Acts 14

Fulfulde Bible (Alkawal Kesal) Central Eastern Niger

← Chapter 13 Jump to: Chapter 15 →

1Too, nde Bulus e Barnabas njottii Ikooniya, ɓe natti nder *suudu-wa'ajordu Yahuudu'en, noon no ɓe mboovi waɗgo. Ɓe nga'ajini faa ɗuuɗɓe nder Yahuudu'en e yimɓe goɗɗi leƴƴi ngoonɗini Jawmiraawo.

2Ammaa *Yahuudu'en saliiɓe goonɗingo umminii ɓerɗe *yimɓe ɓe laataaki Yahuudu'en, gam ɓe nganya lilaaɓe.

3E noon fuu ɓe neeɓii toon, eɓe nga'ajina e semmbee iɓɗum to Jawmiraawo. Allah boo hollii wa'aji maɓɓe dow barkaa muuɗum no goonga, gada e hokkugo ɓe baawɗe waɗgo alaamaaji e kuuɗe kaayniiɗe.

4Ammaa yimɓe si'ire Ikooniya cennditii geɓe ɗiɗi, woɓɓe tokki arɗuɓe Yahuudu'en, woɓɓe boo tokki lilaaɓe.

5Sey yimɓe ɓe laataaki Yahuudu'en e Yahuudu'en e aardiiɓe maɓɓe fuu kaɓɓi dabaree torrugo lilaaɓe e ferdugo ɓe kaaƴe faa ɓe maaya.

6Nde lilaaɓe nani ka, sey ɓe nyaari yahago ci'e Listira e Derbe nder lesdi Likooniya e ci'e piliiɗe ndi.

7Toon boo ɓe nga'ajini *Habaru Belɗum.

8Toon nder si'ire Listira e woodi goɗɗo boosɗo dimdaaɗo e mbuusndam, mo meeɗaay daroraago kosɗe muuɗum.

9Emo yewanii wa'aji Bulus. Sey Bulus raari gite ma'ako yi'i emo woodi goonɗinki keyki o yamɗitinee.

10Ndeen o towni voliinde e semmbee o vi'i : — Umma darora kosɗe maaɗa ! Jaawɗum neɗɗo oon rooptii fuɗɗi yahadu.

11Nde jama'aare yi'i ko Bulus waɗi, ɓe ngulli e semmbee nder ɗemngal maɓɓe likooniyaare ɓe mbi'i : — Allaaji nannduɗi e yimɓe njippanake en !

12Ɓe noddiri Barnabas « Jeewus », ɓe noddiri Bulus boo « Hermes », gam kanko woni bolvoowo.

13Wuro to ɗum sujjidanta gumki maɓɓe bi'eteeɗum Jeewus e toon nattiroyde si'ire. Goɗɗo liimaanjo Jeewus waddi ga'i cinngitiraaɗi pihindi, o darnii e dammugal si'ire. Kanko e yimɓe fuu eɓe ngiɗi hirsango lilaaɓe sadaka noon no ɓe kirsiranta gumkiiji maɓɓe.

14Ammaa nde Barnabas e Bulus nani ɗum, ɓe ceeki kolte maɓɓe gam mettam ɓeram.

15Ɓe mbi'i : — Onon worɓe, gam ɗume mbaɗanton nihinii ? Minon maa min yimɓe kama mooɗon. Emin nga'ajina on *Habaru Belɗum gam tuubon, ngooron ɗe'e kuuɗe mehereeje, ngaylitoyooɗon to Allah mo yonki, tagɗo dow e lees e maayo, e ko woni nder ma'ajum fuu.

16Nder jaamanuuji gutiiɗi Allah woorii leƴƴi duuniyaaru fuu tokka laabi mu''en.

17E noon fuu, kuuɗe ma'ako booɗɗe e caaydina mo, emo toɓnana on iyoonde, emo ɓenndinana on nyaamdu nder wakkaci muuɗum, emo nyaamna on nyaamdu, emo velna ɓerɗe mooɗon.

18Ammaa e ɗe'e bolle fuu, da bone lilaaɓe kaɗri hawriinde ndeen hirsango ɓe sadaka.

19Ɓaawo ma'ajum, Yahuudu'en ivoyɓe Antaakiya e Ikooniya ummini hakkiilooji yimɓe, ɓe perdi Bulus kaaƴe, ɓe ndasi mo, ɓe njahari mo ɓaawo si'ire, gam eɓe tammii o maayi.

20Ammaa nde goonɗinɓe ngari kawriti dow ma'ako, o ummii o natti nder si'ire. Jonto o dillidi e Barnabas yahago si'ire vi'eteende Derbe.

21Bulus e Barnabas nga'ajini *Habaru Belɗum toon Derbe, ɓe keɓi goonɗinɓe ɗuuɗɓe. Ɓaawo ma'ajum, ɓe mbittii Listira e Ikooniya e Antaakiya.

22Eɓe cemmbiɗina ɓerɗe goonɗinɓe, eɓe mbaggina ɓe, ɓe ndaroo e semmbee nder goonɗinki maɓɓe. Ɓe mbi'i ɓe : — Sey e torraaji ɗuuɗɗi keɓeten nattugo *laamu Allah.

23Nder koo kaye *ikiliisiya fuu, ɓe cuɓani ɗum darvooɓe. Ɓe cuumii, ɓe mbaɗi do'aare, ɓe kokki ɓe nder junngo Jawmiraawo mo ɓe ngoonɗini.

24Nde ɓe ndaacii lesdi Pisidiya, ɓe ngari Pamfiliya.

25Nde ɓe nga'ajini voliinde Allah nder si'ire Perga, sey ɓe ndilliri si'ire Ataaliya.

26Gada toon ɓe natti akali ndiyam ɓe kooti Antaakiya, toon to ɓe njaɓnoo kokkal barkaa Allah, gam ɓe kuwa kuugal ngal ɓe keyni.

27Nde ɓe ngarti, ɓe kawriti yimɓe ikiliisiya, ɓe ngeccii ɓe ko Allah waɗi gada e maɓɓe, e no o omtirani *leƴƴi ɗi laataaki Yahuudu'en dammugal goonɗingo Yeesu.

28Ɓe mbaali balɗe ɗuuɗɗe toon nder goonɗinɓe.

← Chapter 13 Jump to: Chapter 15 →