Jonah 2

Guarani MBYA (Nhanderuete ayvu iky'a e'ỹ va'e)

← Chapter 1 Jump to: Chapter 3 →

1Ha'e gui Jonas ma pira rye py oĩa gui ojerure Senhor Nguuete pe.

2Ha'e vy aipoe'i: — Ajexavai vy ajapukai Senhor pe. Ha'e ramo xembovai. Pytũ vaikue reia gui ajapukai ramo ndee rendu xeayvua.

3Mba'eta ndee ae xemombo uka ye'ẽ typya py, ye'ẽ mbyte py. Ha'e ramo yy oxyry atã vy xejoko. Ndeguigua yai opu'ã-pu'ã vy oaxa tema xe'áry rupi.

4Ha'e ramo xee aipoa'e: “Xemombo ma rexaa gui mombyry. Xapy'a rei nda'u aexa ju 'rã ri ndevygua templo iky'a e'ỹ va'e?”

5Yy xeao'i xerekovea peve, yy typya ma xejoko. Yxypo ikuai va'e onhemama xeakã rupi.

6Yvy'ã guy py peve aguejy avy, yvy peve ete aguejy. Ha'e nunga raka'e rã peve xe'áry rupi xejokopa ta va'ekue. Ha'e rami teĩ omanogue ikuaia gui ndee renoẽ ju xerekovea, Senhor Xeruete.

7Xeryepy py xenhe'ẽ oĩ va'e ikangy ramo xema'endu'a Senhor re. Ha'e vy ajerurea re aroma'endu'a ndea py, Ndevygua templo iky'a e'ỹ va'e py ae.

8Amongue mba'emo ra'angaa pe rive ojeko me'ẽ vy ojepe'a imboaxyarã va'ekue gui.

9Ha'e rã xee ma avy'aa amonhendu reve ame'ẽ 'rã mba'emo ndevy, ha'e ajapo 'rã va'ekue ajapopa nho 'rã — he'i.

10Ha'e gui ma pira pe Senhor ijayvu ramo ombojevy Jonas yy rembe re.

← Chapter 1 Jump to: Chapter 3 →