Deuteronomy 31

Guarani 2015 (Ñanderuete Ñe’ẽ Porã 2015)

← Chapter 30 Jump to: Chapter 32 →

1Ko’ã ñe’ẽ Moises ombohasa mayma Israelguakuérape,

2ha he’i ichupekuéra: Ko árape arekóma 120 áño ha ndaikatúi ajapo porãmba che rembiapo; ha Ñanderuete he’íma avei chéve: Nderehasamo’ãi amo Jordan mboypýri.

3Ñanderuete, Ñandejára ohasáta Jordan mboypýri, pene renonderãme; Ha’e ohundíta tetãnguéra pene renonde peguávape, ha ijyvy opytapáta pene mba’erã ramo; Josue penemyakãta ha ohasáta pene renonderãme, Ñanderuete he’i haguéicha.

4Ha’e ojapóta hesekuéra, ojapo haguéicha Sehon ha Og rehe, Amorgua retã ruvichakuéra, ohundívo ichupekuéra.

5Ha Ñanderuete omoĩva’erã ichupekuéra pende pópe, pehundi hag̃ua ichupekuéra Ha’e he’i hagueichaite peẽme.

6Peñeha’ã ha peñemombaretéke; ani pekyhyjétei, ha ani peñemondýi ichuguikuéra, Ñanderuete, Ñandejára, ohóta penendive; Ha’e ndopoimo’ãi pendehegui ha napenemotyre’ỹmo’ãi.

7Ha Moises ohenói Josuépe ha he’i ichupe mayma Israelguakuéra rovake: Eñeha’ãke ha eñemombaretéke, nde remoingéta ko tetãme, pe yvy Ñanderuete he’imava’ekue ñande ypykuérape ome’ẽtaha, ha nde remboja’óta ichupekuéra g̃uarã ijyvyrã.

8Ñanderuete ohóta ne renonderãme; Ha’e oĩta nendive, ndojeimo’ãi ndehegui ha nanemotyre’ỹmo’ãi; ani rekyhyjétei ha ani reñembopy’amirĩtei.

9Ha Moises ohai ko’ã tembiapoukapy peteĩ kuatiañe’ẽme ha ome’ẽ pa’ikuérape ha Levi ñemoñarenguérape, ogueraháva Ñanderuete karameg̃ua, ha avei mayma Israel karai ancianokuérape.

10Ha Moises he’i ichupekuéra: Ohasa rire, cáda 7 áño, pe perdon áñope, pe yvyra rogue róga aretépe (enramáda),

11mayma Israelgua ouva’erã oñembyaty hag̃ua Ñanderuete, Ñandejára renondépe, pe yvy pehẽngue Ha’e oiporavotahápe, upépe oñemoñe’ẽva’erã ko’ã tembiapoukapy opaite Israelguakuéra apysápe.

12Pembyatyukava’erã opaite pene retãyguakuérape: Kuimba’e, kuña ha mitãkuéra, ha umi tetã ambueygua oikóva pende tavakuérape, ohendu ha oikuaa hag̃ua hikuái, ha tokyhyje Ñanderuete, Ñandejáragui, ha toñeñangareko ojapo hag̃ua hekoitépe hembiapoukapykuéra Ha’e he’i hagueichaite.

13Ha iñemoñarenguéra ndoikuaáiva gueteri ko’ã tembiapoukapy tohendu ha toikuaa avei hikuái okyhyje hag̃ua, Ñanderuete, Ñandejáragui, pehasa rire Jordan mboypýri ha peñemomba’e rire Canaan yvy rehe.

14Ha Ñanderuete he’i Moiséspe: Péina ápe hi’ag̃uíma remano hag̃ua; ehenói Josuépe ha peha’ãrõ pe óga jojohuhápe amoĩ hag̃ua ichupe ne rendag̃uáme (icárgope). Ha Moises ha Josue oho oha’ãrõ hag̃ua pe óga jojohuhápe.

15Ha Ñanderuete ojehechauka pe óga jojohuhápe, pe arai oñembo’ýva mbyte guive; pe arai opyta pe óga jojohuha rokẽ ári.

16Ha Ñanderuete he’i Moiséspe: Péina ápe, nde rekétama (remanótama) nde rukuéra ndive, ha ko tetã kóva oñemoĩ jevýta cherehe omomba’eguasu hag̃ua ambue jarakuérape pe tetã oikepotávape, upérõ opoíta chehegui ha opyrũta che ñe’ẽ ame’ẽmava’ekue rehe ichupekuéra.

17Upe ára upévape Che chepochýta hendivekuéra, ha apoíta avei ichuguikuéra añomívo che rova ichuguikuéra, upémaramo Israel oñehundíta heta mba’evai ha jepy’apy pohýi rupi ha he’iva’erã hikuái upe árape: Ndoúipa ñandeári ko’ã mba’evai Ñanderuete opoígui ñandehegui.

18Añetetehápe upe ára upévape Che añomíta che rova ichuguikuéra oñemboyke haguére hikuái chehegui ha omomba’eguasu haguére ambue jarakuérape.

19Ko’ág̃a pehai ko purahéirã ha pembo’e Israel ñemoñarenguérape; pemoĩ ijurukuérape ko purahéi kóva, oiko hag̃ua chéve techahare ramo Israel ñemoñarenguéra apytépe.

20Che amoingéta ichupekuéra pe yvy aprometeva’ekuépe ituvakuérape, kamby ha eíra osyryhápe; ha okaru porã ha ikyrapa rire oñembojeréta ha ohóta hikuái ambue jára rapykuéri omomba’eguasu hag̃ua ichupekuéra, ha chembopochýta opyrũgui hikuái che ñe’ẽ ame’ẽmava’ekuére ichupekuéra.

21Ha ojehu ramo ichupekuéra heta mba’evai ha jepy’apyeta, upevove ko purahéi opytáta che techahare ramo iñemoñarenguéra jurúpe; Che aikuaapa voi mba’épa ojapose hikuái, ojehu mboyve ha amoinge mboyve ichupekuéra pe yvýpe aprometeva’ekue ichupekuéra.

22Ha pe árape Moises ohai ko purahéi kóva, ha ombo’e Israel ñemoñarenguérape.

23Ha Ñanderuete he’iuka Josue, Nun ra’ýpe: Eñemombaretéke ha eñeha’ãke, nde remoingéta Israel ñemoñarenguérape pe yvýpe aprometeva’ekue, ha Che aĩta nendive.

24Ha Moises ohaipávo ko’ã tembiapoukapy peteĩ kuatiañe’ẽme,

25he’i umi Levigua oguerahávape Ñanderuete karameg̃ua,

26pejapyhy ko tembiapoukapy kuatiañe’ẽ ha pemoĩ pe karameg̃ua ykére, ha topyta upépe techahare ramo peẽme g̃uarã.

27Che aikuaa voi peẽ peñemoĩtaha tapia Ñanderuete rehe ha napeneñe’ẽrendupái hague che aikove aja ha katuete ivaivéta che amano rire.

28Pembyatyukapa chéve mayma pende tríbu ruvichakuéra, ha pende karai ancianokuérape, ha ha’éta ijapysapekuéra ko’ã ñe’ẽ, ha ahenóita yvy ha yvagakuérape techahare ramo.

29Che aikuaáma voi ág̃a amano rire, katuete peñemboheko vaipataha ha pepiataha pe tape che ha’évagui peẽme; ha pene renonderãme outaha mba’evai, pejapógui ivaíva Ñanderuete resa renondépe, pembopochývo Ñanderuetépe pene rembiapo vai rupi.

30Upéramo Moises ombohasa Israel atyguakuéra apysápe ko purahéi kóva:

← Chapter 30 Jump to: Chapter 32 →