Colossians 4

Gaelic (Scottish) (An Tiomnadh Nuadh anns an Eadar-Theangachadh Ùr Gàidhlig 2017 )

← Chapter 3 Jump to:

1A mhaighstirean, thoiribh an rud sin a tha ceart is cothromach dhur seirbheisich, agus fios agaibh gu bheil maighstir cuideachd agaib' fhèin, air nèamh.

2Coisrigibh sib' fhèin do dh'ùrnaigh, a' dèanamh faire innte le taingealachd;

3ag ùrnaigh aig an aon àm air ar son‑ne cuideachd gum fosgladh Dia doras dhuinn airson an fhacail, gus an cuir sinn an cèill dìomhaireachd Chrìosd, dham bheil mise air mo phrìosanachadh,

4airson 's gun dèan mi soilleir e, mar a bu chòir dhomh bruidhinn.

5Coisichibh le gliocas a thaobh nam muinntir a th' air an taobh a‑muigh, a' cleachdadh an ama san dòigh as fheàrr.

6Biodh ur còmhradh an‑còmhnaidh gràsmhor, air a dhèanamh blasta le salann, airson 's gum bi fios agaibh ciamar as còir dhuibh gach neach a fhreagairt.

7A thaobh mo ghnothaichean‑sa gu lèir, innsidh Tichicus — ar bràthair gràdhach 's ar ministear dìleas 's ar co‑sheirbheiseach san Tighearna — mun deidhinn.

8Chuir mi esan thugaibh airson an adhbhair seo fhèin, gum biodh fios aige mur staid, is gun toireadh e cofhurtachd dhur cridheachan,

9agus còmhla ris, Onesimus, bràthair dìleas is gràdhach, a tha dhib' fhèin. Nì iadsan aithnichte dhuibh mun t‑suidheachadh air fad a tha an seo.

10Tha Aristarchus, mo cho‑phrìosanach, a' cur fàilte oirbh, agus Marcas co‑ogha do Bharnabas (mun d' fhuair sibh àitheantan — ma thig e thugaibh, cuiribh fàilte air);

11agus Ìosa, ris an canar Iustus. Is iadsan an aon fheadhainn dhen timcheall‑ghearradh a tha nan co‑luchd‑obrach dhòmhsa airson rìoghachd Dhè, agus tha iad air a bhith nan cofhurtachd dhomh.

12Tha Epaphras — a tha dhib' fhèin — seirbheiseach Chrìosd, a' cur fàilte oirbh, an‑còmhnaidh a' strì gu dùrachdach na ùrnaighean air ur son, airson 's gun seas sibh coileanta is làn‑chinnteach ann an uile thoil Dhè.

13Oir tha mi a' dèanamh fianais dha, gu bheil cùram mòr aige dhuibhse, agus dhaibhsan a th' ann an Laodicèa, agus dhan fheadhainn a th' ann an Hierapolis.

14Tha Lùcas, an lighiche gràdhach, agus Dèmas a' cur fàilte oirbh.

15Cuiribh fàilte air na bràithrean a th' ann an Laodicèa, agus air Nimpha agus an eaglais a tha na taigh.

16Agus nuair a thèid an litir seo a leughadh nur measg, dèanaibh cinnteach gun tèid a leughadh ann an eaglais nan Laodicèanach; agus leughadh sibhse cuideachd mo litir a tha a' tighinn o Laodicèa.

17Agus canaibh ri Archipas, “Thoir an aire dhan mhinistrealachd a fhuair thu san Tighearna — gun coilean thu i.”

18Tha mise, Pòl, a' sgrìobhadh na fàilte seo lem làimh fhèin. Cuimhnichibh air mo phrìosanachadh. Gràs gun robh còmhla ribh.

← Chapter 3 Jump to: