Haggai 1

Guarani 2015 (Ñanderuete Ñe’ẽ Porã 2015)

Jump to: Chapter 2 →

1Pe tetã ruvicha Darío oisãmbyhy jave hi’áño mokõiháme, pe ára peteĩha, pe jasy 6-hápe, Ñanderuete ñe’ẽ ou proféta Hagéo rupi Zorobabel, Sealtiel ra’ýpe, ha’e oiko ramoguare Juda retã ruvicha ramo; ha Josue, Josadac ra’y, oiko ramoguare pa’iguasu ramo, ha he’iuka ichupekuéra:

2Péicha he’i ángel atykuéra Jára ko tetã kóvape: Ne’ĩra gueteri piko og̃uahẽ pe ára oñemopu’ã jevy hag̃ua pende Ruete rogaguasu.

3Upévare pende Ruete ñe’ẽ ou pe proféta Hagéo rupi, ha he’i:

4Iporã piko peẽ peiko óga oñembojeguakapávape, ha che rogaguasu itapere gueteri.

5Upévare ángel atykuéra Jára he’iuka peẽme: Pejepy’amongeta porãke pende jehasa asykue rehe.

6Heta peñemitỹva’ekue ha sa’i pemono’õ, pekaru ha napeneryg̃uatãi, pey’u ha pendey’uhéi gueteri, peñemonde ha napeñembyakúi, ha upe omba’apóva ndohupitýi hembiapo repykue, ku ñemono’õhára ombyatyrõ guáicha pe trígo vosa sorópe.

7Péicha he’i pende Ruete: Pejepy’amongeta porãke pende jehasa asy rehe.

8Tapeho cérrope ha pegueru yvyra pemopu’ã jevy hag̃ua che rogaguasu, ha chepy’arory ha peẽ chemomba’eguasu jevýta, he’i pende Ruete.

9Heta peheka ha sa’i pejohu, ha pembyaty heta ramojepe pende rógape, upépe Che voi ambyaipa jevýta. Mba’érehe piko kóa, he’i pende Ruete. Che róga itaperégui, ha peẽ peteĩteĩ pejepy’apýnte pende rogakuérare.

10Upévare pe ára ojoko pe ysapy, ha pe yvy ojoko avei hi’akuéra.

11Ha che namongyvéi ko tetã cerrokuérape, pende trigotýpe, pende parraltýpe, pende olivotýpe ha opaite mba’e yvy omoheñóivape, tetãyguakuéra ha tymbakuéra guive ha opaite tembiapo pejapóvape g̃uarã.

12Ha ohendu Zorobabel, Sealtiel ra’y, ha Josue, pe pa’iguasu Josadac ra’y, ha opaite tetãyguakuéra ohendu Ñanderuete, Ijára ñe’ẽ, ha umi ñe’ẽ Hagéo he’íva ha oikuaa porã hikuái Ñanderuete ombou hague Hagéope ha Ha’e omyenyhẽ avei ichupe Ipytu Porãitégui.

13Upéramo Hagéo, Ñanderuete remimbou, ombohasa hetãyguakuérape Ñanderuete ñe’ẽ ha he’i: Che ningo aĩ’aína penendive, he’iuka pende Ruete.

14Ha Ñanderuete omombáy Zorobabel, Sealtiel ra’y pytu porã, ha’e ningo pe mburuvicha, ha pe pa’iguasu Josue, Josadac ra’y pytu porã, ha opaite tetãygua pytu porã, ha ou omba’apo hikuái Ñanderuete, Ijára rogaguasurãme.

15Ha péva ojehu Darío oisãmbyhy jave pe ára 24-hápe, pe jasy 6-hápe ha pe áño mokõiháme.

Jump to: Chapter 2 →