Joel 3

Guarani 2015 (Ñanderuete Ñe’ẽ Porã 2015)

← Chapter 2 Jump to:

1Péina ápe, umi ára umívape, Che aguenohẽ jevýta Jerusalen ha Judayguakuéra cárcelgui.

2Ambyatýta opaite tetãme, ha aguerupáta ichupekuéra Josafat ñúme (vállepe), ha upépe ambojovakéta ichupekuéra, che retã Israel rehehápe, ha’ekuéra omosarambipa haguére ambue tetãnguéra apyte rupi, ha omboja’opa haguére che yvy, Israel retã,

3ha che retãygua rehe oityva’ekue hikuái po’a jeporavo, ha ome’ẽ hikuái umi mitãkuimba’e peteĩ kuña reko vai repy rehe, ha mitãkuñakuéra víno ho’umíva rehe.

4Ha avei peẽ, Tíro, Sidon ha Filistéa retã tuichakue, mba’épa pejapose. Pemyengoviase piko Che ajapova’ekue penderehe térã peẽ voi peñorãirõse chendive, peju pya’e Che aity jevy hag̃ua hepykue pene akã ári.

5Pegueraha haguére che pláta, che óro ha che mba’erepy iporãva pemoingepa hag̃ua pende tupãópe.

6Peẽ peme’ẽkuri pirapire rehe Jerusalengua ha Judayguakuérape ojegueraha hag̃ua Grécia retãme, pemomombyry hag̃ua ichupekuéra hetãteégui.

7Peikuaa porãke: Che voi agueru jevýta ichupekuéra opaite tetãgui peẽ peme’ẽ haguégui ha amyengoviáta pene rembiapo vaikue pene akã ári.

8Ha Che avendéta avei pende ra’ykuéra ha pende rajykuéra Judayguakuérape, ha ha’ekuéra ovende jevýta umi Sabayguápe, peteĩ tetã mombyryetévape, upéva Che, pende Ruete, ha’éma.

9Peikuaauka ko’ã mba’e tetãnguéra apytépe, peñembosako’i peñorãirõ hag̃ua, pemombáy umi ipy’aguasúvape, toñemboja joaite hikuái, toupaite umi kuimba’e ikatupyrýva ñorãirõme.

10Pejapo kyse puku pende aradokuégui, ha yvyra puku akua pende kyse peiporúvagui pende parraltýpe, ha pe ikangýva te’i: Chembarete.

11Pya’e peñembyaty ha peju, opaite tetãnguéra ijerekuévo oikóva guive toñembyatypa joaite; upépe nde, che Ruete, eraha nde soldadokuérape.

12Topáy umi tetã ha tou joa Josafat ñúme (vállepe), upépe Che aguapýta ambojovake hag̃ua opaite tetãnguérape oikóva guive Israel jerekuévo.

13Peikytĩ kyse ty’ãime (fóicepe), hi’ajupámagui ñemitỹnguéra. Peju ha pemboguejy pe parral’a ojehykue’ohápe, henyhẽma ha oñehẽma umi mba’yrúgui, iñañaitereíguima hikuái.

14Heta tetã oñembyaty pe ñemono’õha ñúme, hi’ag̃uietéma Ñanderuete ára, pe ñemono’õha válle.

15Iñypytũmbava’erã pe kuarahy ha pe jasy, ha mbyjakuéra nahendymo’ãvéima.

16Ñanderuete okororõta Sion guive, ha Jerusalen guive oñe’ẽ hatãta, ha oryryipáta yvága ha yvy, Ñanderuete katu omo’ã ha osalváta hetãme.

17Peikuaa porãta Che ha’eha pende Ruete, pende Jára, Siónpe oikóva, che cérro aiporavova’ekuépe ha Jerusalen oikóta pe yvy poravopyre ramo, ha tetã ambueygua nombopoguymo’ãvéi ko táva kóvape.

18Ha umi ára umívape umi cérro omondykyva’erã parral rykue, ha umi cérro ykégui osyryva’erã kamby, ha opaite Juda pegua yakãnguéra (arróyo) osyry porãva’erã; ha osẽta peteĩ yvu pende Ruete rogaguasúgui, ha ombohykuéta pe ñu Sitim pegua.

19Egípto yvy inandíta, ha Edómgui oikóta yvy perõ ojapo vaiete haguére Juda ra’ykuéra rehe ha oñohẽ rei haguére hikuái Israelgua ruguy.

20Ha Israelguakuéra oikóta tapia g̃uarã Judápe ha Jerusalénpe,

21Ha Ñanderuete omyengoviapáta hese ija’e’ỹva rembiapo vai, ha uperire Ha’e voi oikóta Siónpe.

← Chapter 2 Jump to: