Ezekiel 31

Dyula Bible (Jula NT of Côte d’Ivoire)

← Chapter 30 Jump to: Chapter 32 →

1San tan ni kelennan, karo sabanan, tere fɔlɔ, Matigi Ala k’a ta kuma lase ne ma tuun; a ko:

2«Adamaden, a fɔ Misiran masacɛ Farawona ni a ta jama ye ko: ‹Ele bɔra jɔntigi le fɛ sa, ele ni i ta bonya?

3A flɛ, Asiri jamana fana tun bɛ i ko Liban jamana sɛdirisun dɔ. A yiriboro cɛɲumanbaw suma tun bɛ i ko yirituba suma; a tun ka jan kosɛbɛ, a kun tun bɛ se fɔ sankabaw ma.

4Jiw tun k’a bonya; dugukolo jukɔrɔjiw tun k’a janya. O jiw woyora k’a kɔrɔyɔrɔ lamini, ka woyo ka taga kongoyiri tɔw bɛɛ kɔrɔ.

5O kosɔn a tun janyara ka tɛmɛ kongoyiri tɔw bɛɛ kan; a yiriborow cayara, a yiriboromisɛnw janyara, sabu a wuritɔ, ji caman tun b’a kɔrɔ.

6« ‹Sanfɛkɔnɔw bɛɛ tun bɛ o ta ɲaga la a yiriboromisɛnw le cɛ ra; kongosogow bɛɛ tun bɛ o denw woro a yiriborow suma le ra. Siya caman tun bɛ sigi a suma ra.

7A tun cɛ ka ɲi, a bonya ni a yiriborow janya kosɔn; sabu a lilinw tun bɛ ji camanba sɔrɔ dugukolo jukɔrɔ.

8Ala ta yiritu ta sɛdirisunw si tun tɛ se ka o yɛrɛ suma ni a ye, sipɛrɛsisunw fana tun tɛ se ka o yɛrɛ kaɲa ni a yiriborow ye; pilatanisunw si tun tɛ a yiriborow bɔ cɛɲa ra. Ala ta yiritu yiriw si ta cɛɲa tun tɛ a ta bɔ.

9Ne tun ka yiriboro caman kɛ k’a cɛɲa; yiri o yiri tun bɛ Edɛni, Ala ta yiritu kɔnɔ, a ɲangboya tun ka olugu bɛɛ mina.› »

10«O kosɔn Dunuɲatigi Ala ko: Yirisunba tun janyara kosɛbɛ, a k’a kun kɔrɔta ka se fɔ sankabaw ma; yɛrɛbonya donna a jusukun na a ta janya kosɔn.

11O kosɔn, ne k’a don siyaw bɛɛ ta kuntigiba boro; a ka kojugu minw kɛ, ale bɛna a mina ka kaɲa ni o le ye, sabu ne banna a ra.

12Siya wɛrɛ mɔgɔw bɛɛ ra mɔgɔ farimanw, olugu k’a tigɛ k’a ben, ka taga k’a to yi. A yiriborow benbenna kuruw kan, ani kurufurancɛw bɛɛ ra. A yiriboromisɛnw karikarira ka benben jamana dingakolonw bɛɛ kɔnɔ. Dunuɲamɔgɔ minw bɛɛ tun bɛ sigi a suma kɔrɔ, olugu bɔra a kɔrɔ, k’a kelen to yi.

13Sanfɛkɔnɔw bɛɛ bɛna sigi a yirisun bennin kan; kongobɛganw bɛɛ bɛna sigi a yiriborow cɛ ra.

14« ‹Ni o kɛra, jidarayiri wɛrɛ si tɛna a yɛrɛ bonya a janya kosɔn, k’a kun kɔrɔta ka se fɔ sankabaw ma tuun; yiri si tɛna a fɔ ko ji caman b’a kɔrɔ, k’a yɛrɛ bonya ka kɛ yiri tɔw san fɛ. Sabu ne ka o bɛɛ labla saya ye; o bɛ taga dugukolo jukɔrɔyɔrɔ ra, ka taga fara adamaden sanin tɔw kan, minw lajigira kaburu dinga kɔnɔ.›

15«Dunuɲatigi Ala ko: A jigira kaburu kɔnɔ lon min na, ne ka yɔrɔ bɛɛ bla sukasi ra; ne ka dugukolo jukɔrɔjiw datugu a kosɔn, ne ka bajiw lalɔ, k’a jiwoyow mina ka o lɔ yɔrɔ kelen na. Ne ka ɲanasisi dibi lajigi Liban kuruw kan. Kongoyiriw bɛɛ jajara a kosɔn.

16Wagati min ne k’a lajigi kaburu kɔnɔ, ka fara kaburukɔnɔmɔgɔw kan, a benkan fɛ, ne ka siyaw ja tigɛ fɔ o bɛ yɛrɛyɛrɛ; Edɛni yiri minw bɛɛ bɛ dugukolo jukɔrɔ, Liban yiri ɲumanmanw, a yiriw bɛɛ ra cɛɲumanw, min o min tun bɛ ji sɔrɔ, olugu jusu saarora.

17Minw tun kɛra a jɛnɲɔgɔnw ye, minw tun sigira a suma kɔrɔ siya tɔw cɛ ra, olugu fana jigira ni a ye kaburu kɔnɔ, ka taga fara mɔgɔ faganinw kan, o ka minw faga ni kɛrɛkɛmuru ye.

18« ‹Ayiwa, Edɛni yiri juman ta nɔɔrɔ ni a ta bonya tun bɛ i ko ele ta? O bɛɛ n’a ta, i ni Edɛni yiriw bɛɛ bɛna jigi ɲɔgɔn fɛ dugukolo jukɔrɔ. I su bɛna taga la mɔgɔ kɛnɛsigibariw suw cɛ ra, ka taga fara mɔgɔ faganinw kan, o ka minw faga ni kɛrɛkɛmuru ye. Farawona laban bɛna kɛ o le ye, ani a ta jamaba bɛɛ. Dunuɲatigi Ala ko ten.› »

← Chapter 30 Jump to: Chapter 32 →