Numbers 13

Guarani 1996 (Ñandejara Ñe’ẽ ✟)

← Chapter 12 Jump to: Chapter 14 →

1Ñandejára he'i Moiséspe:

2—Eiporavo peteĩ-teĩ Israel ñemoñare apytégui peteĩ myakãhára*f** ha emondo umi 12 toma'ẽ ñemi Canaán retãre, che ame'ẽtava hína Israel guápe.

3Moisés ojapo Ñandejára he'i haguéicha ha omondo Parángui ko'ã myakãhárape: Rubén ñemoñare Samúa, Zacur ra'y. Simeón ñemoñare Safat, Hori ra'y. Judá ñemoñare Caleb, Jefuné ra'y. Isacar ñemoñare Igal, José ra'y. Efraín ñemoñare Oseas, Nun ra'y. Benjamín ñemoñare Paltí, Rafú ra'y. Zabulón ñemoñare Gadiel, Sodí ra'y. Manasés ñemoñare Gadí, Susí ra'y. Dan ñemoñare Amiel, Guemalí ra'y. Aser ñemoñare Setur, Micael ra'y. Neftalí ñemoñare Nahbí, Vapsí ra'y. Gad ñemoñare Gueuel, Maquí ra'y.

4Ãva hína umi kuimba'e Moisés omondóva oma'ẽ ñemi haguã Canaán retãre. Nun ra'ýpe ha'e ombohéra Josué, Oseas rangue.

5Moisés omondóvo chupe kuéra he'i: —Pesẽvo águi tapeho Négueb rupi ha pejupi umi yvytýre.

6Pema'ẽ mba'eichagua tetãpa umíva, heta térã mbovýpa umi ipype oikóva ha ikangy térã imbaretépa.

7Pe ijyvy kuérapa iporã, oikópa tava'i térã táva guasúpe ikorapy jere yvatépa, ha oĩpa hese oñangarekóva.

8Pehecha pe yvýpa iporã térã ivai ha ika'aguýpa. Peñeha'ã peru ñandéve upepegua yva. Parral'a oñepyrũ hi'aju hína upe ramo.

9Yvy ojeiko'ỹha Sin guive, ha'e kuéra oho yvate gotyo, Rehob peve, Hamátpe ojeikeha ypýpe.

10Oike hikuái Négueb rupi Hebrón peve. Upépe oiko Ahimán, Sesai ha Talmai, Anac ñemoñare. Hebrón oñemopu'ã vaekue 7 áño táva Soan Egipto pegua mboyve.

11Oguahẽ hikuái ysyry Escol peve ha upépe oikytĩ peteĩ parral apesã ha omosãingo peteĩ yvyrágui ogueraháva mokõi kuimba'e ijati'ýre. Omono'õ avei granáda ha ígo.

12Pe ysyry ombohéra hikuái Escol, upépe oikytĩ haguére umi parral'a.

13Oiko rire pe tetã rupi 40 ára pukukue, umi oho vaekue oma'ẽ ñemívo ou jey,

14Moisés, Aarón ha opa Israel ñemoñare rendápe, oĩva táva Cadéspe, yvy ojeiko'ỹha Paránpe. Ha'e kuéra omombe'u umi mba'e ohecha vaekue ha ohechauka umi yva oguerúva.

15He'i hikuái Moiséspe: —Roiko pe tetã ore mondo hague rupi ha rojuhu upéva yvy porã ha hi'a hetaha. Kóina ápe umi yva pepegua.

16Umi kuimba'e upépe oikóva katu imbarete, itáva guasu kuéra tuicha ha ñorãirõhára oñangareko hese. Ha pe ivaivéva, rohecha upépe heta kuimba'e ijyvate etereíva, Anac ñemoñare.

17Amalecgua oiko Néguebpe. Umi yvyty rupi oiko hitíta, jebuséo ha amorréo kuéra. Canaangua katu oiko yguasu rembe'ýpe ha ysyry Jordán ypýpe.

18Caleb omokirirĩ opa Israel guápe oĩva Moisés jere rupi, ha he'i chupe kuéra: —Jaha jajeity hi'ári ha ñañemomba'e hese kuéra. Ndahasy mo'ãi.

19Umi oho vaekue hendive katu he'i: —Nahániri, na ñande pu'aka mo'ãi hese kuéra. Ñande ñane kangy ha ha'e kuéra imbarete.

20Ha'e kuéra omyasãi japu Israel ñemoñare apytépe ha he'i hikuái: “Pe yvy nome'ẽi omongaru haguã maymávape. Umi upepegua, kuimba'e yvate meme hína,

21ha rohecha avei ijapytépe kuéra kuimba'e ijyvate etereíva Anac ñemoñare. Hovái kuéra ore roñeñandu tuku ra'y ramo ha ha'e kuéra péicha ore recháne ra'e oma'ẽvo ore rehe.”

← Chapter 12 Jump to: Chapter 14 →