James 4

Gaelic (Scottish) (An Tiomnadh Nuadh anns an Eadar-Theangachadh Ùr Gàidhlig 2017 )

← Chapter 3 Jump to: Chapter 5 →

1Dè a tha ag adhbharachadh chogaidhean is shabaidean nur measg? Nach e seo e, gu bheil ur n‑ana‑miannan a' cogadh nur buill?

2Tha sibh a' miannachadh 's chan eil sìon agaibh: tha sibh a' murt, 's a' sanntachadh, 's chan urrainn dhuibh dad fhaighinn: tha sibh a' sabaid agus a' cogadh. Chan eil sìon agaibh, air sgàth 's nach eil sibh ag iarraidh.

3Tha sibh ag iarraidh 's chan eil sibh a' faighinn a chionn 's gu bheil sibh ag iarraidh gu h‑olc, airson a chosg air ur n‑ana‑miannan fhèin.

4A dhaoine adhaltranacha! Nach eil fios agaibh gu bheil càirdeas ris an t‑saoghal na nàimhdeas do Dhia? Mar sin ge b' e cò a tha ag iarraidh a bhith na charaid dhan t‑saoghal, tha e ga dhèanamh fhèin na nàmhaid do Dhia.

5No a bheil sibh a' smaoineachadh gur ann gun adhbhar a tha an Sgriobtar ag ràdh, “Tha miann farmadach air Dia a thaobh an spioraid a chuir e annainn”?

6Ach tha e a' toirt barrachd gràis. Mar sin tha e ag ràdh: “Tha Dia a' cur an aghaidh na feadhna a tha pròiseil, ach bheir a gràs dhaibhsan a tha iriosal.”

7Ùmhlaichibh sib' fhèin mar sin do Dhia. Seasaibh an aghaidh an diabhail, agus teichidh e uaibh.

8Dlùthaichibh ri Dia, agus dlùthaichidh esan ribhse. Glanaibh ur làmhan, a pheacaich, agus fìor‑ghlanaibh ur cridheachan, sibhse a tha dà‑bhairaileach.

9Bithibh tùrsach is dèanaibh bròn is caoineadh; biodh ur gàire air a thionndadh gu caoidh 's ur n‑aoibhneas gu gruaim.

10Irioslaichibh sib' fhèin an làthair an Tighearna, agus àrdaichidh esan sibh.

11Na bruidhinnibh an aghaidh a chèile, a bhràithrean. Ge b' e cò a bhruidhneas an aghaidh bràthar no a tha a' toirt breith air a bhràthair, tha e a' bruidhinn an aghaidh an lagha 's a' toirt breith air an lagh; ach ma tha thu a' toirt breith air an lagh, chan eil thu nad neach‑cumail an lagha ach nad bhritheamh air.

12Chan eil ach aon reachdadair is britheamh ann — esan a tha comasach air sàbhaladh 's air sgrios. Cò thusa a tha a' toirt breith air do choimhearsnach?

13Èistibh rium, sibhse a tha ag ràdh, “An‑diugh no a‑màireach thèid sinn gu a leithid seo de bhaile is fanaidh sinn bliadhna an sin agus nì sinn marsantachd is nì sinn prothaid.”

14Chan eil sìon a dh'fhios agaibhse ciamar a bhios ur beatha a‑màireach. Oir tha sibh mar cheò a nochdas airson greis 's an uair sin a thèid à sealladh.

15An àite sin, bu chòir dhuibh a ràdh, “Mas e toil an Tighearna e, bidh sinn beò is nì sinn siud no seo.”

16Ach mar a tha, tha sibh a' bòstadh nur n‑àrdan. Tha a h‑uile seòrsa bòstaidh sin olc.

17Mar sin, an neach aig a bheil eòlas air nì ceart a dhèanamh, agus nach dèan e, dhàsan tha e na pheacadh.

← Chapter 3 Jump to: Chapter 5 →