Ecclesiastes 1

Guarani 1996 (Ñandejara Ñe’ẽ ✟)

Jump to: Chapter 2 →

1Ko'ãva ha'e Ñemoñe'ẽhára, David ra'y, mburuvicha vaekue Jerusalénpe, he'íva: Tavy reko poru rei, tavy reko poru rei!

3Mba'épa oguenohẽ yvypóra imba'apo retaitégui ko arapýpe?

4Oime onaséva, oime omanóva, yvy katu ndoikoéi araka'eve.

5Osẽ kuarahy, oike kuarahy, ha ojevy hendaguépe osẽ jey haguã.

6Yvy gotyo oipeju yvytu ha ojere upéi yvate gotyo. Ojere ha ojere pe yvytu! Ojere ha ojere jey!

7Ysyry maymáva ho'a yguasúpe ha yguasu máramo nahenyhẽi. Ysyry ojevy pe osẽ haguégui, oipykúi jey tape oguata haguénte.

8Avave ndaikatúi he'i mba'eichaite pevépa ñane monguerái opa mba'e. Mba'eve ndaipóri ñahendu ha jahecháva ñane mbohory porã vaerã.

9Ndaipóri chéne mba'eve ymave oĩ'ỹ vaekue. Mba'eve ndojejapói chéne, ymave ojejapo'ỹ vaekue. Yvy apére ndaipóri mba'eve ipyahúva!

10Oime vaerã katuete he'íva: “Kóva katu mba'e ipyahúva” Jepevénte upéva oiméma vaekue are ñande ñaime mboyve.

11Umi mba'e ohasávagui tesarái oiko, ha tesaráipe ho'áne mba'e tenondegua, umi ou vaerã upe rire apytépe.

12Che, Ñemoñe'ẽhára, Israel ruvicha vaekue Jerusalénpe,

13ha ajeity ahesa'ỹijo ha aikuaaha'ã arandúpe, opaite mba'e ojejapóva ko arapýpe. Eguatána ehecha pe mba'e pohyiete Tupã omoĩva yvypórape omotĩndy haguã!

14Ha ahecha kuaa opaite mba'e ojejapóva ko arapýpe tavy reko poru reiha, ha'eténte rejokoséva yvytu.

15Ndaikatúi oñekarẽ'óvo ikarẽva ha ndaikatúi ojepapa ojerereko'ỹva!

16Aipórõ ha'e che jupe: “Péina ápe aime, karai mayma omomba'e guasúva, iñaranduvéva opaite mburuvichágui Jerusalén peguarégui, añeha'ãva ahyvykói pypukuve ko'ẽre arandu ha mba'e kuaápe, ha avei tovatavy ha výro rekópe, ahecha kuaa haguãnte avei, upevaha rejokose yvytu”.

18Añetehápe, tuicha javeve arandu, tuichave ne angekói. Reikuaa kuaavévo, upépe katu okakuaa nde reko asy.

Jump to: Chapter 2 →