Malachi 2

Fulfulde Adamawa Bible

← Chapter 1 Jump to: Chapter 3 →

1“Jonta kam, onon liman'en, umroore nde'e ɗon ngam mooɗon:

2To on nanaay, to on mbaɗaay anniya teddingo innde am, nden kam mi ukkan naaloore dow mooɗon, mi laatinan barkaaji mon naaloore. Ooho, mi naali ɗi, ngam on ngalaa anniya hakkilango koo ɗume.” Non Jawmiraawo honooɓe asama wi'i.

3“Ndaa, mi furkititto danygol mon, mi wiccan coowoowe dabbaaji ɗi on kirsata nder juulɗe mon haa geese mon, ɓe ndufdan on bee maaje fuu.

4Nden on anndan min mi umri umroore nde'e ngam mooɗon, haa alkawal am bee lenyol Lewi tabita. Non Jawmiraawo honooɓe asama wi'i.

5Alkawal am bee maako laatino ngeendam e salaaman. Mi hokki mo ɗum ɗiɗi fuu ngam haa o hulammi. Nden o huli yam, o diwni ngam innde am.

6Kiita gooŋgaaha wonno haa hunnduko maako. Zammba woodaa haa hunnduko maako. O tokki yam bee hoolaare e ɓernde gooŋgaare. O lortini ɗuuɗɓe diga aybeeji maɓɓe.

7Ngam kuugal limanjo ɗum ekkitingo anndal Allah. Yimɓe ɗaɓɓitan kiita haa maako, ngam o nelaaɗo Jawmiraawo honooɓe asama.

8Ammaa onon, on celi laawol bee kiita mon, on ndo'i ɗuuɗɓe nder hakke bee kiita mon. On piisti alkawal am bee lenyol Lewi. Non Jawmiraawo honooɓe asama wi'i.

9Ngam man mi yawni on, mi toskini on yeeso ummaatoore fuu, ngam on kakkilanaay laabi am. Nde on mbaɗi kiita boo, on kiitaaki yimɓe fuu kal-kal.”

10Naa en fuu en ngoodi Baabiraawo gooto na? Naa Allah gooto tagi en fuu na? Koni en zammbotirta? Koni en njawi alkawal ngal Allah haɓɓuno bee kaakiraaɓe meeɗen?

11Yahuuda waɗi zammba nder Isra'iila e nder Urusaliima. Yahuudu'en kuuwi kuuɗe nyidduɗe. Yahuuda soɓni nokkuure seniinde nde Jawmiraawo yiɗi bee te'ugo faanyɓe tokkiiɓe ɗowanteeɗo jananno.

12Mo huuwata irin ɗu'um, Jawmiraawo ta'uma danygol maako diga jooɗorɗe Yaakubu, taa goɗɗo danygol maako yahra dokkal yeeso Jawmiraawo honooɓe asama.

13Woodi boo huunde ɗiɗawre nde on mbaɗata: On ɗon cudda hirsirde Jawmiraawo bee gonɗi e bojji e uumaali, ngam o faalataa dokke mon, o jaɓataa ɗe diga juuɗe mon.

14Ammaa on ɗon ƴama: “Ngam ɗume?” Ngam Jawmiraawo laati ceedoowo hakkunde maaɗa e debbo sukaaku ma. Debbo oo woni kawtiɗɗiraawo ma mo kaɓɓuɗa alkawal bee muuɗum, ammaa a zammbi mo.

15Naa Jawmiraawo laatini on goɗɗo gooto nder ɓanndu e ruuhu na? Ɗume goɗɗo oo ɗaɓɓata? Naa heɓugo ɓikkoy koy Allah hokkata? Ngam maajum kakkilane ko'e mooɗon. Taa goɗɗo zammbo debbo sukaaku muuɗum.

16Jawmiraawo Allah mo Isra'iila wi'i: “Mi ɗon wanya ceergal bana mi wanyirta goɗɗo mo soɓni limce mum bee toonyaare. Ngam maajum kakkilane ko'e mooɗon. Taa on mbaɗa zammba.” Non Jawmiraawo honooɓe asama wi'i.

17On ɗon comna Jawmiraawo bee bolle mon. Ammaa on ɗon ƴama: “Bee ɗume min comni mo?” Bee wi'ugo: “Waɗanɓe halleende fuu ɗon pottana Allah, o ɗon seyoro ɓe.” Malla boo: “Toy Allah kiitoowo gooŋgaajo woni?”

← Chapter 1 Jump to: Chapter 3 →