Romans 3

Guarani 2015 (Ñanderuete Ñe’ẽ Porã 2015)

← Chapter 2 Jump to: Chapter 4 →

1Aipórõ, mba’eichagua provécho piko Judayguakuéra oguereko oñekytĩ’o haguére.

2Heta, upeichavérõ tenonderãme Ñanderuete ombohasa raẽ Israelguakuérape iñe’ẽ.

3Ha oĩ ramojepe Israelguakuéra apytépe opyrũva Ñanderuete ñe’ẽre, Ñanderuete piko upévare opyrũne avei iñe’ẽre (yvyariguakuéraicha).

4Mba’evéicharamo, upéva rãngue ja’eva’erã: Ñanderuete tapia he’iha pe añeteguáva, ha ñande kuimba’e ha kuña ñandejapuñaína. Ñanderuete kuatiañe’ẽme he’i voi: Ñanderuete ñe’ẽ hi’añete ha Ha’e ombopoguy opaite umi oñemoĩva hese iñembojovake hekoite pegua rupi (Salmokuéra 51,6 Salmokuéra 116,11).

5Ha ñande reko vai ohechauka ramo Ñanderuete reko iporãha, mba’ére piko upéicharamo ja’e Ñanderuete nombojovake porãiha ñandehavira ramo iñembojovakeha árape. Che ningo aporandu kuimba’ekuéra ojepokuaa háichante.

6Mba’evéicharamo, mba’éicha piko péicharamo Ñanderuete ombojovakekuaa hekoitépe opaite tetãyguakuérape.

7Che japu rupi ojekuaavéne ramo Ñanderuete añetegua, mba’erehépa Ha’e chembojovakéta gueteri angaipavóra ramo.

8Upéicharamo, mba’érehe piko ndajajapói mba’evai osẽ hag̃ua mba’eporã. Oĩ voi ningo umi tapicha vai he’íva che amoherakuãha ko japu kóva. Umívape Ñanderuete katuete ombojovakéta hekoitépe, oitývo ichupekuéra aña retãme.

9Ore Judaygua reko iporãve piko tetã ambueyguakuéragui. Mba’evéicharõ, ro’éma voi ningo Judayguakuéra ha tetã ambueyguakuéra avei ho’apamaha voi oñondive angaipa poguýpe.

10Ojehaíma voi Ñanderuete kuatiañe’ẽme: Ndaipóri heko porãva, ni peteĩ añónte jepe,

11ndaipóri peteĩ iñakã porãva, ndaipóri peteĩnte jepe ohekáva Ñanderuetépe,

12opavave opia Ñanderuete rapégui, ndaipóri heko porãva, ndaipóri peteĩmínte jepe (Salmokuéra 14,1-3).

13Ijahy’o kuakuéra ojogua peteĩ sepultúra ojepe’ávape ha ijuru oiporu hikuái oporombotavy hag̃uánte, (Salmokuéra 5,9). Hembe guýpe oĩ mbói pohãvai (ponzóña) (Salmokuéra 140,3).

14Ijuru henyhẽ maldicion (jeharu), ñembotavy ha py’arógui, (Salmokuéra 10,7).

15Ipokuéra ipya’e oñohẽ hag̃ua hapicha ruguy,

16ñehundi ha jejopy vai oĩ hape rupi,

17ha pe py’aguapy rape ndoikuaái hikuái, (Isaías 59,7-8).

18Hesa renondépe ha ipy’apýpe ndaipóri kyhyje Ñanderuetégui, (Salmokuéra 36,1).

19Jaikuaa ningo Moises rembiapoukapykuéra iporãha umi hese oikóvape g̃uarãnte. Opavave juru oñembotyva’erã, oñemboheko vaipáguima Ñanderuete renondépe.

20Ñande kuimba’e ha kuña, ndajajapói hekópe Moises rembiapoukapykuéra, upévare avave ndaikatúi ojesalva Moises rembiapoukapykuéra apópe; Moises rembiapoukapykuéra ningo oĩ ohechauka hag̃uánte opavavépe, ñande ñañemboheko vaimaha, ha opaite yvyarigua angaipavoraha Ñanderuete renondépe.

21Ko’ág̃a katu ojehechaukáma Ñanderuete justícia (tekojoja), Moises rembiapoukapykuera’ỹre, ha péva ojehai voiva’ekue yma guive Ñanderuete kuatiañe’ẽme iprofetakuéra rupi.

22Ha pe tape pyahu rupínte ojehupity Ñanderuete justícia. Ha Hesu Crísto voi ningo Ñanderuete rape pyahu, ambue tape ndaipórigui.

23Opavavete oñemboheko vaipáguima ha oĩmbáguima angaipa poguýpe, upévare ndaikatúi ohupity Ñanderuete reko ojajaipáva.

24Opavave oñemopotĩkuaánte Hesu Crísto rupi, Ñanderuete ipy’a porã haguére ha Hesu Crísto ñandejogua haguére (Satana pógui). Hesu Crísto ningo Ñanderuete jopói (regálo) opaite tetãyguakuérape g̃uarã.

25Ñanderuete oha’ãrõ Hesu Crísto ojejuka peve, ha ko’ág̃a opavave ojeroviáva guive hese ohupity Ñanderuete perdon hi’angaipakuéragui, umi angaipa ymaguare tetãyguakuéra ojapomava’ekue oñeñongatu ojehavira hag̃ua Hesu Crísto ñemano rupi.

26Ñanderuete oha’ãrõ pukuete ohechauka hag̃ua ijustícia ko ára atyguasu kóvape, ha ohechauka hag̃ua avei Ha’énte oikoha hekoitépe, ha operdonase opaite angaipavórape ojeroviaitéva guive Hesu Crísto rehe.

27Moõ piko aipórõ tetãyguakuéra oñembotuichakuaa, mamove. Tetãyguakuéra ojesalvakuaa piko oñeha’ãmba ramojepe ojapo hag̃ua heta tembiapo porã. Nahániri, péva ndaikatúi, ojeroviaite ramo uvei Hesu Crísto rehe.

28Upévare ñag̃uahẽ kóvape: Opaite tetãyguakuéra ohupity iperdon Ñanderuetégui ojeroviaite ramo Hesu Crísto rehe, ha ndaha’éi ojapo haguére Moises rembiapoukapykuéra.

29Térãpa Ñanderuete Judayguakuéra Járante. Nahániri, Ha’e opaite tetã ambueyguakuéra Jára. Ñanderuete opaite tetã ambueygua Jára avei,

30oĩgui peteĩete Jára. Hesu Crístomante operdona ha omopotĩ umi Israelgua oñekytĩ’ova’ekuépe ojeroviaite ramo Hesu Crísto rehe año; ha péicha avei opaite tetã ambueyguakuérape oñekytĩ’o’ỹ ramojepe, ojeroviava’erã Hesu Crísto rehe.

31Ñamboyke piko aipórõ Moises rembiapoukapykuéra ñande jerovia rupi. Nahániri, ñamoĩ porã ha hendaitépe uvei Moises rembiapoukapykuéra.

← Chapter 2 Jump to: Chapter 4 →