उपर मेशा राज करग, ते ओ राजा बनियै मेशा राज करग।”

34मरियम ने सोर्गदूत गी आखया, “ए कियां ओई सकदा ऐ? किके आऊँ अजें कुआरी आं”

35सोर्गदूत ने उसी जबाब दित्ता, “पवित्र आत्मा तेरे उपर उतरग, ते परमप्रधान दी शक्ति तेरे उपर छां करग; एसकरी ओ जेड़ा जमने आला ऐ पवित्र ओग, ओ परमेसर दा पुत्तर आख्या जाग।

36ते देख्ख, तेरी चचेरी पैन एलीशिबा थमां बी एस बुढ़ापे च एक पुत्तर ओनें आला ऐ, ए ओदा, जेड़ी बांझ आखी जन्दी ही, उसी छेमां मीना ऐ।

37परमेसर दे लेई केछ बी मुशकल नेई ऐ।”

38मरियम ने आखया, “देख्ख, आऊँ ते प्रभु दी दासी आं। तेरे वचन दे मताबक मेरे कन्ने इयै ऊऐ।” ओसबेलै सोर्गदूत ओदे कोलां दा चली गीया।

39केश धयाडें दे बाद च मरियम उठीयै तौली गै पाड़ी देश च यहूदा दे एक शैर च गेई।

40ते जकर्याह दे कर च जाईयै ओनें एलीशिबा गी नमस्ते कित्ता।

41जियां गै एलीशिबा ने मरियम दा नमश्कार सुनया, उयांगै बच्चा ओदे पेट च उछलेया ते एलीशिबा पवित्र आत्मा कन्ने परोई गेई।

42ते ओनें ऊंची बाज कन्ने आखया, “तू जनांनीयें च धन्न ऐं, ते तेरे पेट दा फल बी धन्न ऐ!

43ते ए रैम मेरे उपर कुथुं दा ओया, के मेरे प्रभु दी मां मेरे कोल आई?

44देख्ख, जियां गै तेरे नमश्कार दी बाज मेरे कन च पेई, उयांगै बच्चा मेरे टिड्डे च खुशी कन्ने पोडकी पिया।

45ते धन्न ऐ, ओ जेनें बश्वास कित्ता के जेड़ीयां गल्लां प्रभु थमां आखीयां गेईयां, ओ पूरीयां ओगन।”

46ओसलै मरियम ने आखया, “मेरा प्राण प्रभु दी बड़ाई करदा ऐ,

47ते मेरी आत्मा मेरे उद्धार देने आले परमेसर थमां खोश ओई,

48किके ओनें अपनी दासी दी दीनगी उपर रैम दी नजर कित्ती ऐ। एसकरी दिखो, ऊन थमां योग-योग दे लोक मिगी धन्न आखघन।

49किके ओस शक्तिमान ने मेरे लेई बड़े-बड़े कम कित्ते न। ते ओदा नां पवित्र ऐ।

50“ते ओदी दया उन्दे उप्पर, जेड़े ओदे थमां डरदे न, पीढ़ी-पीढ़ी तकर बनी दी रौंदी।

51“ओनें अपनी ताकत दसी, ते जेड़े अपने मन च कमंड करदे हे, उनेंगी ओनें अराई दित्ता।

52“ओनें राजें कोलां अधिकार लेई लित्ता; ते दीने गी उच्चा कित्ता।

53“ओनें पुख्खें दें गी छैल-छैल चीजें कन्ने रजाया, ते पैसे आलें गी खाली अथ्थ कढी ओड़या।

54“ओनें अपने सेवक इस्राएल गी सम्भाली लिया के अपनी ओस दया गी जाद करै,

55“जेड़ी अब्राहम ते ओदी पीढ़ी उपर मेशा रौग, जियां ओनें साड़े बाप-दादें कन्ने आखे दा हा।”

56मरियम लग-पग त्रै मिने ओदे कन्ने रेईयै अपने कर बापस चली गेई।

57ओसबेलै एलीशिबा दे जमने दा बेला पूरा ओया, ते ओनें पुत्तर गी जन्म दिता।

58ओदे मल्लेदारें ते रिशतेदारें ए सुनया, के प्रभु ने ओदे उपर अपनी बड़ी दया कित्ती ऐ, उनै ओदे कन्ने खुशी मनाई।

59ते ऐसा ओया के अठमें देन ओ बच्चे दा खतना करने गी आए। ते ओदा नां ओदे पिता दे नां उपर जकर्याह रखन लगे।

60एदे उपर ओसदी मां एलीशिबा ने आखया, “नेई! एदा नां यूहन्ना रखया जा।

61ते उनै उसी आखया, थुआड़े रिशतेदारें च कुसे दा बी ए नां नेई!”

62एस तू बाद उनै ओदे पिता गी शारा कन्ने पूछया के तो एसदा नां के रखना चानां ऐ?

63ते ओनें लिखने दी तख्ती मंगीयै ओदे उपर लिखया, “एदा नां यूहन्ना ऐ, ते सारें रांनगी कित्ती।

64उसै बेलै ओदा मुंह ते जिभ खुली गेई; ते ओ बोलन ते परमेसर दी स्तुति करन लगया।

65ते ओसदे आसे-पासे दे रौने आलें उपर डर छाई गीया; ते उनै सारीयें गल्लें दी चर्चा यहूदीया दे सारे पाड़ी देश च फैली गेई,

66ते सारें सुनने आलें अपने-अपने मन च वचार करियै आखया, ए जागत के जियां ओग? किके प्रभु दा समर्थ ओदे कन्ने हा।”

67एसतुं बाद ओदा पिता जकर्याह पवित्र आत्मा कन्ने परोई गीया, ते ओ पविख्वानी करन लगया।

68“प्रभु इस्राएल दे परमेसर दा धन्न ओ, किके ओनें अस इस्राएल दे लोकें उपर रैम दी नजर दिती ते उन्दा छुटकारे दा कम पूरा कित्ता ऐ।

69“ते साड़े लेई अपने सेवक दाऊद दे कराने च एक समर्थी उद्धार दान दित्ता ऐ,

70“जियां ओनें अपने पवित्र पविखवक्तें दे मुंह थमां जेड़े दुनिया दे शुरू थमां ओए न, आख्या हा,

71“यनिके साड़े दुश्मनें कोलां, ते साड़े सब बैर रखने आलें दे अथ्थें चा साड़ा उद्धार कित्ता ऐ,

72“ओ साड़े बब-दादें उपर मेर करियै अपने पवित्र बादा गी याद करै।

73“ते ओ बायदा जेड़ी ओनें साड़े पिता अब्राहम कन्ने खादी ही,

74“कि ओ असेंगी ए देग, के अस अपने दुशमनें दे अथ्थें चा बचीये,

75“ओदे अगें पवित्रता ते तार्मिकता च जिंदड़ी पर बगैर डर दे ओदी सेवा करदे रौचै।

76“ते तू ए बच्चे, परमप्रधान दा पविखवक्तें आख्या जागा, किके तू प्रभु दा मार्ग तयार करने दे लेई ओदे अगें-अगें चलगा,

77“के ओदे लोकें गी उद्धार दा ज्ञान दे, जेड़ा उन्दे पापे दी माफी थमां थोंदा ऐ।

78“ए साड़े परमेसर दी ओस बड़ी दया कन्ने ओग; जेसकरी सोर्ग थमां साड़े उपर बड़े बेलै दा सूरज चमकग।

79“के न्हेरा ते मौत दी छाऊं च बौनें आलें गी लो दे, ते साड़े पैरें गी सोख दे रसतै च सीधा चला।”

80ते ओ जागत यूहन्ना, बददा ते आत्मा च तकड़ा ओंदा गीया, ते इस्राएल उपर परकट ओनें दे देन तकर जंगलें च रिया।