2 Thessalonians 3

Guarani 2015 (Ñanderuete Ñe’ẽ Porã 2015)

← Chapter 2 Jump to:

1Ipahápe, ore hermanokuéra, peñembo’éke orerehe, Hesu Crísto ñe’ẽ porãite ta’iñasãi porã ohóvo ha tojejerovia hese, ojehu haguéicha pende apytépe.

2Ha peñembo’e Ñanderuetépe, Ha’e tañandepe’a tekove vai ha ñaña poguýgui, ndaopavavéi mba’e ningo pe jerovia.

3Hesu Crísto ndopoimo’ãi iñe’ẽ ome’ẽva’ekuégui, Ha’e voi penemombarete ha oñangarekohína penderehe mba’epochýgui.

4Ore rojerovia Ñanderuete rehe Ha’e penemomandu’a ha ojapoukapataha iñe’ẽ ore rombohasamava’ekue peẽme ha peẽ pejapomapeína avei.

5Hesu Crísto tapenepytyvõ pehechakuaa porã hag̃ua pende py’apýpe Ñanderuete mborayhu añeteguáva ha peha’ãrõkuaa hag̃ua Hesu Crísto ou jevy peve.

6Roikuaauka ningo peẽme, ore hermanokuéra, Ñandejára Hesu Crísto rérape, pejeíke opaichagua hermáno oiko reisévagui ha ndoguatáiva Ñanderuete rapére, ore pombo’e haguéicha.

7Peikuaa porã voi peẽ peñeha’ãmbava’erãha peiko hag̃ua ore roiko haguéicha (pende apytépe), ore ndoroiko reírigui,

8ore ndoro’úi pene rembi’u jopói ramojepe, ore po rembiapo rupi ore rohupity ore rembi’u repy, ore romba’apo pohýigui ára ha pyharépe rohupity hag̃ua ore remikotevẽ ani hag̃ua orepohýi avavépe pende apytépe.

9Ore roguereko ramojepe pe derécho peẽ oremongarúvo, ore ndoroiporuséi koichagua derécho, ore rohechaukase uvei peẽme mba’éichapa peẽ peikova’erã (ore ejémplo rupi).

10Roimérõ gueteri pende apytépe ore ro’euka voiva’ekue peẽme ko ñe’ẽ kóva: Upe omba’apose’ỹva, anítei okaru.

11Rohendu ningo oĩha pende apytépe umi oiko reíva, nomba’apóiva, oha’ãrõnte hikuái ambuekuéra omboja’o hag̃ua imba’évagui ichupe g̃uarã avei, ko’ãvape ore ro’e omba’apova’erãha avei (1 Tesalonicayguakuérape 4,11).

12Umívape ore ro’euka ha rohekombo’e Ñandejára Hesu Crísto rérape tomba’apo py’aguapýpe ha to’u hembi’uteéva.

13Peẽ katu, che hermanokuéra, ani penekane’õ pejapo hag̃ua mba’e iporãva.

14Oime ramo pende apytépe peteĩ ojapose’ỹva ko kuatiañe’ẽme he’íva, pehecha mávapa, ha ani pejehe’a hese, ha’e otĩ hag̃ua.

15Opáichavo, anítei peguereko ichupe penderehe ija’e’ỹva ramo, pehekombo’énte uvei ichupe pene hermánoicha.

16Hesu Crísto, pe py’aguapy Jára, tome’ẽ peẽme ipy’aguapy peiko porã hag̃ua oñondive opaite árape ha opaite hendápe ipy’aguapýpe.

17Che, Páblo, che potee rupi pomomaiteiuka ko kuatiañe’ẽ rupi ha amoĩ che réra peẽ peikuaa hag̃ua che voi ahai hague ko kuatiañe’ẽ kóva, amoĩ haguéicha opaite ambue che kuatiañe’ẽme avei.

18Ñandejára Hesu Crísto poriahuvereko toĩ opavave penendive.

← Chapter 2 Jump to: