Jeremiah 40

Guarani 2015 (Ñanderuete Ñe’ẽ Porã 2015)

← Chapter 39 Jump to: Chapter 41 →

1Nabusaradan ojohu rire Jeremíaspe umi jepokuapyhakuéra apytépe ojegueraha jave Babilóniape, omosãso ichupe.

2Upe soldádo ruvicha omosãsóvo Jeremíaspe he’i ichupe: Upe oiko tapia g̃uarãva, nde Jára he’íkuri ko’ã mba’evai ojehutaha ko tetã kóvape;

3pende Ruete voi ojapo ko’ã mba’e he’i hagueichaite; peñemohembiapo vai haguére pende Ruete ndive g̃uarã, ha napehendúigui iñe’ẽ, upévare ou pendeári ko’ã mba’evaiete.

4Ha ko’ág̃a che ajoráma pe cadéna nde pógui. Ha oĩ porã ramo ndéve, ikatu reju chendive Babilóniape, ha che añangareko porãta nderehe, ha nderejuséi ramo chendive Babilóniape, epyta. Ema’ẽ, pe yvy tuichakue oĩ ne renondépe; tereho rehosehápe ha epyta revy’ahápe.

5Repytase ramo, tereho jevy Gedalías, Ahicam ra’y, Safan remineno (niéto) rendápe, Babilónia retã ruvicha omoĩva’ekue ichupe mayma Juda pegua tavakuéra ári, ha eiko hendive ne retãyguakuéra apytépe, térã tereho rehosehápe. Ha Nabuzaradan ome’ẽ ichupe hembi’urã ha peteĩ jopói, ha omomaitei paha ichupe.

6Upéramo Jeremías oho Mizpápe, Gedalías, Ahicam ra’y rendápe, ha oiko hendive ambue tetãyguakuéra apytépe, umi hembyva’ekue apytépe.

7Umi soldádo ha imburuvichakuéra oikóva sarambihápe ñu rehe, ohendúvo hikuái pe Babilónia retã ruvicha omoĩ hague Gedalías, Ahicam ra’ýpe, tetã sãmbyhyhára ramo, ha omoĩ hague ipoguýpe opaite kuimba’e, kuña, mitãkuéra ha umi imboriahúva ndojeguerahaiva’ekue Babilóniape,

8ou hikuái Mizpápe, Gedalías rendápe; ko’ãva ningo umi ouva’ekue: Ismael, Netanías ra’y; Johanan ha Jonatan, Carea ra’ykuéra; Seraías, Tanhumet ra’y; Efai ra’ykuéra, ha’e ningo peteĩ Netofaygua; ha Jaazanías, Maacaygua ra’y, ha opaite umi kuimba’e hendive oĩva.

9Ha Gedalías, Ahicam ra’y, Safan niéto ome’ẽ ichupekuéra ha ikuimba’ekuérape iñe’ẽ, he’ívo: Ani pekyhyjétei peiko hag̃ua Caldeayguakuéra rembiguái ramo; pepyta ha peiko ko tetãpýpe, ha peiko Babilónia retã ruvicha rembiguái ramo ha oho porãmbáta peẽme.

10Che katu apytáta Mizpápe, añe’ẽ hag̃ua penderehe Caldeayguakuérape ou ramo ñane rendápe; ha peẽ pemono’õkuaa umi yva arahaku jave ha pejapo víno ha acéite, ha peñongatu pene rembi’u ryrúpe ha pepyta pende táva peñemomba’e haguépe.

11Ha ou avei mayma Judaygua oikova’ekue Moab ha Edómpe, Amon ñemoñare apytépe, ha umi oikóva opaite ambue tetãme, ohendu vove hikuái Babilónia retã ruvicha omohembymimi hague hapichakuérape Juda retãme, ha omoĩ hague hi’arikuéra Gedalías, Ahicam ra’y, Safan remineno,

12oupa hikuái ko’ã Judaygua oĩ haguégui ha oñemosarambi haguégui, ha ou hikuái Juda retãme, Mizpápe, Gedaliás rendápe; ha ombyaty hikuái heta víno ha koga’aita.

13Ha Johanan, Carea ra’y, ha mayma soldádo ruvicha okañymava’ekue ñu rupi, ou hikuái Mizpápe, Gedalías rendápe.

14Ha he’i hikuái ichupe: Ndereikuaáipa Baalis, umi Amon ñemoñare retã ruvicha, ombouha Ismael, Netanías ra’ýpe, ndejuka hag̃ua. Gedalías, Ahicam ra’y, ndogueroviái katu ichupekuéra.

15Upéramo Johanan, Carea ra’y, he’i ñemiháme Gedalíaspe, oĩva Mizpápe: Che aháta ajuka hag̃ua Ismael, Netanías ra’ýpe, ha avave ndoikuaamo’ãi. Mba’érehepa ha’e ndejukáta, ha mayma umi Judaygua ijatyva’ekue guive nde ypýpe isarambipa jevýta, ha Juda rembyremi opáta.

16Ha Gedalías, Ahicam ra’y, he’i Johanan, Carea ra’ýpe: Ani rejapo peichagua mba’e, japu reígui pe nde eréva Ismael rehe.

← Chapter 39 Jump to: Chapter 41 →