1 Timothy 4

Fulfulde Adamawa Bible

← Chapter 3 Jump to: Chapter 5 →

1Ruuhu Allah wi'i laaɓɗum, nder nyalɗe ragareeje yimɓe woɗɓe accan nuɗɗinki, tokkoto ruuhuuji pewooji e ekkitinolji ginnaaji,

2ɗi naafiki'en fewooɓe ekkitinta. Numo ɓerɗe fewooɓe ɓe'e waati, bana njamndi ngulndi jaw wuli ngo.

3Ɓe ɗon kaɗa ɓaŋgo e nyaamugo kuuje feere feere ɗe Allah tagi ngam haa nuɗɗinɓe mo, annduɓe gooŋga, nyaama ɗe bee yettoore.

4Ngam ko Allah tagi fuu ɗum booɗɗum, walaa ko wudinte, to en njaɓi ɗum bee yettoore.

5Ngam wolde Allah e tornde ceni ɗum.

6To a anndini deerɗiraaɓe kuuje ɗe'e, nden kam a laatoto jaggiiɗo Almasiihu Yeesu booɗɗo, nyaamnoowo yoŋki mum bee kubaruwol dow nuɗɗinki e ekkitinol booɗŋgol ngol tokkiiɗa bee tiinaare.

7Ammaa kiccaaji yedduɗi bana ɗi rewɓe nayeeɓe, sey a salo ɗi. Woownu hoore ma haa a yeeɗa nder kulol Allah.

8Woownugo ɓanndu ɗon nafa seɗɗa, ammaa kulol Allah ɗon nafa koo ɗume fuu, ngam ngol waddanan en ngeendam jonta e nder wakkatiiji garanɗi boo.

9Kanjum woni wolde hoolniinde he'iinde jaɓeego bilaa seko.

10Ngam man en ɗon kuuwa bee bone, en ɗon kaɓda, ngam en njo'ini tammunde meeɗen dow Allah geeto. Kaŋko woni Kisnoowo yimɓe fuu, sakkomaa nuɗɗinɓe Almasiihu.

11Umru nuɗɗinɓe kuuje ɗe'e, ekkitin ɓe ɗe.

12Taa goɗɗo yawo ma ngam daliila nderkaaku ma. Laatana nuɗɗinɓe misaalu haa bolle e yahdu e yiide e nuɗɗinki e laaɓeeŋga.

13Suklana jaŋngango ɓe defte ceniiɗe, wasa ɓe, ekkitin ɓe, haa to mi wari.

14Taa yeeba dokkal Ruuhu Allah gonŋgal nder maaɗa, ngal keɓɗa nder annabaaku nde ndotti'en mballini juuɗe muuɗum'en dow maaɗa.

15Suklana kuuɗe ɗe'e, huuw ɗe bee ɓernde ma fuu, ngam haa koo moy fuu yi'a no ɓesdortooɗa yeeso yeeso nder maaje.

16Hakkilan hoore ma e ekkitinol ma bee tiinaare. To a tokkake waɗugo ɗum, a hisnan hoore ma e nananɓe ma.

← Chapter 3 Jump to: Chapter 5 →