Matthew 26 — Dyula Bible (LAYIDUKURA)

7muso dɔ gwɛrɛla Yezu la ni daga cɛnyumannin dɔ b'a bolo. O daga nin tun dilannin bɛ ni kabakuru ye, min bɛ wele alabatiri. A fanin tun bɛ tulu kasadiman dɔ la min sɔngɔ ka gwɛlɛ. A ye Yezu to dumuni na ka tulu nin bon a kuun na.

8Kalandenw y'o ye minkɛ, u dimina k'a fɔ ko: “Mun na a ye tulu kasadiman nin cɛn ten?

9An tun bɛ se k'a feere sɔngɔgwɛlɛn na, k'a wari tilan faantanw cɛ.”

10Yezu y'o kuma mɛn u fɛ minkɛ, a y'a fɔ u ye ko: “Mun na aw b'a dusu kasi? A ye konyuman le kɛ ne ye ten.

11Aw bɛna to ni faantanw ye tuma bɛɛ. Nga ne tɛna to n'aw ye tuma bɛɛ.

12Muso nin ye tulu nin bɔn ne fari kan, waasa ka ne fari labɛn ne suu donlon kama.

13Ne b'a fɔ aw ye tinyɛ na ko ni kibaru diman nin mana fɔ dinyɛ yɔrɔ o yɔrɔ, muso nin ye min kɛ ne ye, a tɔgɔ bɛna fɔ u hakili bɛ jigi a koo la.”

14O tuma na, Yezu ka kalanden tan ni fila kelen, min tɔgɔ ko Zuda Isikariyɔti, ale taara sarakalasebagaw fɛ,

15k'a fɔ u ye ko: “Aw bɛna mun le di ne ma, ni ne y'aw dɛmɛ ka Yezu minɛ?” Olu ye warigwɛ bi saba d'a ma.

16Kabini o waati la Zuda tun bɛ cogonyuman nyinina waasa ka Yezu don u bolo.

17Buru funubali nyanagwɛ loon fɔlɔ, Yezu ka kalandenw y'a nyininga ko: “I b'a fɛ an ka taa Hɔrɔnya nyanagwɛ dumuni labɛn min?”

18Yezu y'a fɔ u ye ko: “Aw ye taa dugu kɔnɔ, karimasina fɛ, k'a fɔ a ye ko karamɔgɔ ko ale taawaati sera, ko ale n'a ka kalandenw bɛna Hɔrɔnya nyanagwɛ dumuni kɛ a fɛ.”

19Kalandenw y'a kɛ i ko Yezu tun y'a fɔ u ye cogo min na. U ye Hɔrɔnya nyanagwɛ dumuni labɛn yen.

20Sufɛ, Yezu n'a ka kalanden tan ni fila nunu tun siginin bɛ dumuni na.

21K'u to dumuni na, Yezu y'a fɔ u ye ko: “Tinyɛ na, ne b'a fɔ aw ye ko aw dɔ bɛna ne don mɔgɔjuguw bolo.”

22Kalandenw dusu kasira kosɛbɛ, fɔɔ u bɛ Yezu nyininga kelen kelen ko: “Ne lo wa, Matigi?”

23Yezu y'u jaabi ko: “Mɔgɔ min y'a bolo don ni ne ye minan kɔnɔ, ale lo bɛna ne don mɔgɔjuguw bolo.

24Mɔgɔ Dencɛ bɛna sa i n'a fɔ a fɔra Ala ka kuma na a koo la cogo min na. Nga min bɛna Mɔgɔ Dencɛ don mɔgɔjuguw bolo, bɔnɛ b'o tigi ye. N'a tigi yɛrɛ tun ma wolo, o le tun ka fisa a ma.”

25Zuda min tun b'a la k'a janfa, ale y'a nyininga ko: “Ne lo wa, karamɔgɔ?” Yezu y'a jaabi ko: “Ele yɛrɛ daa le y'a fɔ.”

26Ka Yezu n'a ka kalandenw to dumuni na, a ye buru ta ka barika la Ala ye, k'a tilantilan k'a di a ka kalandenw ma, k'a fɔ u ye ko: “Nin ye ne fari ye. Aw k'o minɛ k'a dumu.”

27O kɔ, a ye duvɛn ta ka barika la Ala ye, k'o di kalandenw ma fana, k'a fɔ ko: “Aw bɛɛ k'o min,

28bari o ye ne joli ye, joli min bɛ Ala ka layidu dafa, o min bɛna bɔn mɔgɔ bɛɛ ka kojugu yafa kɔsɔn.

29Ne b'a fɔ aw ye ko ne tɛna duvɛn min tugu, fɔɔ loon min na ne bɛn'a min n'aw ye arijana na.”

30U ye Ala tando ni dɔnkiliw ye ka ban tuma min na, u bɔra ka taa Olivuyirikulu kan.

31O kɔ, Yezu y'a fɔ u ye ko: “Bii suu nin na, aw bɛɛ bɛna boli ka ne to, bari, a fɔra Ala ka kuma na ko: ‘Ne Ala bɛna sagadɛndɛbaga bugɔ ka faga, sagaw bɛ boli ka jɛnsɛn.’

32Nga ne kɔni b'a fɔ aw ye ko ni ne nana kunun tuma min na, ne bɛna taa aw nya Galile mara la.”

33Piyɛri y'a fɔ a ye ko: “Hali ni mɔgɔw bɛɛ bolila k'i to, ne kɔni tɛna boli abada.”

34Yezu y'a fɔ a ye ko: “Tinyɛ na, ne b'a fɔ i ye ko yan ni dondo ka kasi bii suu nin na, ele bɛn'a fɔ sinyɛ saba ko i tɛ ne lɔn.”

35Piyɛri y'a fɔ a ye ko: “Hali ni ne ka kan ka sa n'i ye, ne kɔni tɛn'a fɔ ko n t'i lɔn fewu.” Kalanden tɔ nunu fana ko ten.

36Yezu n'a ka kalandenw taara yɔrɔ dɔ la u bɛ min wele ko Zɛtisemane. A y'a fɔ u ye ko: “Aw ye sigi ka ne kɔnɔ yan, ne bɛna taa nyafɛ ka Ala dali.”

37A taara ni Piyɛri ni Zebede dencɛ fila nunu ye. A hakili daminɛna ka nyagami, siranya y'a minɛ.

38A y'a fɔ u ye ko: “Dusukasi bɛna n faga. Aw ye to yan ni ne ye, aw kana sinɔgɔ.”

39A taara nyafɛ dɔɔni k'a kunbiri gwan k'a nyaa biri duguma, ka Ala dali ko: “N Faa, ne kisi tɔɔrɔ nin ma n'o bɛ se ka kɛ. Nga o kana kɛ ne sago la fɔɔ ele ta.”

40O kɔ, a segira ka na kalanden saba nunu fɛ, ka u sɔrɔ sinɔgɔ la. A y'a fɔ Piyɛri ye ko: “Aw ma se ka to aw nyaa na ni ne ye hali waati dɔɔni yɛrɛ wa?

41Aw ye to nyana ka Ala dali, waasa ni Sutana y'aw nigɛ, a kana se aw kɔrɔ. Konyuman kɛ miiriya bɛ mɔgɔw kɔnɔ, nga a kɛ see t'u ye.”

42A kɔsegira ka taa sinyɛ filanan na, ka Ala dali tugu ko: “N Faa, n'a kɛra ko ne tɛ se ka kisi o tɔɔrɔ nin ma, e sago ka kɛ.”

43A kɔsegira ka na u sɔrɔ u bɛ sinɔgɔra, bari sinɔgɔ tun b'u la kosɛbɛ.

44Yezu y'u to yen ka kɔsegi ka taa Ala dali a sinyɛ sabanan na n'o kuma kelen ye.

45O kɔ, a kɔsegira a ka kalandenw yɔrɔ la, k'a fɔ u ye ko: “Aw bɛ sinɔgɔra ka lafinyɛ halibi wa? Ayiwa, waati sera. U bɛna Mɔgɔ Dencɛ don mɔgɔjuguw bolo.

46Aw ye wili an ka taa. Mɔgɔ min bɛna ne don mɔgɔjuguw bolo, ale natɔ filɛ.”

47Ka Yezu t'o kuma na, Zuda min tun ye kalanden tan ni fila dɔ ye, ale sera ni jamaba ye. Murujan ni berew tun b'u bolo. Sarakalasebagaw ni cɛkɔrɔbaw le tun y'u ci.

48Yezu janfabaga Zuda tun y'a fɔ jama ye ko: “Ne bɛna cɛɛ min fo ka n bolo meleke a kaan na, o le ye Yezu ye. Aw k'a minɛ.”

49O yɔrɔnin kelen, Zuda gwɛrɛla Yezu la k'a fɔ a ye ko: “I ni suu, karamɔgɔ.” O kɔ, a y'a bolo meleke Yezu kaan na.

50Yezu y'a fɔ a ye ko: “N teri, i b'a fɛ ka koo min kɛ, o kɛ.” Mɔgɔ minw tun bɛ ni Zuda ye, olu ye Yezu minɛ.

51Mɔgɔ minw tun bɛ ni Yezu ye, olu dɔ y'a ka murujan bɔ a foroko la, ka sarakalasebagaba ka baaraden tulo caron.

52Yezu y'a fɔ o tigi ye ko: “I ka murujan don a foroko la yen, bari mɔgɔ minw bɛ kɛlɛ kɛ ni murujan ye, murujan le bɛna u faga fana.

53E m'a lɔn ko ne bɛ se k'a fɔ n Faa ye ko a ka n dɛmɛ wa? O yɔrɔnin bɛ fana, a bɛ se ka mɛlɛkɛ waa caaman ci ka na n dɛmɛ.

54N'o kɛra, Ala ka kuma min b'a fɔ k'o koow ka kan ka kɛ ten, o bɛna dafa cogo di?”

55O kɔ, Yezu y'a fɔ jama ye ko: “Aw nana ni murujan ni berew ye ne kama, i n'a fɔ ne ye benkannikɛla ye. Ne tun bɛ to ka sigi Alabatosoba kɔnɔ loon bɛɛ ka mɔgɔw kalan yen, aw ma ne minɛ o yɔrɔ la.

56Nga, o koo bɛɛ kɛra waasa kiraw ye min fɔ, o ka kɛ.” O cogo la, kalandenw bɛɛ bolila k'a to.

57Mɔgɔ minw tun ye Yezu minɛ, olu taara ni Yezu ye sarakalasebagaw kuntigiba Kayifu ka luu kɔnɔ. Sariya karamɔgɔw ni cɛkɔrɔbaw tun ye nyɔgɔn lajɛn o yɔrɔ la.

58Piyɛri tugura u kɔ ka furancɛba to u ni nyɔgɔn cɛ fɔɔ ka se sarakalasebagaw kuntigiba ka luu kɔnɔ. A donna ka sigi ni yɔrɔ kɔlɔsibagaw ye ka filɛli kɛ, koo nin bɛna laban cogo min na, a k'o ye.

59O y'a sɔrɔ sarakalasebagaw kuntigiw ni Zuwifuw ka kititigɛlaw bɛɛ tun bɛ galon dɔ nyinina k'a la Yezu kan, waasa ka se k'a faga.

60Mɔgɔ caaman nana ka galon tigɛ ka la a kan, nga u ma se k'a jalakita sɔrɔ. O kɔ, mɔgɔ fila dɔ nana,

61olu y'a fɔ ko: “Cɛɛ nin tun y'a fɔ ko ale bɛ se ka Alabatosoba ci, ka tila k'a lɔ tile saba kɔnɔ.”

62Sarakalasebaga kuntigiba wilila ka Yezu nyininga ko: “Mɔgɔ nunu bɛ kuma min fɔra i koo la, i tɛ foyi fɔ o la wa?”

63Yezu m'a jaabi. Sarakalasebaga kuntigiba y'a fɔ a ye ko: “Ni ele lo ye Ala ka Mɔgɔwolomanin, ni Ala Dencɛ ye, a fɔ an ye Ala kɔsɔn.”

64Yezu y'a jaabi ko: “Ele yɛrɛ le y'a fɔ, nga ne b'a fɔ aw ye ko k'a ta sisan ma, aw bɛna Mɔgɔ Dencɛ siginin ye Setigi Ala kinibolo la, o kɔ, aw bɛn'a natɔ ye sankaba kan.”

65Sarakalasebaga kuntigiba dimina fɔɔ a y'a yɛrɛ ka fani faran k'a fɔ ko: “A ye Ala tɔgɔ cɛn! An mako tɛ mɔgɔ la k'a jalaki tugu. Aw yɛrɛ ye Ala tɔgɔcɛnkuma mɛn a daa la kɛ!

66Aw bɛ mun le miiri o la?” U y'a jaabi ko: “A ka kan ka faga.”

67O kɔ, dɔw y'u daji tutu a nyaa na, k'a bugɔbugɔ ni bolokuruw ye. Dɔw y'a tulo cici n'u b'a fɔra ko:

68“Ala ka Mɔgɔwolomanin, kiraya kɛ k'a fɔ an ye, jon y'i bugɔ?”

69Piyɛri tun siginin bɛ kɛnɛma luu kɔnɔ. Sarakalasebagaba ka baaraden musoman dɔ gwɛrɛla Piyɛri la k'a fɔ a ye ko: “Ele fana tun bɛ ni Yezu ye ka bɔ Galile.”

70Nga Piyɛri y'a sɔsɔ u bɛɛ nyana ko: “E bɛ min fɔra, ne t'o lɔn.”

71Piyɛri bɔra o yɔrɔ la ka taa luda faan fɛ. Sarakalasebagaba ka baaraden musoman dɔ wɛrɛ nana tugu. Ale y'a fɔ o yɔrɔ mɔgɔw ye ko: “Cɛɛ nin tun bɛ ni Yezu Nazarɛtika ye.”

72Piyɛri y'a fɔ tugu ko: “Ala kama, n tɛ cɛɛ nin lɔn.”

73Yan ni dɔɔni mɔgɔ minw tun b'o yɔrɔ la, olu gwɛrɛla Piyɛri la k'a fɔ a ye ko: “Tinyɛ na, ele ye mɔgɔ nunu dɔ ye. Hali i ka kuma b'a yira.”

74Nga Piyɛri ko: “Ni ne bɛ galon tigɛra, Ala kana n to, ne tɛ cɛɛ nin lɔn fewu.” O yɔrɔnin bɛ, dondo kasira.

75O tuma na, Piyɛri hakili jigira Yezu ka kuma na Yezu tun y'o min fɔ a ye ko: “Yan ni dondo ka kasi, i bɛn'a fɔ sinyɛ saba ko i tɛ ne lɔn.” Piyɛri bɔra luu kɔfɛ ka kasi kosɛbɛ.