Jonah 2

Guarani 2015 (Ñanderuete Ñe’ẽ Porã 2015)

← Chapter 1 Jump to: Chapter 3 →

1Upémaramo Jonas oñembo’e Ñanderuete, Ijarateépe, pe pira rye guive,

2ha he’i: Che jepy’apy asy pa’ũ guive ahenói che Ruetépe ha Nde cherendu, omanóva retã rugua guive che rohenói ha Nde rehendu che ñe’ẽ.

3Nde chereityuka y ipypukuvehápe, yguasu mbytépe, che jerekuévo y meménte oĩ, ha pe y pochy ohasa cheári cheñu’ãmba peve.

4Upémaramo che ha’e: Añemosẽma nde resa renondégui ha ndahechamo’ãvéi nde rogaguasu.

5Yeta cheñu’ã chepytupa peve, chembojere yguasu pypukuete, ygáu (plánta) oñu’ãmba che akã.

6Aguejy umi tugua pypukuete peve, pe y chejoko iñembotýpe ha añandu péva tapia g̃uarã, Nde katu reguenohẽ che rekove che ñeñoty rendágui (sepultúragui), Nde voi ningo che Ruete, che Jaratee.

7Che ánga omanóta jave, chemandu’a nderehe, che Ruete, che ñembo’e og̃uahẽ ne rendápe, nde rogaguasúpe.

8Umi omomba’eguasúva ijára gua’úpe, oñemomombyry nde jeporiahuverekógui.

9Che katu aikuave’ẽse ndéve che kuave’ẽmby, che agradecimiénto reheve, ha ko’ág̃a ajapóta katuete Nde reipotáva guive. Nde voínte reguenohẽkuaa yvyariguakuéra ijejopy vaietégui.

10Ha Ñanderuete omondo pe piraguasu y rembe’ýpe og̃ue’ẽ (ovomita) hag̃ua ichugui ha upéicha oity Jonáspe y rembe’ýpe.

← Chapter 1 Jump to: Chapter 3 →