Acts 3

Dyula Bible (ALA KA KUMA)

← Chapter 2 Jump to: Chapter 4 →

1Loon dɔ, Piyɛri ni Zan tun be tagara Alabatosoba kɔnɔ wulafɛ batoli la.

2Cɛɛ dɔ tun be yen, muruku tun lo kabini a wolotuma. Mɔgɔw tun b'a ta ka taga bila loon o loon Alabatosoba daa dɔ la, u be min wele ko Daa cɛɲuman, janko a ka daalili kɛ donbagaw fɛ.

3A ye Piyɛri ni Zan ye tuma min na, u tun be ɲini ka don Alabatosoba kɔnɔ. A ye daalili kɛ u fɛ.

4Piyɛri ni Zan ye cɛɛ filɛ, k'a fɔ a ye ko: «An filɛ ka ɲa.»

5Cɛɛ y'a ɲaa basanin to u kan, a ka miiri la ko a bena fɛɛn dɔ sɔrɔ u fɛ.

6O la Piyɛri y'a fɔ a ye tugu ko: «Sanu te n fɛ, wari te n fɛ, nga fɛɛn min be n fɛ, ne b'o le d'i ma: Nazarɛtika Yezu Krista tɔgɔ barika la, wili ka taama.»

7Piyɛri y'a minɛ a kinibolo ma k'a wili. O yɔrɔnin kelen, cɛɛ seenw kɛnɛyara, a senfasaw ye barika sɔrɔ.

8A panna ka cun! A taamana ka don n'u ye Alabatosoba kɔnɔ. A tora ka taama ka panpan, ka barika la Ala ye.

9Mɔgɔ bɛɛ y'a taamatɔ ye ka to ka Ala tanu.

10U y'a lɔn ko ale lo tun be sigi Alabatosoba Daa cɛɲuman kɔrɔ ka daalili kɛ. O ye mɔgɔw kabakoya ka dama tɛmɛ fɔɔ k'u hakili ɲagami.

11Cɛɛ ma sɔn ka bɔ Piyɛri ni Zan kɔ, mɔgɔw hakili ɲagaminin girinna k'u lamini yɔrɔ dɔ la, u be min wele ko Solomani ka bulonda.

12Piyɛri y'o ye minkɛ, a y'a kaan to ko: «Isirayɛlidenw, koo min kɛra ten, mun na o b'aw kamanagwan k'aw ɲaa coron anw na ka kɛ i n'a fɔ anw ka sebagaya le ye cɛɛ kɛnɛya, walima an ka Ala ɲasiranya kosɔn le?

13Nga Ibrayima, ni Isiyaka, ani Yakuba ka Ala, ani an bɛmaw ka Ala le ye nɔɔrɔ la a ka baarakɛla Yezu kan, aw banna ale min na k'a don mɔgɔjuguw bolo. Pilati tun b'a fɛ k'a bila, aw ko fewu.

14Aw banna Mɔgɔsɔbɛ ni Mɔgɔɲuman na, min y'a yɛrɛ di Ala ma a sago kosɔn. Aw banna ale la ko fɔɔ Pilati ka mɔgɔfagala dɔ le labila.

15Aw y'a to u ye nii dibaga faga, nga Ala y'a kunun. Anw y'a ye.

16An lara Yezu tɔgɔ la minkɛ, o le y'a to a ye cɛɛ nin kɛnɛya, aw ɲaa be min na, aw b'a lɔn fana ka kɔrɔ. Tiɲɛ na, anw lara Yezu la minkɛ, o le y'a kɛnɛya aw ɲakɔrɔ ten.

17«Sisan n balimaw, ne y'a lɔn ko aw, n'aw ka ɲamɔgɔw ye koo nin kɛ, sabu aw tun m'a lɔn.

18N'o tɛ, Ala tun y'a fɔ a ka kiraw barika la kabini fɔlɔ, ko a bena mɔgɔ min woloma k'a bila ka na, k'o bena tɔɔrɔ. A do kɛra ten.

19O tuma na, aw ye nimisa ka faran aw ka hakɛw la ka segi Ala ma, janko a k'aw ka hakɛw yafa.

20Aw k'a kɛ ten, o la, yɛlɛmani bena don, lafiya bena sɔrɔ. O seen fɛ Matigi bena segi k'a ka Mɔgɔ wolomanin Yezu ci aw ma tugu, i n'a fɔ a y'a latigɛ cogo min na.

21Nga sanni o waati ka se, a siginin bena to Ala kɔrɔ fɔlɔ yanni yɛlɛmani ka don diɲɛ koow bɛɛ la, ka kɛɲɛ ni Ala ka kiraw ka kuma ye, min fɔra kabini tumajan.

22Musa tun kɔnna k'a fɔ ko: ‹Matigi i ka Ala bena ne bɔɲɔgɔn kira dɔ wili aw balimaw cɛma. A mana kuma o kuma fɔ aw ye, aw ka kan ka mɛnni kɛ a fɛ.

23Ni mɔgɔ min banna ka mɛnni kɛ o kira nin fɛ, o tigi bena halaki.›

24Kira minw tɛmɛna ka kɔrɔ, k'a ta Samuyɛli ma, ani minw tugur'a kɔ, olu bɛɛ fana y'an ka bii tile koo fɔ ka tɛmɛ.

25Aw ye kiraw ka deenw ye. Ala tun ye bɛɛn min kɛ n'aw faaw ye Ibrayima barika la, aw y'o deenw ye. A tun ko: ‹Gwasow bɛɛ bena duba sɔrɔ i kɔmɔgɔ barika la.›

26Ala y'a ka baarakɛla ci aw le ma fɔlɔ, janko a ka hɛrɛ kɛ aw kelen kelen bɛɛ ye k'aw faran ka bɔ aw ka kɛwalijuguw la.»

← Chapter 2 Jump to: Chapter 4 →