2 Peter 2

Guarani 2015 (Ñanderuete Ñe’ẽ Porã 2015)

← Chapter 1 Jump to: Chapter 3 →

1Oikova’ekue ningo avei proféta gua’u ñane retãyguakuéra apytépe, oĩta háicha avei mbo’ehára gua’u omoingétava ñemiháme pende apytépe tekombo’e japu, ombotovévo jepe Hesu Crístope ojoguava’ekue (huguy rupi) ichupekuéra, upévare ha’ekuéra voi ogueru pya’e ojupe g̃uarã iñehundirã.

2Ha heta omoirũtava ichupekuéra hekombo’e vaípe, ha hesekuéra oñeñe’ẽvaíta pe añetegua rape rehe (Evangélio rehe).

3Pláta potágui ha’ekuéra oipytéta pende ruguy, iñe’ẽ japu rupi penembotavýta; Ñanderuete katu ombojovakéma yma guive ichupekuéra, ha katuete oñehundiva’erã hikuái.

4Ñanderuete noperdonaiva’ekue umi yvága rembiguaikuéra (angelkuéra) oñemohembiapo vaiva’ekuépe, oity uvei ichupekuéra pe tenda pypukuetépe (infiérnope) oñembosako’imava’ekue Satanáme g̃uarã, ha upépe Ha’e oñongatu ichupekuéra pe ñembojovakeha árape g̃uarã.

5Ñanderuete noperdonái avei pe múndo ymaguare, osalva uvei Noéme, omyasãi haguére pe justícia, ha hendive 7 hogayguakuérape, Ha’e ombou ramoguare pe amaguasu ko yvy ári.

6Ñanderuete ombokusuguepava’ekue avei umi táva Sodóma ha Gomórra; péva opyta techaukaha ramo oavisa hag̃ua umi tekove vaívape opoi hag̃ua hembiapo vaígui;

7oguenohẽva’ekue uvei pe heko potĩva Lótpe, jepy’apyetépe oikova’ekue umi tekove vaiete apytépe.

8Umi tembiapo vaiete Lot ohecha ha ohenduva’ekue, ára ha pyhare pukukuépe, ombohasyete hi’ánga hekoite peguávape.

9Ñanderuete oguenohẽkuaa umi hese ojeroviávape ijepy’ara’ãgui, umi tekove vaípe katu Ha’e oñongatu pe ñembojovakeha árape g̃uarã,

10ha ijapytepekuéra katuete oĩ umi oikóva ijyvyarigua rete rembipota vai poguýpe omyañáva ichupekuéra, ha noñemomirĩséiva hikuái avave renondépe. Oñembotuichaitereígui ndokyhyjéi oñe’ẽvai hag̃ua avei yvága rembiguáiguasukuéra rehe (ángel ruvicha rehe) jepe.

11Umi ambue yvága rembiguái jepe ipu’aka ha imbareteguasuetevéva (yvyariguágui), nocondenaséi Ñanderuete renondépe hapichakuérape, (Efesoyguakuérape 2,2 6,12 Júdas 8).

12Ko’ã mbo’ehára japu katu ojogua mymba tavýpe, oikóva ojejapyhy ha ojejuka hag̃ua; umi mbo’ehára oñe’ẽvai umi mba’e oikuaa’ỹva rehe, upévare oñehundíta heko vaípe, oñehundi háicha umi mymba tavy.

13Oñeme’ẽta ichupekuéra hembiapo vaikue repy. Ha’ekuéra notĩri ofarrea hag̃ua ára pukukuépe, ovy’a uvei ifarrahápe. Vy’apópe ombohasase peẽme hekombo’e japu penembotavy jey hag̃ua avei okarúrõ penendive.

14Hesakuéra oiko pe kuña reko vai resakuéraicha, tapia ohekáva hapichápe, ha ndopoiséi hembiapo vaígui; juruhe’ẽme oipokua umi hi’ánga ikangývape, ikatupyry ohupity hag̃ua hembipota vai, ko’ãva ningo tekove ñemaldecipyre.

15Ojei Ñanderuete rapégui ha oñedesatina (oñekañy) oguata hag̃ua Balaam, Beor ra’y rape rehe, kóva ohayhueteva’ekue hembiapo vai repy.

16Balaam oñemongavaju hymba búrro kuña ñe’ẽngu rupi, ha’e oñe’ẽvo ijára ndive kuimba’e oñe’ẽ háicha, ha ojoko ijárape ani hag̃ua ojapo hembipota tarova.

17Ko’ã mbo’ehára japu ningo ojogua yvu hi’y’ỹvape ha arai tatatĩnáme, pe yvytu oguerovevéva, ichupekuéra g̃uarã oñembosako’íma peteĩ tenda iñypytũetevéva.

18Iñe’ẽ jererovu yvytu rei, ha’ekuéra oporombotavy ijyvyarigua rete rembipota vai rupi, umi opoiramóvape hembiapo vaígui, ogueraha jevy hag̃ua hape vai rupi.

19Ha’ekuéra he’i ichupekuéra oñemosãsotaha, ndohechakuaái ramojepe ha’ekuéra voi oikoha ijyvyarigua rete rembipota vai rembiguái ramo. Pe opytáva ambue poguýpe péva ningo hembiguái voi.

20Umi opoíva ijyvyarigua reko vaígui, oikuaa ha ojerovia Ñandejára Hesu Crístore, ha uperire ojevy jey ijyvyarigua reko vai rapére, pe heko paha ivaieteve pe iñepyrũguarégui.

21Iporãveva’erãmo’ã ichupekuéra, araka’eve ndoikuaái rire Ñanderuete salvacion rape, ha ani oikuaa rire ojevy hapykuere gotýo, opoívo Ñanderuete rembiapoukapy porãitégui, oñeme’ẽmava’ekue ichupekuéra.

22Ojehúnte ningo ichupekuéra pe ñe’ẽ arandu ha añetegua he’íva: Pe jagua ho’u jevy ig̃ue’ẽngue (ivomitokue), ha kure katu oñembojahupyre oñembyapajeréi jevy tujúpe, (Provérbios 26,11).

← Chapter 1 Jump to: Chapter 3 →