James 5

Guarani 2015 (Ñanderuete Ñe’ẽ Porã 2015)

← Chapter 4 Jump to:

1Peikuaa porãke, peẽ mba’eita rerekoha, peẽ pejahe’ova’erã pe jehasa asy oútava peẽme g̃uarã.

2Pene mba’eita itujupa, pende ao ho’upa aoraso (polílla).

3Pende óro ha pende pláta havẽmba ha havẽngue oñemoĩta penderehe ha ho’upáta pende ro’o (rete) tatáicha, pembyatýgui mba’eita ko’ã ára pahápe jepe.

4Peikuaa porãke, peẽ pembohavira ha peipe’a reíva pende koga’a mono’õhára rembiapo repy, ijahe’o katu osapukái hatã yvága atykuéra Jára apysápe.

5Peikóva vy’apópe yvy ape ári, pejapóva karuguasu, pemongyráva pende py’apy, og̃uahẽmbotáma ramojepe pe jejukaguasu ára.

6Peẽ pembojovake ha pejuka reiva’ekue heko potĩvape, ha’e katu nopu’ãi penderehe.

7Che hermanokuéra, peha’ãrõkuaa kirirĩháme Hesu Crísto ou jevy peve. Pema’ẽ pe kokue jára rehe, ha’e oha’ãrõkuaa ikoga’a hi’a peve, og̃uahẽ rire pe ama tenondegua ha opakuevogua.

8Upéicha peẽ peha’ãrõ avei, pemombarete katu pende py’apy, Hesu Crísto ou jevytamahína.

9Ani peñomoĩ vai ojupe, che hermanokuéra, ani hag̃ua peñembojovake peẽ. Peikuaa, pe mbojovakehára oĩhína okẽme.

10Che hermanokuéra, pema’ẽ umi proféta rehe, oñe’ẽva’ekue Ñanderuete rérape, mba’éichapa ha’ekuéra ohasa asy paciéncia reheve, upévare peñeha’ãmba peẽ avei peiko hag̃ua ha’ekuéra oiko haguéicha.

11Peikuaa porãke, ore rovy’aite umi oha’ãrõkuaáva ndive ohasa asy haguére. Peẽ pehendúma mba’éichapa Job ohasa asyva’ekue ha oha’ãrõkuaa Ñanderuete oipytyvõ meve ichupe, Ha’e ipy’aporãgui oiporiahuvereko voi ichupe.

12Hi’ariete, che hermanokuéra, peñemongeta ramo pende rapicha ndive, anítei pemoañeteve pene ñe’ẽ yvága réra rehe, térã ko yvy kóva réra rehe térã ambue mba’e réra rehe, (Matéo 5,34). Pejérõ héẽ (néi), peje ovale hag̃ua ha pejérõ nahániri, topyta nahániri. Umi ndohechakuaáiva péva oñembojovakéta.

13Oime ramo pende apytépe peteĩ ohasa asýva, toñembo’e; ha oime ramo peteĩ ovy’áva, topurahéi, omomba’eguasu hag̃ua Ñanderuetépe.

14Oime ramo pende apytépe peteĩ ikangýva térã hasýva tohenói karai ancianokuérape (umi omoakãvape pe iglésia rembiapo) ha ha’ekuéra toñembo’e hese, ha tomona hese acéite Hesu Crísto rérape,

15ha pe ñembo’e jerovia rehegua osalváta pe ikangývape térã hasývape, ha Ñanderuete omopu’ãta ichupe, ha oñemoangaipárõ oñeperdonáta ichupe,

16upévare pemombe’u ojupe pene angaipa, (tembiapo vai) ha peñembo’e ojuehe, Ñanderuete penemokyre’ỹ ha penemonguera hag̃ua. Heko potĩva ñembo’e heta mba’e ojapokuaa.

17Elías peteĩ tapicha ñandeichagua avei; ha’e oñembo’e ramoguare okyve’ỹ hag̃ua, ndokyvéi yvy apére mbohapy áño ha 6 jasy pukukue.

18Ha oñembo’e jevývo, pe ama ho’a jevy áragui, ha pe kóga heñói porãmba jevy hi’a peve.

19Che hermanokuéra oime ramo pende apytépe peteĩ opiáva pe añetegua rapégui, ha oime ramo ambue hermáno ombojevýva ichupe,

20peikuaa porãke, pe hermáno ombojevýva iñermánope hape vaígui, osalvaha pe opiava’ekue ánga (ñemanógui) ha ojaho’i (oñeperdona) heta hi’angaipa.

← Chapter 4 Jump to: