Malachi 2

Guarani 2015 (Ñanderuete Ñe’ẽ Porã 2015)

← Chapter 1 Jump to: Chapter 3 →

1Pa’ikuéra, ko ñe’ẽ kóva peẽme g̃uarã:

2Peẽ napeneñe’ẽrendúi ha napeñemomirĩri ramo chemomba’eguasúvo, he’i ángel atykuéra Jára, amondóta pende ári maldicion ha amaldecíta pende jehovasa, peẽ napeñemomirĩrigui.

3Cháke, Che ambyaíta pene ñemitỹnguéra, ha pende rova rehe amombóta pene rymba repoti, peẽ peikuave’ẽva chéve, ha upéi Che pomomboukáta okápe, pene rymba repoti oĩháme.

4Péicha peikuaáta Che ame’ẽ hague che ñe’ẽ Levípe, he’i ángel atykuéra Jára.

5Che ñe’ẽme’ẽ omoingove ha ombopy’aguapy ichupe, upévare Che ha’e ichupe oñemomirĩ ha oñeme’ẽmba hag̃ua che pópe oikove hag̃ua.

6Tekombo’e añetegua oĩkuri Levi jurúpe, ha ñaña reko ndojejohúi ijurúpe, py’aguapy ha justícia reheve ha’e oikókuri chendive, ha hetápe ojoko ani hag̃ua oñemoangaipa.

7Umi pa’i jurúpe ojejohúta pe arandu, ha ijurúgui hetãyguakuéra oha’ãrõ tekombo’e, ha’égui voi Ñanderuete proféta.

8Peẽ katu peñemboyke Levi rape porãgui, pene rekombo’e vai rupi pemoñepysãnga hetápe ha pembyai pe ñembopy’apeteĩ Levi ndive.

9Upévare Che voi pomotĩ ha pomomirĩ pene retãyguakuéra renondépe, ha péva ojehu peẽme ndapeguatáigui che rapekuérare ha napeñangarekói haguére che rembiapoukapy rehe.

10Ndajaguerekói piko peteĩnte Ñanderuete ha nañande’apói piko ra’e Yvága Jára. Ha mba’érehe piko peñombotavy ha pepyrũ ñande ypykuéra ñe’ẽme’ẽ rehe.

11Juda oñemboykéma Ñanderuete rapégui, Israel ha Jerusalengua oñemongy’áma, Judayguakuéra oiporu vai che rogaguasu, Che ahayhúva, omenda ambue jára gua’u rehe.

12Ñanderuete tohundi Jacóbo ñemoñarenguéra apytépe umi ojapóva ko’ã mba’evai ha upéi okyhyje’ỹre ou oikuave’ẽ hag̃ua ángel atykuéra Járape.

13Ha upéi peñu’ãmba che kuave’ẽmby renda pende resaýpe, pene rasẽme ha jahe’o sorópe, upévare pende Ruete ndohechaukasevéi ijeporiahuvereko.

14Ha peẽ katu peje gueteri: Mba’upe piko péva. Pende Ruete ohecha porãgui peẽ pepoi haguére pene rembirekoteévagui, peikova’ekue ndive pende karia’y ára guive, ha peme’ẽ hague pene ñe’ẽ peiko hag̃ua hendive (pemano meve).

15Peichagua tembiapo vai avave ndojapomo’ãi, oĩmimi ramojepe ipype pende Ruete Pytu Porãitéva. Mba’épa pende Ruete oha’ãrõ hetãyguakuéragui: Toiko hekoitépe hembireko ndive ikaria’y ára guive (omano meve) ha tohekombo’e imitãkuéra pende Ruete rapekuéra rehe.

16Pende Ruete, Israel Jára, he’gui: Che chepy’aro oimeraẽva ndive opoíva hembirekógui, upévare peñangareko porãke pende pytúre.

17Pene ñe’ẽ rupi pembopochy Ñanderuetépe. Ha peje gueteri: Mba’épepa rombopochy ichupe. Ha peẽ voi pejeve gueteri: Oimeraẽva ojapóva guive mba’evai ombohory Ñanderuetépe, ha umía reheve Ha’e ovy’aite, ha peje avei: Mamo piko oime Ñanderuete ñembojovake.

← Chapter 1 Jump to: Chapter 3 →