Psalms 7

Dyula Bible (Jula NT of Côte d’Ivoire)

← Chapter 6 Jump to: Chapter 8 →

1Dawuda ta maɲumanko dɔnkiri; a ka min la Matigi Ala ɲa kɔrɔ, Kusi ta ko ra, Kusi min tun ye Boniyaminu ta mɔgɔ dɔ ye.

2Matigi Ala, ne ta Ala, ne bɛ ne yɛrɛ karifa ele le ma; ne kisi ka bɔ ne nɔgbɛnbagaw bɛɛ boro, ka ne bɔsi,

3janko o kana na ne sogo tigɛtigɛ i ko jara, o kana na ne tigɛtigɛ, mɔgɔ kana sɔrɔ ka ne bɔsi.

4Matigi Ala, ne ta Ala, ni a kɛra ko ne ka nin ko ɲɔgɔn dɔ le kɛ: ni ne boro ka kojugu kɛ,

5walama ni ne ka kojugu kɛ ne sigiɲɔgɔn na, ni ne ka hali ne jugu dɔ ta borofɛnw bɔsi gbansan,

6o tuma ne juguw ye ne gbɛn fɔ ka ne nin mina; o ye ne dɔndɔn ka ne terege dugu ma fɔ ka ne si ban, ka ne ta bonya bɛɛ tunu bɔgɔ ra.

7E, Matigi Ala, i wuri ka i ta dimi yira, i wuri ka ne juguw ta jusugban bɛɛ ban; i wuri ka ne dɛmɛ, ka kiti tigɛ.

8Jamanaw bɛɛ ta mɔgɔw ye na lajɛn ka i lamini, ele ye sigi san fɛ o bɛɛ kunna.

9Matigi Ala le bɛ siyaw ta kiti tigɛ; Matigi Ala, ne ta kiti tigɛ ka kaɲa ni ne ta terenninya ye, ka kaɲa ni ne ta jusukungbɛninya ye.

10Mɔgɔjuguw ta kojuguw lalɔ ten, ka mɔgɔ terennin sabati, ele min bɛ adamaden jusukunnakow ni a hakirinankow bɛɛ sɛgɛsɛgɛ k’a lɔn, ele Ala min terennin lo.

11Ala le ye ne tangabaga ye, ale le ye mɔgɔ jusuɲumanw kisibaga ye.

12Ala ye kititigɛbaga terennin le ye, a ta dimi bɛ ben mɔgɔjuguw kan lon o lon.

13Ni o ma nimisa, Ala bɛna a ta kɛrɛkɛmuru dabɔ o kama; a bɛ a ta kalan labɛn, k’a sama.

14A bɛ a ta kɛrɛkɛminanw labɛn fagari kama, a bɛ biɲɛ tasumamanw labɛn.

15A flɛ, mɔgɔjugu bɛ terenbariya kɔnɔ ta, kojugu kɔnɔ le b’a ra; a fana bɛna jigi faninya le ra.

16A bɛ dinga sogi, fɔ k’a dunya, nka a ka dinga min sogi, ale yɛrɛ le bɛ ben o kɔnɔ.

17A ta kojugu bɛna ben ale yɛrɛ le kan, a ta fariya bɛ jigi ale yɛrɛ le kuncɛ ra.

18Ne bɛna Matigi Ala fo k’a waleɲumanlɔn a ta terenninya kosɔn, ka Alatandodɔnkiriw la ka Matigi Ala kɔrɔtaninba tɔgɔ tando.

← Chapter 6 Jump to: Chapter 8 →