2 John 1

Guarani 2015 (Ñanderuete Ñe’ẽ Porã 2015)

Jump to:

1Che, pe anciáno ahai ko kuatiañe’ẽ pe kuñakaraípe (iglésiape), Ñanderuete oiporavova’ekuépe, ha imembykuérape g̃uarã. Che pohayhu añetehápe, ha ndache añói, opaite umi ohayhúva guive avei pe añetegua.

2Ko añetegua kóva oĩ ñandepype, ha opytáta ñandepype tapia g̃uarã.

3Py’aporã, mborayhu ha py’aguapy Ñandejára Ñanderuete ha Hesu Crístogui toĩ ñanendive, upévare jaiko avei Hesu Crísto Ñanderuete Ra’y añeteguápe.

4Che ningo avy’aite ajohu haguére ne membykuéra apytépe umi oguatáva pe añetegua rapére, Ñanderuete he’iuka haguéicha ñandéve.

5Ko’ág̃a ningo ajerure ndéve, kuñakarai (iglésia), jajohayhu hag̃ua. Ko tembiapoukapy kóva ndaipyahúi jaguerekóma voíkuri ñepyrũ guivéma.

6Ko mborayhu kóva he’ise jaikove hag̃ua Ñanderuete rembiapoukapy he’i háicha. Ko mborayhu rembiapoukapy oñeme’ẽ ñandéve ñepyrũ guive pehendu haguéicha ha jaiko hag̃ua ipype.

7Heta mbotavyhára oñemyasãima yvy apére, umía ombo’e Hesu Crísto ndoúi hague kuimba’e ramo. Umíva ningo mbotavyhára ha crísto gua’u.

8Peñeñangareko porãke ichuguikuéra, anítei pehundi ore rembiapokue, pehupity uvei pene rembiapokue repy renyhẽ porãva.

9Opaite umi ohasáva Hesu Crísto ñe’ẽgui amo gotyove, ndoguerekói Ñanderuete ipy’apýpe. Upe opytáva imba’epype, upéva katu oguereko Túva ha Ta’ýrape.

10Oimérõ oúva pene rendápe, ha ndoguerúi ramo ko mbo’epy heko peguáva, anítei pemog̃uahẽ upéva pende rógape, ha anítei peje ichupe: Eg̃uahẽ.

11Upe he’íva ichupe: Eg̃uahẽ, upéva omoirũ ichupe hembiapo vaípe.

12Heta mba’e arekove ramojepe amombe’uveva’erã peẽme, ndahaiséi katu kuatiárente, aha’ãrõse aha ramog̃uarã pene rendápe, ha oñondive ñañe’ẽ hag̃ua, javy’a porã hag̃ua oñondive.

13Nde ryke poravopyre membykuéra (ambue iglesiayguakuéra) nemomaiteiuka.

Jump to: