2 Peter 2

Ewe 2014 (EƲEGBE BIBLIA)

← Chapter 1 Jump to: Chapter 3 →

1Abe ale si aʋatsogbeƒãɖelawo do ɖe amewo dome tsã ene la, nenemae aʋatsonufialawo hã le dodo ge ɖe mia dome. Woato ayemɔ dzi ahe aʋatsonufiafia si agblẽ nu la vɛ. Ame siawo agbe nu le woƒe Aƒetɔ si xɔ wo ƒle la ŋutɔ gɔ̃ hã gbɔ. Woƒe nuwɔna ana woatsrɔ̃ wo ɖokui kaba.

2Ame geɖewo akplɔ woƒe agbe baɖa nɔnɔ ɖo, ale be le aʋatsonufialawo ta la, amewo agblɔ nya vlowo ɖe nyateƒemɔ la ŋu.

3Esi wonye ŋuklẽlawo ta la, woakpa alakpanyawo atsɔ akpɔ viɖe le mia ŋui. Wobu fɔ aʋatsonufiala siawo tso blema ke da ɖi, eye ame si le wo tsrɔ̃ ge la meɖe ŋu ɖi kpɔ o.

4Le nyateƒe me la, Mawu mekpɔ nublanui na mawudɔla mawo esi wowɔ nuvɔ̃ o, ke boŋ etsɔ wo ƒu gbe ɖe dzomavɔʋe si do viviti tsiɖitsiɖi la me, bene woadzra wo ɖo ɖe afi ma, ne woava drɔ̃ ʋɔnu wo.

5Nenema ke Mawu mekpɔ nublanui na ame siwo nɔ xexea me le Noa ŋɔli la hã o. Ena tsi ɖɔ hetsrɔ̃ ame mavɔ̃mawu siwo katã nɔ xexea me la keŋkeŋ, negbe Noa, ame si ɖe gbeƒã be amewo newɔ nu dzɔdzɔe kple ame adrẽ bubu ko Mawu ɖe le eme.

6Ena dzo tsrɔ̃ Sodom kple Gomora gbidii wozu dzowɔ ɖeɖe. Ewɔ wo be woazu kpɔdzidze na ame mavɔ̃mawu bubu, siwo ava nɔ agbe la.

7Mawu ɖe Lot, dzɔdzɔetɔ la, ame si ƒe susu ame vɔ̃ɖiwo ƒe agbe vlo nɔnɔ ɖe fu na.

8Ame dzɔdzɔe sia nɔ ameawo dome gbe sia gbe. Ese nu siwo katã nɔ edzi yim, eye wòkpɔ wo kple ŋku hã, ale ameawo ƒe sedzidada ɖe fu na eƒe susu ŋutɔ.

9Nenye be Aƒetɔ la wɔ esia la, ekema eya ŋutɔ nya ale si wòaxɔ ame siwo vɔ̃nɛ la ɖe agbe tso woƒe tetekpɔwo me, eye wòadzra nu madzɔmadzɔ wɔla ɖo va se ɖe ʋɔnudrɔ̃gbe la be woahe to nɛ.

10Ewɔa esia, vevietɔ na ame siwo nɔa agbe ɖe nuvɔ̃ɖi siwo dzroa woƒe ameti blibo la nu, eye womebua ŋusẽ si ɖua wo dzi la ɖe naneke me o. Aʋatsonufiala siawo nye ame mabunuwo. Wodzea wo ɖokui ŋu, eye ne wole nya vlowo gblɔm ɖe ŋutikɔkɔetɔ siwo le dziƒo ŋu la, vɔvɔ̃ meɖoa wo wodzona nyanyanya o.

11Evɔ la, mawudɔla siwo ŋu ŋutete kple ŋusẽ le sãa wu ame siawo kura gɔ̃ hã, metsoa wo nu tso woƒe nu vlo wɔwɔ ŋu na Aƒetɔ la gbeɖe o.

12Ame siawo le abe gbemelã manyanu, siwo dzɔdzɔme wɔ be ame natre mɔ́ alé awu la ene. Wogblɔa nya vlo ɖe nu si gɔme womese o la ŋu. Woatsrɔ̃ ame siawo abe ale si amewo tsrɔ̃a gbemelã mawoe ene.

13Woakpe fu, ɖe fu si wona amewo kpe la nu. Woɖua agbe le ŋkeke me elabe wobunɛ dzidzɔdonamenui. Wonye ŋukpenanuwɔlawo kple ame ƒoɖiwo. Wobɔa ha kpli mi ɖua azã, evɔ wònye wo ɖokui flum wole be yewole agbe ɖum hafi.

14Woto ahiãwɔŋku eye wo tsɔtsɔ wɔ nuvɔ̃e metia wo o. Woblea ame siwo meli ke o la. Womla woƒe dzi ɖe ŋukeklẽ ŋu. Mawu ƒe fiƒode le ame siawo dzi.

15Wotra mɔ, elabe wogbe mɔ dzɔdzɔetɔ la dzi toto. Woto Bileam, Beor vi la ƒe ʋe me. Eya kpɔa dzidzɔ le viɖe si wòakpɔ le nu gbegblẽ wɔwɔ me la ŋu.

16Ke woka mo na Bileam, esi wòda Mawu ƒe se dzi. Eya ŋutɔ ƒe tedzie ƒo nu nɛ abe amegbetɔ ene, eye wòxe mɔ na aɖaʋanu si wɔm eya, Mawu ƒe gbeƒãɖela la le.

17Aʋatsonufiala siawo le abe vudo siwo medzia tsi o, alo abe alilikpo si ƒom ahom le kple du la ene. Woawoe Mawu dzra teƒe ma, si do viviti tsiɖitsiɖi la da ɖi na.

18Woƒoa nu dàdatɔe eye wogblɔa movinyawo. Wozɔna ɖe nuvɔ̃ɖi, siwo dzroa woƒe ameti bliboa la nu, eye wodzea ha heblea ame siwo gbe nu le agbenɔnɔ vɔ̃ɖi, siwo gbɔ wosí le eteƒe medidi o la.

19Ame siawo doa ablɔɖe ŋugbe na amewo, evɔ la, woawo ŋutɔ nye nu fitifiti wɔwɔ ƒe kluviwo, elabe ne nane ɖu ame dzi la, amea zu nu ma ƒe kluvi.

20Ne amewo to sidzedze mía Aƒetɔ kple Xɔla Yesu Kristo me, sí le nu siwo ƒoa ɖi ame le xexe sia me la nu, kasia ko nu mawo ke gagbugbɔ va lé wo, heɖu wo dzi la, agbe si ƒomevi wova nɔna le nuwuwu la gblẽna wu esi wonɔ tsã.

21Ne ɖe ame siawo megaxanya naneke kura le nu dzɔdzɔe wɔwɔ ƒe mɔ la ŋu o la, ne enyo na wo wu, be woanya mɔ sia vɔ agagbugbɔ ɖe megbe tso se kɔkɔe si Mawu de na wo la gbɔ.

22Nu si dzɔ ɖe wo dzi la ɖee fia kɔtɛe be lododo siawo nye nyateƒe: “Avu si tru la gbugbɔ yi eya ŋutɔ ƒe tutru la gbɔ” kple “Ha si wole tsi na nyuie lae nye ekem gale mimlim le ba me.”

← Chapter 1 Jump to: Chapter 3 →