Job 7

Guarani 2015 (Ñanderuete Ñe’ẽ Porã 2015)

← Chapter 6 Jump to: Chapter 8 →

1Ndojoguái piko kuimba’e rekove ko soldádo rembiapópe térã umi omba’apóvape estánciape.

2Ku tembiguái oha’ãrõ háicha kuarahy’ã, ha pe omba’apóva oha’ãrõ háicha hembiapo repykue,

3péicha aha’ãrõ avei opa hag̃ua che jehasa asy, ha che mba’asy vai añandúva heta pyhare ha jasykuéra.

4Añeno jave, ha’e: Araka’épa ikatu apu’ã jevy. Pe pyhare katu oñembopukuete, ha che py’a tarovaite ko’ẽtĩ meve.

5Che ro’o hasopa ha yvy timbo oñu’ã che rete, che pire ojeka ha iperepa.

6Ha che rekove ára ohasa pya’eve ao oipovõva júgui ha naha’ãrõvéi mba’eve iporãva che renonderãme.

7Nemandu’a, che Ruete, che rekove voi ningo yvytúicha, ha che resakuéra ndohechavéi mba’eve iporãva.

8Umi tesa cherecháva ag̃amive ndacherechamo’ãvéita, ha nde resa oma’ẽ jevy ramo cherehe, che rekove opa rei ha amanóma.

9Ku arai ohasa háicha, upéicha hína pe oguejýva omanóva retãme, katuete ndojevyvéima araka’eve.

10Ndojevymo’ãi hógape, ha hogayguakuéra hesaráita ichugui.

11Upévare ndajokomo’ãi che juru, amombe’use katu che py’apy jehasa asy ha che ánga ñembyasy.

12Che piko yguasu térãpa mymba y pegua ndetuicháva, Nde chejoko hag̃ua.

13Ha che ha’e ramo: Che rupa chemoangapyhýta ha ombovevúita che mba’asy,

14upérõ katuete che kéra chemondýi vaiete ha techapáype ahecha umi ta’ãnga chemongyhyjepáva.

15Upévare iporãve Nde chejuvy, che ánga omanoseve uveígui.

16Chekuerái che rekovégui, upéicha ndaikosevéima, cherejánte tamano, che ára ningo yvytu rei voínte.

17Mba’e piko pe yvyarigua, Nde rehechakuaa hag̃ua ichupe ha rejepy’apy hag̃ua hese.

18Mba’érehepa reñandu ichupe ko’ẽ ko’ẽ rehe, ha reha’ã ichupe opytu’ukuaa’ỹre.

19Araka’épa remboykéta nde resa chehegui, amokõ jevy hag̃ua che rendymi jepe.

20Che rembiapo vai ramojepe, mba’eichagua ne rembiapo piko ambyai, Nde ore Ñangarekohára. Mba’érehe piko Nde cheporavo, cheapi hag̃ua opaite árape, che rekove ipohyietereíma chéve g̃uarã.

21Ha mba’éguipa ndaikatúi Nde remopotĩ che rembiapo vai ha rejohéi che reko ky’a, ag̃aite akéta yvy guýpe, ha chereka jevy ramo, ko’ẽrõ ndaikomo’ãvéima.

← Chapter 6 Jump to: Chapter 8 →

Recommended Reading

Commentary Job Commentaries → Devotional Job Devotional Guide → Get This Bible Guarani (Ñanderuete Ñe’ẽ Porã ) Study Bible →