1 Chronicles 28

Fulfulde Adamawa Bible

← Chapter 27 Jump to: Chapter 29 →

1Daawuda mooɓti mawɓe Isra'iila fuu haa Urusaliima: Baaba-ci'e'en e hoore'en geɓe huuwanooɓe laamiiɗo e ardiiɓe dow honooɓe ujineere e ardiiɓe dow honooɓe teemerre e aynooɓe marle e dabbaaji e ɓikkoy laamiiɗo e saraaki'en e suusɓe e marɓe daraja fuu.

2Laamiiɗo Daawuda dari, wi'i: “Naneeɗam, onon deerɗiraaɓe am e ummaatoore am! Mi anniyino nyiɓugo suudu siwtordu ngam sundukru alkawal Jawmiraawo e ngam jooɗorde Allah meeɗen. Mi taaskani nyiɓugo.

3Ammaa Allah wi'i yam: An a nyiɓataa suudu ngam innde am, ngam a waɗi konuuji ɗuuɗɗi, a rufi ƴiiƴam.

4Jawmiraawo Allah Isra'iila suɓi yam nder saare baaba am haa mi laato laamiiɗo Isra'iila haa foroy, o suɓi Yahuuda ngam haa o laato ardiiɗo, nder danygol Yahuuda boo o suɓi saare baaba am. Caka ɓiɓɓe baaba am boo, ɗum fottani mo o waɗammi laamiiɗo dow Isra'iila fuu.

5Jawmiraawo hokki yam ɓiɓɓe ɗuuɗɓe. Caka maɓɓe o suɓi ɓiyam Suleymaanu haa o jooɗo dow leeso laamu Jawmiraawo, dow Isra'iila.

6Jawmiraawo wi'i yam: Ɓiya Suleymaanu nyiɓan suudu am e babe am. Ngam mi suɓi mo o laato ɓiɗɗo am, min boo mi laato baaba maako.

7Mi tabitinan laamu maako haa foroy, to o tiinake ɗowtanaago umrooje am e kiitaaji am bana hannde boo.

8Ngam maajum yeeso Isra'iila, jama'aare Jawmiraawo e yeeso Allah meeɗen, linye umrooje Jawmiraawo Allah mooɗon, ɗowtane ɗe haa on mara lesdi mboondi ndi'i, on marna ndi ɓiɓɓe mooɗon boo haa foroy.

9An boo, ɓiyam Suleymaanu, teddin Allah baaba maaɗa, jaggana mo bee ɓernde laaɓnde e nafsu ma fuu. Ngam Jawmiraawo ɗon linya ɓerɗe fuu o anndi anniyaaji e numooji. To a waylitake heedi maako, o waŋgante. Ammaa to a acci mo, o wudinte haa foroy.

10Hakkil jonta, ngam Jawmiraawo suɓi ma nyiɓana ɗum haykaliiru seniindu. Sey a semmbiɗa, a naŋnga kuugal.”

11Nden Daawuda hokki Suleymaanu suura zawleeru haykaliiru e cuuɗi maaru e cigorɗi maaru e cuuɗi dowji e geɓe haa nder haykaliiru e suudu jooɗordu ngam kefergal.

12O tinndini mo boo kuuje ɗe numooji maako anndini mo fuu: Haala babe haa haykaliiru Jawmiraawo e cigorɗi taarotooɗi ndu e ndesaaje kuuje cenaaɗe

13e haala geɓe liman'en e Lewi'en e kuuɗe nder haykaliiru Jawmiraawo fuu e kuuje ngam kuugal nder maaru fuu

14e haala teddeeŋga kaŋŋeeri, ngam kuuje koo ɗeye nder kuugal koo ngale e haala teddeeŋga cardi ngam kuuje koo ɗeye nder kuugal koo ngale

15e teddeeŋga kaŋŋeeri ngam jo'inirɗe kaŋŋeeri e pittirlaaji maaji ɗum kaŋŋeeri, fodde teddeeŋga ngam jo'inirɗum fuu bee pittirlaaji muuɗum. Non boo teddeeŋga ngam jo'inirɗe cardi, fodde teddeeŋga ngam jo'inirɗum e pittirlaaji muuɗum, fodde kuuwtinirki jo'inirɗum pittirlaaji fuu nder kuugal.

16Non boo teddeeŋga kaŋŋeeri ngam taabe tamseeje jo'inteeɗe e teddeeŋga cardi ngam taabe cardi.

17Non boo haala tufirɗe e taasaaje e paalon kaŋŋeeri laaɓndi e njardukoy kaŋŋeeri e cardi, fodde teddeeŋga jardugel koo ngele fuu

18e haala gulduɗum uurle kaŋŋeeri laaɓndi bee teddeeŋga muuɗum e suura moota pucci bee nga keruba'en kaŋŋeeri weeɗanɓe bileeji muuɗum'en, suddanɓe sundukru alkawal Jawmiraawo.

19Nden Daawuda wi'i: “Haala ka'a winndaama dow ɗereewol ngol Jawmiraawo hokki yam. Ngol faamtini yam kuuɗe gonɗe haa suura man fuu.”

20Nden Daawuda wi'i ɓiyum Suleymaanu: “Sey a semmbiɗa, a laato cuusɗo, a naŋnga kuugal. Taa hul, taa tampu sam, ngam Allah Jawmiraawo, Allah am wondan bee maaɗa. O accataa ma, o wudintaa ma, haa kuugal nder haykaliiru Jawmiraawo fuu timma.

21Ndaa geɓe liman'en e Lewi'en ngam kuugal nder haykaliiru Jawmiraawo fuu. Marɓe anniya mbooɗka fuu e marɓe anndal fuu ngam huuwugo kuugal koo ngale ɗon ngondi bee maaɗa, non boo mawɓe e yimɓe fuu, ɓe ɗowtanto umrooje ma.”

← Chapter 27 Jump to: Chapter 29 →