Hebrews 12

Guarani 2015 (Ñanderuete Ñe’ẽ Porã 2015)

← Chapter 11 Jump to: Chapter 13 →

1Ñande jaguerekógui ñande jerekuévo ku araícha heta techahare ojeroviaitéva, upévare jaipe’a ñandejehegui opaite mba’e ñandejopýva ha ñandejokoséva, ha avei pe angaipa ñanemoñuhãséva, ha ñañani paciéncia reheve pe carréra oñemoĩva ñane renonderãme.

2Ha ñama’ẽ Hesu rehe, Ha’e voi ñande jerovia apohare, hendive ñañepyrũ jajerovia ha hendive ñag̃uahẽ ñande jerovia ru’ãme. Hesu oha’ãrõ pe vy’a outavahína ichupe g̃uarã, upévare Ha’e ohasa asy ha omano ikurusúre otĩ’ỹre. Ha ko’ág̃a Ha’e oguapyhína Ñanderuete yke akatúape.

3Pejepy’amongeta porãke Hesu Crísto rehe, mba’éichapa umi tekove vai omoĩ vaisénte ichupe, Ha’e katu ogueropu’akapa, ani hag̃ua pene ánga ikane’õ ha pendepy’amano.

4Ne’ĩra gueteri peẽ peñorãirõ angaipa ndive oñeñohẽ meve pende ruguy, (Lúcas 22,44).

5Ha peẽ penderesaráima pe tekombo’égui he’íva peẽme: Che ra’y ani ndepochy térã ndepy’akangy Ñanderuete ndehavira ramo, (Provérbios 3,11-12).

6Ñanderuete ningo ohekombo’e pohýi umi ohayhúvape ha ohavira umi oikóvape ita’ýra ramo.

7Peropu’aka porãkena Ñanderuete jehavira, Ha’e pendeguerekógui ita’yrakuéra ramo. Moõ piko oĩ ta’ýra, itúva ndohaviráiva ichupe (oiko porã hag̃ua).

8Ha Ñanderuete napendehavirái ramo, Ha’e ojapo háicha opaite ita’ýra ndive, upéicharõ peẽ ndaha’éi ita’yrateéva, ita’yrangánte uvei peẽ.

9Pepensa porãke ñande rukuéra yvy pegua ñandehavira ramojepe, ñande ñamomba’e ichupekuéra; mba’érehe piko aipórõ nañañemomirĩséi ñande pytu Ru renondépe jaikove hag̃ua.

10Umíva ningo mbovy ára ñandehavira hi’ã háichante ichupekuéra, kóva katu ñanerekombo’e ha ñandehavira ñande reko iporãve hag̃ua ha ñande reko ojoguave hag̃ua Hesu Crísto reko porãme.

11Añetehápe opaichagua jehavira jahasa asy aja, nañanembovy’amo’ãi, hasy uvei; upéi katu hi’a justícia ha py’aguapy, umi ojepokuaávape g̃uarã.

12Upévare pemombarete jevy pende jyva ikane’õva ha pene renypy’ã ikangýva.

13Pemyatyrõ pende rape ikarẽva, ani hag̃ua pende pykuéra ikaráu, tokuera uvei.

14Peñeha’ãke peiko hag̃ua py’aguapýpe opavave ndive ha peñemboheko porã, ko’ãva’ỹre avave ndohechamo’ãi Hesu Crístope,

15ha peñangareko porãke ani hag̃ua avave pende apytépe omboyke Ñanderuete mborayhu ni ijopói (Hesu Crísto) ha péva ojehúta peiko ramo py’arópe pende rapicha ndive, koichagua teko ningo penemongy’a ha penemyangekõi ha ováta heta hapicha rehe.

16Anítei oime pende apytépe peteĩ opoíva Ñanderuetégui, ojehu haguéicha Esau ndive; okaru porã hag̃uánte ha’e, ovende ta’ýra ypykue reko, (Génesis 25,31).

17Peikuaa voi ningo uperire, Esau ohupityse hague avei itúva jehovasa, itúva katu ombotove ichupe. Heta tesay reheve oheka itúva ohovasa peve ichupe avei; pe jehovasa iporãvéva katu oñeme’ẽmba jepéma, (Jacóbope).

18Peẽ napeñembojaiva’ekue pe cérro rehe (Israelguakuéraicha), ikatúva rehe ojepoko oĩháme tata hendýva, arai hũetéva, pytũmby ha yvytu jepoka.

19Ha napehendúi avei pe turu (trompéta) pu ni Ñanderuete ñe’ẽ. Upéramo Israelguakuéra ojerure asy anive hag̃ua Ha’e oñe’ẽ ichupekuéra.

20Ha’ekuéra ndaikatúi ogueropu’aka Ñanderuete ñe’ẽ ni pe mba’e Ha’e he’íva guive: Mymba jepe opokórõ pe cérro rehe tojejuka, ojeitývo hese ita omano meve, (Éxodo 19,13).

21Ha oporomondyietereígui umi ohecháva guive ko’ã mba’e, Moises jepe he’i: Aryryipa akyhyjégui.

22Peẽ katu peñemboja uvei cérro Sion rehe, Ñanderuete oikovéva tavaguasu rehe, ha’eha pe Jerusalen yvága pegua ha peg̃uahẽ 10.000-kuéra yvága rembiguaikuéra rendápe,

23ha peg̃uahẽ iglesiayguakuéra onaceva’ekue rendápe, herakuéra ojehaimava’ekue yvágape, ha peg̃uahẽ Ñanderuete ombojovakepáva rendápe ha umi oñemboheko potĩva Pytu Porãmbáva rendápe,

24upépe oĩ avei Hesu Crísto ombojoajúva Ñanderuete ha ita’yrakuéra ha itajyrakuéra pe ñembopy’apeteĩ (jekupyty) pyahu rupi, ome’ẽvo huguy ñande jahupitykuaa hag̃ua pe perdon; huguy oñe’ẽ porãve Abel ruguýgui.

25Peñeñangareko porãke anítei pemboyke Ñanderuetépe napeneñe’ẽrendúivo ichupe, Ha’e oñe’ẽ jave peẽme. Umi oñemboykeva’ekue ichugui ndaikatúi okañy, Ha’e oñe’ẽ ramoguare ichupekuéra yvy apére, ha mba’éichapa ñande ñakañýta ñañemboykese ramojepe Ñanderuetégui, oñe’ẽva ñandéve yvága guive.

26Umi ára umívape Ñanderuete ñe’ẽ omboryrýita pe yvy; Ha’e he’i avei: Peteĩ jevy gueteri Che amomýita ndaha’éi yvy año, pe yvága jepe avei.

27Ko ñe’ẽ rupi Ñanderuete he’ise, Ha’e oipe’ataha peteĩ jevy umi mba’e oñemomyiva’ekue omoĩ hag̃ua hendaguépe umi mba’e oñemomyi’ỹva’erãva.

28Pe tetãrã Ñanderuete ome’ẽtava ñandéve noñemomyiriva’erã, upévare jaagradece, ha ñaneñe’ẽrendu ichupe, ñambohorývo ichupe py’a ñemomirĩ ha kyhyjepópe.

29Ñanderuete ningo tata oporombokusuguepáva.

← Chapter 11 Jump to: Chapter 13 →