bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Guarani
/
Guarani 2015 (Ñanderuete Ñe’ẽ Porã 2015)
/
Exodus 39
Exodus 39
Guarani 2015 (Ñanderuete Ñe’ẽ Porã 2015)
← Chapter 38
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 32
Chapter 33
Chapter 34
Chapter 35
Chapter 36
Chapter 37
Chapter 38
Chapter 39
Chapter 40
Chapter 40 →
1
Pe aorã (páño) hovývagui, pytãvagui ha pytãũvagui ojejapo pe ao umi omba’apóvape g̃uarã pe óga jojohuhápe, péicha ojejapo ao pa’iguasu Aarónpe g̃uarã, Ñanderuete he’i haguéicha Moiséspe.
2
Ojapo avei pe póncho mbyky pa’i omondéva, órogui, aorã (páño) hovývagui, pytãvagui, pytãũvagui ha líno inimbo ojepokapyrégui.
3
Ha omopererĩ pe óro ha oikytĩ ichugui inimbóicha oipyaha hag̃ua pe aorã hovýva, pytãva, pytãũva ha líno inimbo jepokapyre pa’ũme; tembiapo porãitéva ojejapo.
4
Ojapo avei hikuái mokõi jokoha opytáva Aaron ati’y ári ombojoaju hag̃ua umi póncho mbyky apýra oñondive.
5
Pe ku’a jokuaha oĩva pe póncho mbyky rehe ojejapo avei aorã hovýva, pytãva, pytãũva ha líno inimbo ojepokapyrégui, Ñanderuete he’i haguéicha Moiséspe.
6
Ha ombosako’i mokõi ita vera pytãva ha ãva omboguapy óro jeguaka rehe, ha ojehai hese Israel ra’ykuéra réra,
7
ha omoĩ pe póncho mbyky ijyke rehe ijati’y ári; ko’ãva rupi oiko hag̃ua mandu’a Israel ñemoñarenguéra rehe, Ñanderuete he’i haguéicha Moiséspe.
8
Pe voko pyti’a rehegua ojejapo avei ojejapo haguéicha pe póncho mbyky: Órogui, aorã hovývagui, pytãvagui, pytãũvagui ha líno inimbo jepokapyrégui.
9
Ijyke irundyve peteĩchante ipuku 22 centímetro, ha ipe avei 22 centímetro.
10
Ha oñoña (omoinge) hese irundy ita vera rysýi. Hysýi peteĩháme oĩ peteĩ ita vera pytãũ, peteĩ ita vera sa’yju, peteĩ ita vera hovy, ko’ãva oĩ tysýi peteĩháme.
11
Hysýi mokõiháme, oĩ peteĩ ita vera pytã, peteĩ ita vera hovyũ ha peteĩ ita vera omimbietéva.
12
Hysýi mbohapyhápe, oĩ peteĩ ita vera sa’yjuvy, peteĩ ita vera sakã para ha peteĩ ita vera sakã pytã.
13
Hysýi irundyhápe, oĩ peteĩ ita vera hovy kangy, peteĩ ita vera sakã pytã rovy ha peteĩ ita vera para hũ ha morotĩ maymaitéva oñeñoñambyre óro rehe.
14
Ha umi ita vera rehe ojehai Israel ra’ykuéra réra onace haguéicha; péicha ojehai umi ita vera rehe umi 12 Israel tríbu réra.
15
Ojapo avei pyti’a rehegua voko’ípe g̃uarã mokõi sã’i ojepokapyréva órogui.
16
Ojapo avei mokõi ñeñoñambyre (jeguaka) ha mokõi argólla ha omoĩ ko’ã mokõi argólla pe pyti’a rehegua voko mokõive apýra rehe,
17
ha omoĩ hese mokõive sã’i oroguiguáva umi mokõi argólla kuápe oĩva pe pyti’a rehegua voko apýra rehe,
18
ha ombojoaju umi ambue sã’i apýra pe póncho mbyky ati’y rehe; osãingo hag̃ua henonde gotýo.
19
Ha ojapo avei mokõi argólla órogui ha omoĩ pe pyti’a voko mokõive apýra rehe, pe pyti’a voko ruguái rembe’ýre.
20
Ojapo avei mokõi argólla órogui ha omoĩ pe póncho mbyky ati’y rehe, yvy gotýo, iku’a ypýpe, pe póncho mbyky ku’a jokuaha ári.
21
Ha oñapytĩ pe pyti’a voko argollakuérare pe póncho mbyky argólla rehe peteĩ sã’i hovýpe, opyta hag̃ua pe póncho mbyky ku’a jokuaha ári, ani hag̃ua pe pyti’a voko ha pe póncho mbyky ojei ojuehegui, Ñanderuete he’i haguéicha Moiséspe, peichaite ha’e ojapoukapa avei.
22
Ojapo avei pe póncho puku opytáva pe póncho mbyky guýpe. Pe póncho puku ojejapo aorã (páño) hovýgui meme.
23
Ijajúra kuára oĩ imbytépe, ojejapo háicha pe soldádo pyti’a mo’ãha vakapirekueguiguáva, ha ikuára oñemohembe’y jere, ani hag̃ua osoro.
24
Ha pe póncho puku ruguái jerére omoĩ hikuái granada’a (yva) ra’ãnga, ojejapova’ekue aorã hovývagui, pytãvagui ha pytãũvagui.
25
Ojapo avei campana’i oroitégui, ha omoĩ hikuái umi campana’i umi granada’a ra’ãnga pa’ũme.
26
Omoĩ peteĩ campana’i ha upéi peteĩ granada’a ra’ãnga ha ambue campana’i ha ambue granada’a ra’ãnga pe póncho puku ruguái rembe’y jerekuévo, Ñanderuete he’i haguéicha Moiséspe, peichaite ojejapopa avei.
27
Umi oipyaha porãkuaávante omba’apo pe póncho puku rehe ha ojapo pe póncho puku líno inimbo porãgui Aaron ha ita’yrakuéra oiporu hag̃ua.
28
Pe akã rehegua fája ojejapo avei líno inimbo porãgui, ha péicha avei pe víncha, ha umi calzonzíllo mbyky (chulu) ojejapo líno inimbo ojepokapyrégui.
29
Pe ku’a jokuaha ojejapo líno inimbo porãgui, aorã hovývagui, pytãvagui ha pytãũvagui, Ñanderuete he’i haguéicha Moiséspe, peichaite ojejapopa avei.
30
Ojapo avei ivíncha órogui ha ohai hese: Oñemboykéma Jahvépe g̃uarã.
31
Ha omoĩ hese peteĩ sã’i hovýva omohenda hag̃ua iñakã fája rehe, Ñanderuete he’i haguéicha Moiséspe, peichaite ha’e ojapoukapa.
32
Péicha ojejapopa pe óga jojohuha rembiapo; ha Israel ñemoñarenguéra ojapopa Ñanderuete he’i haguéicha Moiséspe.
33
Upéi ogueru hikuái opaite óga jojohuha rembiporu Moises rendápe: Tábla, alfajía, horconguéra, postekuéra, ipyendakuéra;
34
pe aosãingo ovecha pirekue oñemopytãmbyréva, pe aosãingo vaka ypegua pirekue hepýva, pe aosãingo omboja’óva umi mokõi óga jojohuha kotyguasu ojuehegui;
35
pe karameg̃ua ha hi’yvakuéra, pe karameg̃ua juru ñembotyha,
36
pe mesa, opaite hembiporukuéra reheve, pe pan oñemoĩva Ñanderuetépe g̃uarã.
37
Pe tataindyenda hemiendy’inguéra reheve, ha opaite hembiporukuéra reheve, pe acéite ohesape hag̃ua pe tataindyenda,
38
pe kuave’ẽmby renda oroguiguáva, acéite oñemona hag̃ua, mba’e ryakuã porã rehe, pe aosãingo pe óga ojeikehápe g̃uarã;
39
pe kuave’ẽmby renda bronceguiguáva iparrílla bronceguiguáva reheve, hi’yvakuéra ha opaite hembiporukuéra reheve, pe yrenda ipyenda reheve;
40
umi aosãingo korapy rehe g̃uarã, ipóste ha ipyendakuéra reheve, pe aosãingo pe korapy ojeikeha pegua, isã ha iposte’ikuéra reheve, ha opaite ambue hembiporukuéra reheve ojeporúva pe óga jojohuhápe g̃uarã;
41
pa’iguasu ao Aarónpe g̃uarã ha pa’i ao ita’yrakuérape g̃uarã.
42
Ñanderuete he’i haguéicha Moiséspe, peichaite Israel ñemoñarenguéra ojapo avei opaite tembiapo.
43
Ha Moises oma’ẽ opaite tembiapo rehe, ha péina ojapopa hikuái Ñanderuete he’i hagueichaite, ha Moises ohovasa ichupekuéra.
← Chapter 38
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 32
Chapter 33
Chapter 34
Chapter 35
Chapter 36
Chapter 37
Chapter 38
Chapter 39
Chapter 40
Chapter 40 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25
26
27
28
29
30
31
32
33
34
35
36
37
38
39
40